وزبەكستاننىڭ ناۋاي وبلىسىندا قازاقتىڭ بەلگىلى اقىنى بازار جىراۋ وڭداس ۇلىنا ەسكەرتكىش ورناتىلدى. بۇل تۋرالى ۇشقۇدىق اۋدانى اكىمدىگىنىڭ ءباسپاسوز قىزمەتى Telegram كانالىندا ءمالىم ەتتى, دەپ حابارلايدى Egemen.kz قازاقپارات سايتىنا سىلتەمە جاساپ.
بالقى بازار جىراۋ ءبيۋسىنىڭ اشىلۋ سالتاناتى 3 قازان كۇنى ءوتتى. شاراعا اۋدان اكىمى س.حامروەۆ, ۇشقۇدىق اۋدانى قازاق مادەني ورتالىعىنىڭ قىزمەتكەرلەرى, اعا بۋىن جانە باق وكىلدەرى قاتىستى. بيۋست ورناتار الدىندا جالپاقتاۋداعى بازار جىراۋدىڭ بەيىتى اباتتاندىرىلعان.
بازار جىراۋ وڭداس ۇلى 1842 جىلى قازاقستان رەسپۋبليكاسى قىزىلوردا وبلىسىنىڭ قارماقشى اۋدانىندا دۇنيەگە كەلگەن. ەل اراسىندا بالقى بازار دەپ تانىلعان. ءومىرىنىڭ سوڭعى جىلدارىن جالپاقتاۋ جايلاۋىندا, اقبوگەت توپىراعىندا وتكىزدى.
1911 جىلى دۇنيە سالىپ, جالپاقتاۋعا سۇيەگى قويىلعان. بازار جىراۋدى سىر بويىنىڭ اقىن-جىراۋلارى, تەرمەشىلەرى وزدەرىنە ۇستاز ساناعان. ونىڭ تۋىندىلارى "تەرمە", ء"ۇش عاسىر جىرلايدى" جيناقتارىنا ەنگەن.