كۇن تارتىبىندەگى ماسەلە بويىنشا جوبالىق باسقارۋ جانە تسيفرلاندىرۋ ورتالىعىنىڭ ديرەكتورى دامير ەگىزباەۆ بايانداما جاسادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
بيىلعى جىلى پرەزيدەنت قاسىم-جومارت توقاەۆ حالىق سانى 250-دەن اساتىن ءار اۋىلعا ينتەرنەت تارتۋدى تاپسىردى.
بۇگىندە 250-دەن استام تۇرعىنى بار وبلىستاعى 308 اۋىلدىڭ 166-سى ينتەرنەت جەلىسىنە كەڭ جولاقتى كابەلدىك قولجەتىمدىلىكپەن قوسىلعان دەسەك, اعىمداعى جىلدىڭ سوڭىنا دەيىن قوسىمشا تاعى 11 ەلدى مەكەن قامتاماسىز ەتىلەتىن بولادى.
308 ەلدى مەكەننىڭ 234-ءى جوعارى جىلدامدىقتى ءموبيلدى ينتەرنەتپەن (3G جانە 4G) قامتاماسىز ەتىلگەن. 23 اۋىلدا ۇيالى بايلانىس وپەراتورلارى ءموبيلدى ينتەرنەتتىڭ جىلدامدىعىن ارتتىرۋ بويىنشا جۇمىستار جۇرگىزۋدە. 50 اۋىلدىق ەلدى مەكەندە ونىڭ جىلدامدىعى تۇتىنۋشىلاردى قاناعاتتاندىرمايدى.
حالىق سانى 250 ادامنان از 63 اۋىلدىڭ 20-سى جوعارى جىلدامدىقتى ءموبيلدى ينتەرنەتپەن قامتاماسىز ەتىلگەن. جىل سوڭىنا دەيىن تاعى ءبىر اۋىل ينتەرنەت بايلانىسقا قوسىلادى.
تالاس, جامبىل, قورداي اۋداندارىندا ۇيالى بايلانىس وپەراتورلارى ۇيالى بايلانىس انتەننالارىن ورناتۋدا قيىندىقتارعا تاپ بولۋدا. بەينەكونفەرەنتسبايلانىس رەجيمىندە قاتىسقان اۋدان اكىمدەرىنە ماسەلەلەردى شەشۋ تاپسىرىلدى.
"مەملەكەت باسشىسى تسيفرلىق تەڭسىزدىكتى جويۋدى, ينتەرنەتكە بارىنشا قولجەتىمدىلىكتى جانە بارلىق ازاماتتاردىڭ ساپالى بايلانىسىن قامتاماسىز ەتۋدى تاپسىردى. قازىرگى ۋاقىتتا قاشىقتان ءبىلىم بەرۋ ساپاسى مەن ەلەكتروندى ساۋدانىڭ دامۋى وسىعان بايلانىستى بولىپ وتىر", - دەپ اتاپ ءوتتى وبلىس اكىمى بەردىبەك ساپارباەۆ.
ايماق باسشىسى ءار اۋىلداعى جاعدايدى تالداپ, قاي ەلدى مەكەندەردە ينتەرنەت جوق ەكەنىن انىقتاۋ كەرەكتىگىن ەسكەرتتى. تومەن جىلدامدىقپەن تۇرعىندار بەينەجازبالاردى بىلاي قويعاندا, الەۋمەتتىك جەلىلەر ارقىلى حابارلاما جىبەرە المايدى. سونىمەن بىرگە ۇيالى بايلانىستا دا كەدەرگىلەر تۋىندايدى. جەرگىلىكتى جەرلەردەگى ناقتى جاعدايدى ءتۇسىنۋ ماڭىزدى. وبلىس اكىمىنىڭ شەشىمىمەن ينتەرنەتكە قول جەتىمدىلىك ماسەلەلەرى بويىنشا جۇمىس توبى قۇرىلاتىن بولدى. ونىڭ قۇرامىنا ۇيالى بايلانىس وپەراتورلارىنىڭ وكىلدەرى دە ەنەدى.
"جاھاندىق جەلى شالعاي ايماقتارعا دا جەتۋى ءتيىس", - دەدى وبلىس اكىمى.
جاقىن كۇندەرى جۇمىس توبى شالعاي اۋىلداردا ينتەرنەت جىلدامدىعىن ارتتىرۋ جانە كورشى مەملەكەتتىڭ ۇيالى بايلانىس وپەراتورلارىنىڭ بايلانىسىن پايدالاناتىن شەكارا ماڭىنداعى اۋىلدىق وكرۋگ تۇرعىندارىنىڭ ماسەلەلەرىن شەشۋ جونىندە ۇسىنىستار ازىرلەۋى ءتيىس.