ءبىز ءوزى قىزىقپىز. بولشەۆيكتەردىڭ ءمۇسىنىن تۇعىرىنان تۇسىرە المايمىز, قازاقتىڭ قايماقتارىن تۇعىرعا قوندىرا المايمىز. سەمەيدە رۋحانيات جاناشىرلارى ءانشى-كومپازيتور تۇرسىنعازى راحيموۆتىڭ دايىن تۇرعان مۇسىنىنە ورىن تاپپاي ءجۇر.
ارقالىعىنا تارباعاتايدىڭ تاۋ-تاسى بەينەلەنگەن ورىندىقتا دومبىراسىن قولىنا الىپ, تۇرسىنعازى راحيموۆ وتىر. جۇزىنەن نۇر توگىلەتىندەي. كەلىستى ءمۇسىن 2018 جىلى مادەنيەت قايراتكەرى اداي ازاماتوۆتىڭ تاپسىرىسىمەن جاسالعان. الايدا ءانشى-سازگەردىڭ مۇسىنىنە الاش ارىستارىنىڭ ءىزى قالعان سەمەي شاھارىنان لايىقتى ورىن تابىلماي تۇر.
– ەكى جىل بۇرىن قالا اكىمىنە حات جازدىق. قور اشتىق. تۇرسىنعازى راحيموۆتىڭ اتىن كوشەگە بەردىك. ەندىگى ۇسىنىسىمىز, جاماقاەۆ كوشەسىنىڭ بويىنا ونەر اللەياسىن اشساق دەيمىز. اللەياعا ونەر ادامدارىنىڭ شاعىن بيۋستەرىن قويساق دەگەن دە وي بار. بىراق اكىمدىكتەگىلەر كوروناۆيرۋستى سىلتاۋراتىپ ءۇنسىز قالدى, – دەيدى رۋحانيات جاناشىرى اداي ازاماتوۆ.
ال سەمەي قالاسى اكىمىنىڭ ورىنباسارى ايدار سادىرباەۆتىڭ ايتۋىنشا, ءمۇسىن جەكە تاپسىرىسپەن جاسالعاندىقتان ورىن ءالى بەلگىلەنگەن جوق. ونى ارنايى كوميسسيا قاراۋى كەرەك ەكەن.
كوميسسيا ۋاقىت ءبولىپ قاشان قارايتىنى, بىزگە بەيمالىم. ءار كوشەسى تاريحتان سىر شەرتەتىن شەجىرەلى شاھاردان سازگەردىڭ مۇسىنىنە كورنەكتى ورىن تابۋ جىلعا سوزىلاتىنداي قيىن شارۋا ەمەس سياقتى.
تۇرسىنعازى راحيموۆتىڭ شىعارماشىلىعى قازاقتىڭ ءان ونەرىن جاڭا دەڭگەيگە كوتەردى. ء«سابي بولعىم كەلەدى» انىمەن تانىلعان سازگەر كوبىنەسە مۇقاعالي ماقاتاەۆتىڭ ولەڭدەرىنە ءان جازعان. «داريعا, دومبىرامدى بەرشى ماعان», «وتىزدان اسىپ بارامىن», «مەن سەنى ساعىنعاندا», «ساناۋلى كۇن», «نەنى اڭسايمىن», «يا, جاراتۋشى اللام», «قازاعىم-اي», «اياگوز ارۋ» سىندى اندەرى بۇكىل قازاق دالاسىن تەبىرەنتكەن.
كەلەسى جىلى تۇرسىنعازى راحيموۆتىڭ تۋعانىنا 70 جىل. اتاۋلى داتاعا وراي ءانشى-سازگەردىڭ زامانداسى اداي ازاماتوۆ حالىقارالىق دەڭگەيدە ۇلكەن بايقاۋ ۇيىمداستىرۋدى ويلاستىرىپ وتىر. وعان دەيىن قالا اكىمىنىڭ ورىنباسارى ايتقان كوميسسيا باس قوسىپ, اقىلداسىپ, قازاق دالاسىندا ءانى اۋەلەگەن سازگەردىڭ دايىن ءمۇسىنىن كورنەكتى ورىنعا قويادى دەپ سەنەيىك.
سەمەي