ەرتەڭنەن باستاپ "Nur Otan" پارتياسىنىڭ پرايمەريزىنە داۋىس بەرۋ كەزەڭى باستالادى, دەپ حابارلايدى Egemen.kz "Nur Otan" پارتياسىنىڭ ءباسپاسوز قىزمەتىنە سىلتەمە جاساپ.
بيىل ەلدى ەلەڭ ەتكىزگەن پارتياىشىلىك بايقاۋدىڭ اقتىق سىنى ساياساتتاعى جاڭا جۇلدىزدارعا جول اشاتىنى انىق. ىرىكتەۋگە قاتىسىپ, ساياسي ارەنادا ءوز باعىن سىناپ كورگىسى كەلەتىن ازاماتتار از ەمەس.
تامىز ايىندا وتكەن پارتيانىڭ ساياسي كەڭەسى بيۋروسىنىڭ وتىرىسىندا ەلباسى - نۇرسۇلتان نازارباەۆ پرايمەريزدىڭ بارلىق قاتىسۋشىلار ءۇشىن ءادىل, اشىق جانە تەڭ جاعدايدا ۇيىمداستىرىلۋى كەرەكتىگىنە باسا نازار اۋدارعان بولاتىن.
"جۇرتشىلىق ەلدىڭ قوعامدىق جانە ساياسي ومىرىنە بەلسەنە قاتىسقىسى كەلەدى. ءبىز پارتيانى قايتا جانداندىرۋدىڭ دۇرىس باعىتىن تاڭدادىق. ەلىمىزدىڭ ماسەلەلەرىن بىرلەسىپ شەشۋ ءۇشىن اشىق ديالوگتى قامتاماسىز ەتۋ قاجەت. پرايمەريزدىڭ مىندەتى – حالىقتىق پارتيالىق تىزىمدەردى قالىپتاستىرۋ, قوعام قولداۋىنا يە, ناقتى جاعدايدى بىلەتىن بەدەلدى كوشباسشىلاردى, بەلسەندى ادامداردى باسەكەلەستىك نەگىزىندە ىرىكتەۋ", دەدى پارتيا كوشباسشىسى نۇرسۇلتان نازارباەۆ.
پارتيا مۇشەلەرى وزدەرى تاڭداعان ۇمىتكەرلەرىنە قازاننىڭ 1 مەن 3 ارالىعىندا داۋىس بەرەتىن بولادى.
پارتيانىڭ ءار مۇشەسى ءوز سايلاۋ اۋماعىنان دوداعا تۇسكەن ۇمىتكەرلەردىڭ ىشىنەن تاڭداعاندارىنىڭ بارلىعىنا داۋىس بەرە الادى, الايدا ءبىر تەلەفون نومىرىنەن ءبىر ادام عانا داۋىس بەرۋ قۇقىعىنا يە بولادى.
داۋىس بەرۋ نەگىزىنەن ونلاين فورماتىندا جۇزەگە اسىرىلادى, الايدا ينتەرنەتى جوق ازاماتتار ءۇشىن ەلىمىزدىڭ بارلىق ايماقتارىندا ارنايى جابدىقتالعان سايلاۋ ۋچاسكەلەرى جۇمىس ىستەيتىن بولادى.
ونلاين-داۋىس بەرۋ 2020 جىلدىڭ 1 قازاندا تۇنگى ساعات 00:00-دە باستالىپ, 2020 جىلعى 3 قازاندا كۇندىزگى ساعات 14:00-دە اياقتالادى. سايلاۋ ۋچاسكەلەرىندە داۋىس بەرۋ 2020 جىلدىڭ 3 قازانىندا تاڭعى ساعات 08:00-دەن 14:00-گە دەيىن قولجەتىمدى بولادى.
پارتيا مۇشەلەرى ءوز تاڭداۋلارىن ءتورت ءتۇرلى جولمەن جۇزەگە اسىرادى. ءبىرىنشىسى - سمارتفوندارعا ارنالعان موبيلدىك جۇكتەمە, ال ەكىنشىسى - primaries.kz ۆەب-پورتالى ارقىلى.ينتەرنەت جەلىسىمەن قامتاماسىز ەتىلمەگەن ەلدى مەكەندەردە تۇراتىن 84 000 استام پارتيالىقتار ارنايى ۋچاسكەلەرگە بارىپ, قاعاز بيۋللەتەن ارقىلى داۋىس بەرەدى, ال قالعان ايماقتارداعى ۋچاسكەلەردەسايلاۋشىلارعا ونلاين تۇردە داۋىس بەرۋ ءۇشىن ينتەرنەت جەلىسىنە قوسىلعان ارنايى ورىندار جابدىقتالاتىن بولادى.
5-ءشى قازان كۇنى پرايمەريز قورىتىندىسى بويىنشا ۇمىتكەرلەردىڭ بارلىق دەرەكتەرى مەن رەيتينگتەرى پارتيانىڭ ينتەرنەت-سايتىندا جاريالانادى.
ەلىمىزدە العاش رەت وتكىزىلىپ وتىرعان پارتياىشىلىك ىرىكتەۋگە 10 000 استام ازامات قاتىسۋعا نيەت بىلدىرگەن بولاتىن.ولاردىڭ ىشىندە ءبىلىم جانە عىلىم, دەنساۋلىق ساقتاۋ, كاسىپكەرلىك, مادەنيەت, سپورت تاعى باسقا سالالاردىڭ وكىلدەرى بار. ۇمىتكەرلەردىڭ 31% ءبىلىم جانە عىلىم سالاسىنىڭ وكىلدەرى قۇرايدى – بۇل سالا بويىنشا ەڭ ۇلكەن كورسەتكىش.
كانديداتتاردىڭ 36,9% ايەلدەر, 29,6% - 35 جاسقا دەيىنگى جاستار, بۇل ايەلەر مەن جاستاردىڭ ساياسي بەسلەندىلىگىنىڭ كورسەتكىشى. سونىمەن قاتار, دوداعا قاتىسۋعا وتانداستار, ەرەكشە قاجەتتىلىكتەرى بار ازاماتتارجانە كوپ بالالى انالار دا تىركەلگەن.
ۇمىتكەرلەردىڭ ورتاشا جاسى 43 جاستى قۇرايدى. ەڭ جاسى 19-داعى تۇركىستاندىق اقەركە تالعاتبەك, ەڭ ۇلكەن كانديدات - 83 جاستاعى شىمكەنت تۇرعىنى باسس نينا.
بۇل قوعامنىڭ دا, پارتيانىڭ دا ساياسي ومىردەگى جاڭا وزگەرىستەرگە دايىن ەكەندىگىنىڭ كورسەتكىشى.
"Nur Otan" پارتياسىنىڭ قازاقستان رەسپۋبليكاسى بويىنشا مۇشەلەرىنىڭ سانى 800 000 اسادى.