وسى ۋاقىتقا دەيىن تات باسقان قۇبىردان سۋ الىپ كەلگەن تۇرعىنداردىڭ ءوتىنىش-ارىزىنا بەيجاي قاراۋ مۇمكىن بولمادى. جارتى عاسىردان بەرى اۋىستىرىلماعان قۇبىرلاردىڭ توزىعى ابدەن جەتكەنى انىق ەدى.
ءسويتىپ قۇبىرلاردى جاڭارتۋ ءۇشىن مەردىگەر ۇيىم انىقتالىپ, بىلەك سىبانا ىسكە كىرىسكەن. جوبانىڭ سمەتالىق قۇنى 745,77 ملن تەڭگەگە باعالاندى. سۋ قۇبىرى جەلىلەرىن جاڭارتۋمەن اينالىسقان «ەسما ءححى» جشس بيىل جۇمىستى اياقتاپ, حالىقتىڭ يگىلىگىنە تاپسىردى.
– سۋ قۇبىرىنىڭ جالپى ۇزىندىعى 18,9 شاقىرىمدى قۇرادى. قۇبىر تارتۋ جۇمىستارى 2018 جىلدىڭ قىركۇيەگىنەن وسى جىلدىڭ ساۋىرىنە دەيىن سوزىلدى. ەڭ باستىسى, حالىق ەندى تازا اۋىز سۋدى تۇتىنىپ وتىر, – دەيدى «ەسما ءححى» جشس باسشىسى دامير قايرات.
ەلۋ جىلدان بەرى جوندەۋ كورمەگەن اۋىز سۋ قۇبىرلارى 215 ۇيگە, مەكتەپكە, اۋرۋحاناعا, مەشىتكە جانە مادەنيەت ۇيىنە تارتىلدى. تۇرعىندار دا ءدان ريزا.
ءدال وسىنداي جۇمىستار سەمەي قالاسىنىڭ مۇقىر اۋىلىندا دا اتقارىلدى. مۇنداعى جۇمىستارمەن «DK Proekt» جشس مەردىگەرلىك ۇيىمى اينالىستى. جوبانىڭ سمەتالىق قۇنى – 477,264 ملن تەڭگە.
وتكەن جىلى جوبانى جۇزەگە اسىرۋعا 160 ملن تەڭگە ءبولىنىپ, يگەرىلدى. 2020 جىلى جوبا بويىنشا جۇمىستاردى اياقتاۋعا 317, 264 ملن تەڭگە باعىتتالدى. بولىنگەن قاراجاتقا تۇرعىن ۇيلەرگە 20,8 شاقىرىم جەلى, ەكى سورعى ستانساسى جانە سۋ تارتۋ قۇرىلىستارى سالىندى.
ايتا كەتۋ كەرەك, اۋىلدا تۇرعىن ۇيلەردەن بولەك ەكى ورتا مەكتەپ, قوس دارىگەرلىك امبۋلاتوريا, ۆەتەرينارلىق جانە فەلدشەرلىك پۋنكتتەر, مەملەكەتتىك مەكەمەلەر, كاسىپكەرلىك قىزمەت نىساندارى بار. حالىق وسىعان دەيىن توزىعى جەتىپ, اپاتتى جاعدايدا تۇرعان ەكى قۇدىقتان سۋ الىپ وتىرعان. اۋىز سۋعا قاتىستى ماسەلەلەر دە ورىن-ورنىمەن شەشىلىپ كەلەدى.
بيىل ءوڭىر تۇرعىندارىن اۋىز سۋمەن قامتاماسىز ەتۋ 91,5 پايىزعا دەيىن ارتۋى مۇمكىن. 1 قىركۇيەكتەگى مالىمەتتەر بويىنشا, وبلىس تۇرعىندارىنىڭ 90,5 پايىزى ورتالىقتاندىرىلعان سۋمەن قامتىلعان. اۋىلدىق ەلدى مەكەندەردى قامتۋ – 67,1 پايىز, ياعني 689 اۋىلدىق ەلدى مەكەننىڭ 462-ءسى اۋىز سۋمەن قامتاماسىز ەتىلگەن.
شىعىس قازاقستان وبلىسى