وتاندىق فارماتسەۆتيكا قانداي دەڭگەيدە؟

"5 مىڭنان استام ادام فارماتسەۆتيكا ونەركاسىبىنىڭ تۇراقتى قىزمەتىن قامتاماسىز ەتەدى. ءىرى ءوندىرىس وشاقتارى ەلىمىزدىڭ 4 وڭىرىندە: الماتى مەن شىمكەنت قالالارىندا, الماتى جانە قاراعاندى وبلىستارىندا ورنالاسقان. ولار ءدارى-دارمەك پەن مەديتسينالىق بۇيىمدار ءوندىرىسىنىڭ 75%-ىن قامتاماسىز ەتەدى. سالا كاسىپورىنداردىڭ تۇراقتى قىزمەتىنىڭ ناتيجەسىندە 2019 جىلى ءوندىرىس كولەمى 18%-عا ءوسىپ, 92 ملرد تەڭگەنى قۇرادى. ەكسپورت 69%-عا ارتىق", دەدى ب.اتامقۇلوۆ.

ءمينيستردىڭ ايتۋىنشا, بيىلعى 8 ايدا وتاندىق كاسىپورىندار فارماتسەۆتيكالىق ونىمدەرگە دەگەن جوعارى قاجەتتىلىكتى قاماتاماسىز ەتىپ, ءوندىرىس 34,1%-عا (81,5 ملرد تەڭگەگە) ءوستى. فارماتسەۆتيكالىق جانە مەديتسينالىق ونەركاسىپتى ودان ءارى دامىتۋدىڭ 2020-2025 جىلدارعا ارنالعان كەشەندى جوسپار ازىرلەندى. جوسپار 62 ءىس-شارا مەن 8 بولىمنەن تۇرادى. فارماتسەۆتيكالىق قىزمەتتى زاڭنامالىق رەتتەۋ اياسىندا وتاندىق وندىرۋشىلەر مەن شەتەلدىك ينۆەستورلار ءۇشىن فارماتسەۆتيكا ونىمدەردىڭ ىشكى نارىعىنا شىعۋىن وڭايلاتۋ قاراستىرىلعان. ساتىپ الۋداعى جەرگىلىكتى ونىمدەردىڭ ۇلەسىن ۇلعايتۋ جانە ساتىپ الۋ مەرزىمىن قىسقارتۋ كوزدەلەدى. بارلىق جەرگىلىكتى اتقارۋشى ورگاندار ءۇشىن جەرگىلىكتى قامتۋ بويىنشا KPI بەكىتىلمەك. فارماتسەۆتيكالىق ونىمدەردىڭ باعالارىن تىركەۋ مەملەكەتتىك قىزمەت كورسەتۋ فورماتىنا اۋىستىرىلادى.بۇل ءىس-شارالاردىڭ بارلىعى "حالىق دەنساۋلىعى جانە دەنساۋلىق ساقتاۋ جۇيەسى" تۋرالى كودەكسكە, سونداي-اق وزگە دە نورماتيۆتىك اكتىلەرگە وزگەرىستەر ەنگىزۋ ارقىلى ىسكە اسىرىلادى.