ەلوردادا زەينەتكەرلەرگە قانداي جەڭىلدىكتەر قاراستىرىلعان

نۇر-سۇلتان زەينەتكەرلەرىن الەۋمەتتىك قولداۋ ماقساتىندا جەرگىلىكتى بيۋدجەتتەن كومەك كورسەتىلەدى. وسىلايشا, اعا بۋىنعا اقىسىز قىزمەتتەر مەن اقشالاي تولەمدەر تۇراقتى تۇردە ۇسىنىلىپ وتىرادى. ونىڭ ىشىندە زەينەتكەرلەر قالالىق جولاۋشىلار كولىگى مارشرۋتتارىندا اقىسىز جۇرۋگە قۇقىلى (تاكسيدەن باسقا); قارتتار كۇنىنە جاسىنا قاراي 2,5 ايلىق ەسەپتىك كورسەتكىش مولشەرىندە ءبىر رەتتىك اقشالاي تولەمدەر; ەكى جىلدا ءبىر رەت تەگىن ءتىستى پروتەزدەۋ جانە پروتەزدەۋ الدىنداعى وڭالتۋعا الەۋمەتتىك كومەك; قاتاركول اۋىلىنىڭ وڭالتۋ ورتالىعىندا ساناتوري-كۋرورتتىق ەمدەۋ قىزمەتتەرى. بۇل رەتتە, جاسى بويىنشا زەينەتكەرلەر جولداما قۇنىنىڭ 35% تولەمىن, ەڭ تومەنگى زەينەتاقى الۋشىلار 25% تولەمدى پايدالانا الادى.

سونداي-اق قارتتار قاتتى وتىن ساتىپ العانى ءۇشىن وتەماقى الادى (جان باسىنا شاققانداعى ورتاشا تابىسى ءتورت ەڭ تومەنگى جالاقى مولشەرىنەن اساتىن, سونداي-اق تىركەلگەن تۇرعىن ءۇيى بىردەن كوپ ادامداردى قوسپاعاندا).

"تۇرمىسى تومەن وتباسىلارعا, ونىڭ ىشىندە تۇرعىن ءۇيدىڭ يەسى نەمەسە جالداۋشىسى بولىپ تابىلاتىن زەينەتكەرلەرگە كوممۋنالدىق قىزمەتتەر مەن باسقا دا قىزمەتتەرگە اقى تولەۋ شىعىندارى وسى ماقساتتارعا ارنالعان وتباسىلىق شىعىستاردىڭ رۇقسات ەتىلگەن شەكتى دەڭگەيىنەن اسىپ كەتكەن جاعدايدا, جەرگىلىكتى بيۋدجەتتەن كومەك كورسەتىلەدى. نۇر-سۇلتاندا شەكتى رۇقسات ەتىلگەن دەڭگەي وتباسىنىڭ ورتاشا ايلىق جيىنتىق كىرىسىنىڭ 5%-ىن قۇرايدى", دەپ اتاپ ءوتتى جۇمىسپەن قامتۋ جانە الەۋمەتتىك قورعاۋ باسقارماسى.

سونداي-اق مەملەكەتتىك ورگاندار جالعىزباستى زەينەتكەرلەردى مەديتسينالىق-الەۋمەتتىك مەكەمەلەرگە تىركەۋ جانە ۇيدەگى الەۋمەتتىك قىزمەتتەر بويىنشا جۇمىس جۇرگىزۋدە. ەستەرىڭىزگە سالا كەتەيىك, ەلوردادا ءجۇز مىڭعا جۋىق زەينەتكەر تۇرادى