9 قازاندا الماتىداعى "ابىلاي حان" سپورت كەشەنىندە كاسىپقوي بوكستان حالىقارالىق تۋرنير وتەدى. تاياۋدا عانا تۇساۋى كەسىلگەن "دارىن" جانە "Nev Names" پروموۋتەرلىك كومپانيالارى ۇيىمداستىرىپ وتىرعان ايتۋلى جارىستا قازاقستاننىڭ بىرقاتار ايماعى جانە ءازىربايجان مەن بەلارۋس ەلىنەن كەلگەن بىلعارى قولعاپ شەبەرلەرى باق سىنايدى, دەپ حابارلايدى Egemen.kz
الاتاۋ باۋرايىندا وتەتىن جارىستا اتىراۋلىق بەكبولات قۇرامىسوۆ كاسىپقوي رينگتەگى ءوزىنىڭ تۇساۋكەسەر كەسەر كەزدەسۋىن وتكىزەدى. بۇل ەسىم جانكۇيەرلەرگە جاقسى تانىس. قازاقستان رەسپۋبليكاسىنا ەڭبەك سىڭىرگەن جاتتىقتىرۋشى داستان سادۋاقاسوۆتىڭ ءتول شاكىرتى اۋەسقوي رينگتە جۇرگەندە 69 كيلو سالماق دارەجەسىندە ونەر كورسەتىپ, ەلەۋلى تابىستارعا قول جەتكىزدى. اتاپ ايتساق, ستۋدەنتتەر اراسىندا چيانگ-ماي مەن ەليستادا وتكەن الەم چەمپيوناتتارىنىڭ ءفيناليسى بولدى, ازيا بىرىنشىلىگىندە قولا مەدالدى يەلەندى. ەرەسەكتەردىڭ ەل چەمپيوناتىندا جۇلدەگەلەر ساناتىنا قوسىلىپ, دۇنيەجۇزىلىك بوكس سەرياسىندا (WSB) "استانا" ارلاندارى" كلۋبىنىڭ نامىسىن ابىرويلى قورعادى. ەندى بەكبولات كاسىپقويلارمەن كۇش سىناسۋدى قۇپ كورىپ وتىر. ءوزىنىڭ العاشقى جەكپە-جەگىن قۇرامىسوۆ الماتىلىق باتىرجان تۇحتاەۆقا قارسى وتكىزەدى.
تانىمال باپكەر ساعاتبەك مۇساحانوۆتىڭ قول استىندا جاتتىعاتىن ەسكەندىر حارسان اندرەي نۋرچينسكيمەن قولعاپ تۇيىستىرەدى. 31 جاستاعى بەلارۋس ەلىنىڭ وكىلى وتە تاجريبەلى بوكسشى. ول وسى كۇنگە دەيىن كاسىپقوي رينگتە 50-گە جۋىق جەكپە-جەك وتكىزدى. ال 23 جاستاعى قانداسىمىز جەتى رەت شارشى الاڭعا شىعىپ, سونىڭ التاۋىندا جەڭىسكە جەتتى.
– الماتىداعى بوكس كەشەنىندە ونەر كورسەتەتىن جىگىتتەردىڭ ءۇش-تورتەۋىنىڭ عانا ەسىمى كوپشىلىككە تانىمال. ال قالعاندارى كاسىپقويلار اراسىندا وزدەرىنىڭ تۇساۋكەسەر كەزدەسۋلەرىن وتكىزگەلى وتىر. وسىلايشا, ءبىز جاستارعا ءوز-وزدەرىن مويىنداتۋعا جاقسى مۇمكىندىك بەرىپ وتىرمىز. ونىڭ ۇستىنە, "دارىن پروموۋشەن" كومپانياسى جۋىردا عانا قۇرىلدى. قازاقستان كاسىپقوي بوكس فەدەراتسياسىنىڭ ارنايى ليتسەنزياسىن رەسمي تۇردە العاننان كەيىن بىردەن ءدۇبىرلى دودا ۇيىمداستىرۋعا بەل بۋدىق. بۇل رەتتەگى ءبىزدىڭ باستى ماقساتىمىز – وسى سپورت ءتۇرىن تاڭداعان جاستارعا جول اشۋ, ولاردىڭ ۇلكەن ارەناعا شىعۋىنا بارىنشا جاعداي جاساۋ. ايتۋلى جارىس كوپشىلىكتىڭ كوڭىلىنەن شىعادى دەپ ويلايمىز, – دەيدى "دارىن" پروموۋتەرلىك كومپانياسىنىڭ پرەزيدەنتى دارحان قابىلانباەۆ.
سونداي-اق, ايتۋلى تۋرنيردە قانات سۇمەباي ۇلى مەن ءداۋىت ىنتىماق, باۋىرجان بەيىلدينوۆ پەن ەرلان ماحمۇد, عاني سپاتاەۆ پەن يسمات ەيۋنۋلاەەۆ ء(ازىربايجان), سەرگەي كراپشيلا (بەلارۋس) مەن ادلان سەلمۇرزاەۆ جانە اسحات جانتۇرسىنوۆ پەن كازيم ۋمۋدوۆ ء(ازىربايجان) سىندى بوكسشىلار جۇدىرىقتاسادى.