قالانىڭ كۇندەلىكتى كۇيكى تىرلىگىنەن ءبىر ءسات ارىلىپ, تابيعاتتىڭ عاجايىبىن, قۇدىرەتىن سەزىنگىسى كەلەتىن جاندارعا ارنالعان زاماناۋي IT-تەحنولوگيامەن جابدىقتالعان «بوريس ششەرباكوۆتىڭ جاسىل ءۇيى» ەسىگىن اشتى.
«جاسىل ءۇيدىڭ» بوريس ششەرباكوۆتىڭ ەسىمىمەن اتالۋىندا ۇلكەن ءمان بار. ول – عالىم-ورنيتولوگ, تابيعات زەرتتەۋشى, قورشاعان ورتانى قورعاۋعا ەرەكشە ۇلەس قوسىپ جۇرگەن جاناشىر, ساياحاتشى, دارىندى جازۋشى, وسكەمەننىڭ جانە ۆەتنامنىڭ حوشيمين قالاسىنىڭ قۇرمەتتى ازاماتى.
عالىم-ورنيتولوگ ەلىمىزدە مەكەن ەتەتىن 25 قۇستىڭ ءتۇرىن انىقتاعان. بىرقاتار قۇستىڭ قايدان شىققانىن, قۇس قاناتى مەن قاۋىرسىنىنىڭ قالاي پايدا بولعانى تۋرالى عالىمنىڭ بولجامى جاقىندا الەمدىك دەڭگەيدەگى جاڭالىققا اينالۋى مۇمكىن.
بىرەۋ بىلەر, بىرەۋ بىلمەس. بوريس ششەرباكوۆتىڭ باستاماسىمەن باتىس التاي, مارقاكول قورىقتارى, قۇلجا جانە تارباعاتاي قاۋمالدارى اشىلىپ, تارحان جانە ريددەر اۋماعىنداعى اعاش كەسۋ توقتاتىلعان. عالىمنىڭ بارلىق ەڭبەكتەرى تۋعان جەر مەن ەلدى سۇيۋگە, ۇلت قۇندىلىقتارىن قادىرلەۋگە, تابيعاتتى تانۋعا, قورعاۋعا شاقىرادى.
بۇگىنگى تاڭدا تابيعاتتىڭ جىلدان-جىلعا توزىپ بارا جاتقانى, ادامداردىڭ قورشاعان ورتاعا دەگەن نەمقۇرايلى كوزقاراسى وتە وزەكتى ماسەلە. جوبانىڭ تۇپتەپ كەلگەندەگى ماقساتى دا قالالىقتاردى ب.ششەرباكوۆتىڭ جانە باسقا دا تابيعات زەرتتەۋشى-جازۋشىلاردىڭ ەڭبەكتەرى ارقىلى تابيعاتتى تانۋعا, قورشاعان ورتانى قورعاۋعا شاقىرۋ ەدى.
جۇرتشىلىقتى جاقسىلىققا شاقىرار «جاسىل ءۇي» تابيعات جاناشىرلارى باس قوساتىن, ەكولوگيالىق تاقىرىپتاردا ءتۇرلى شارالار وتكىزەتىن ەرەكشە ورىنعا اينالارى انىق.
وسكەمەن