سپورت كوميتەتى – ارميا ورتالىق سپورت كلۋبىنىڭ سپورت نىساندارىنىڭ سايكەستىك سەرتيفيكاتىن قازاقستان ۇلتتىق وليمپيادا كوميتەتىنىڭ باس حاتشىسى اندرەي كريۋكوۆ الماتىدا تاپسىردى, دەپ حابارلايدى Egemen.kz.
بۇل اوسك بالانسىندا تۇرعان ارەنالاردا وقۋ-جاتتىعۋ ساباقتارى مەن جيىنداردى, رەسپۋبليكالىق جانە حالىقارالىق سپورتتىق جارىستاردى وتكىزۋدىڭ زاڭدىلىعىن راستايتىن نەگىزگى قۇجات بولىپ تابىلادى.
«قازىرگى ۋاقىتتا قازاقستاننىڭ ۇلتتىق وليمپيادا كوميتەتى وليمپيادالىق سپورت تۇرلەرى بويىنشا قۇرامالار جاتتىعاتىن سپورتتىق بازالاردى اككرەديتتەۋدى جۇرگىزۋدە. ءبىز مۇنى سپورتشىلارىمىز جاقسى جاعدايدا دايىندالۋى ءۇشىن جاتتىعۋ ساپاسىن باقىلاۋدى كۇشەيتۋ ءۇشىن جاسايمىز. ەلىمىزدىڭ باس سانيتار دارىگەرى بەلگىلەگەن سپورت ۇيىمدارىنا قويىلاتىن تالاپتاردان باسقا, كوروناۆيرۋستى جۇقتىرۋ قاۋپىن ازايتۋعا مۇمكىندىك بەرەتىن قوسىمشا رەگلامەنتتەر ازىرلەندى», – دەدى اندرەي كريۋكوۆ.
اوسك سپورت نىساندارى – قازىرگى زاماناۋي دامىعان ينفراقۇرىلىمى بار امبەباپ كەشەندەر. مۇندا ءارتۇرلى سپورت تۇرلەرىمەن اينالىسۋ, سپورتشىلاردىڭ تۇرۋى مەن تاماقتانۋى, مەديتسينالىق قىزمەتتەر كورسەتۋ جانە وڭالتۋ, وقۋ-جاتتىعۋ جيىندارى مەن سپورتتىق ءىس-شارالار وتكىزۋ ءۇشىن بارلىق قاجەتتى جاعدايلار جاسالعان.