قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ تۇركىستان قالاسىنا ساپارى بارىسىندا بىرقاتار جاڭا نىسانداردى ارالادى. جىبەك جولىنداعى ەڭ كونە شاھارلاردىڭ ءبىرى تۇركىستان بۇگىندە ينفراقۇرىلىمى دامىعان زاماناۋي قالاعا اينالىپ كەلەدى.
ورتالىق ازيا مەن تۇران دالاسىنداعى ەڭ كونە قالا تۇركىستان كەزىندە قازاق حاندىعىنىڭ استاناسى بولعانى ءمالىم. تاريحي دەرەكتەرگە كوز جۇگىرتسەك, مۇندا سان مارتە ۇلتىمىزدىڭ تاعدىرى تالقىلانىپ, ءتۇرلى شەشىم قابىلدانعان. قالانىڭ ىرگەتاسى V-ءVى عاسىرلاردا قالانىپ, اتاۋى بىرنەشە رەت اۋىستى, بىرنەشە رەت ىرگەسى سوگىلىپ, بىرنەشە رەت قايتا تۇلەدى. قازاقتىڭ تاريحى, قازاقستاننىڭ تاريحى تۇركىستاننان باستالادى دەسەك تە قاتەلەسپەيمىز. بۇگىندە تۇركىستان – ەلىمىزدىڭ تاريحى مەن مادەنيەتى باي, ادامداردىڭ رۋحاني كۇش جيناۋعا كەلەتىن ورنى. وبلىس ورتالىعىنا اينالعان قالادا تۋريزم كلاستەرىنىڭ باسىم باعىتى, كولىك ينفراقۇرىلىمى قولايلى جولعا قويىلعان. حالىقارالىق كولىك ماگيسترالىنىڭ جەلىسىندە ورنالاسقان كونە شاھاردىڭ جاڭارۋى – حالىقتىڭ ىزگى نيەت-تىلەگىنەن تۋىنداعان وزگەرىس. ءيا, زامانى تۋىپ, وبلىس ورتالىعىنا اينالعان قاستەرلى شاھار ەندى ۇلتىمىزدىڭ رۋحىن كوتەرەتىن كەلەشەگى كەمەل تۇركىستانعا اينالۋدا. بۇگىنگى قارقىندى قۇرىلىس, سالىنعان ينۆەستيتسيا ەلدىڭ يگىلىگى ءۇشىن اتقارىلىپ جاتقان دۇنيە ەكەنى ءمالىم. ال ەلباسىنىڭ تاريحي شەشىمى شەجىرەلى شاھاردىڭ دامۋىنا تىڭ سەرپىن بەردى. ەلباسىنىڭ تۇركىستانعا ەرەكشە مارتەبە بەرۋ تۋرالى شەشىمى كەزدەيسوق ەمەس ەكەنىن, ەجەلگى قالانىڭ جاڭعىرۋى مەن جاڭارۋى دامۋ جولىمىزدىڭ دۇرىستىعىن كورسەتەتىنىن ايتقان مەملەكەت باسشىسى قاسىم-جومارت توقاەۆ الداعى جۇمىستارى تۋرالى جانە قوعامدى تولعاندىرعان ماسەلەلەردى شەشۋگە بايلانىستى ويىن ءدال وسى تۇركىستاندا بولىسكەن بولاتىن.
جاڭا نىساندار تۋريستەردى تارتۋعا مۇمكىندىك بەرەدى
ەلباسى تۇركىستانعا ساپارى اياسىندا الدىمەن حالىقارالىق اۋەجايدىڭ اشىلۋ راسىمىنە قاتىستى. وبلىس ورتالىعىنان 16 شاقىرىم قاشىقتىقتا ورنالاسقان اۋەجاي زاماناۋي تەحنولوگيالاردى قولدانا وتىرىپ, حالىقارالىق ستاندارتتارعا ساي ەتىپ سالىنعان. اۋەجاي جالپى 900 گەكتار اۋماقتى قامتيدى. تەرمينال, ۇشۋ-قونۋ جولاعى جانە باسقا دا نىساندار سالىنعان حالىقارالىق اۋەجاي قۇرىلىسىن «YDA Group» كومپانياسى جۇرگىزگەن. ءتۋريزمنىڭ دامۋىنا سەپتىگىن تيگىزەتىن اۋەجاي تەرمينالى جىلىنا 3 ميلليونعا جۋىق جولاۋشىعا قىزمەت كورسەتە الادى. اۋەجاي تەرمينالىنىڭ جولاۋشىلاردى وتكىزۋ مۇمكىندىگى – ساعاتىنا 450 جولاۋشى, اۋماعى – 10,5 مىڭ شارشى مەتر, ال ۇشۋ-قونۋ جولاعىنىڭ پارامەترى 3300ح45 مەتردى قۇرايدى. سونداي-اق جاڭا اۋەجاي عيماراتى الەمدەگى ەڭ جىلدام سالىنعان اۋەجاي رەتىندە گيننەستىڭ رەكوردتار كىتابىنا ەنۋى مۇمكىن ەكەنى ايتىلۋدا.
اۋەجايدىڭ ءتۋريزمدى دامىتۋعا ۇلكەن سەپتىگىن تيگىزەرى ايان. ال تۇركىستاننىڭ وزبەكستانعا جاقىندىعىن تاريحي جاعىنان دا, ەكونوميكالىق جاعىنان دا قاراستىرۋعا بولادى. تۇركىستاننىڭ ينتەگراتسيالىق جاعدايى كەلىسەتىن بولسا, ساۋدانىڭ ورتالىعىنا اينالماق. بۇل ورايدا وتكەن جىلى تۋريزم سالاسىن دامىتۋ تۋرالى تاشكەنت وبلىسىنىڭ اكىمدىگىمەن مەموراندۋمعا قول قويىلدى, ونىڭ اياسىندا جالپى تۋريستىك مارشرۋتتاردى دامىتۋ كوزدەلدى. بۇدان باسقا «ۋزبەكيستون تەمىر جولى» اق باسقارما توراعاسىمەن كەزدەسۋ بارىسىندا «تۇركىستان-تاشكەنت» جوعارى جىلدامدىقتى تەمىر جول قۇرىلىسى تۋرالى مەموراندۋمعا قول قويىلعان بولاتىن.
تۇركىستان وبلىسىنىڭ اكىمدىگى مەن وزبەكستاننىڭ ءىرى قالالارىنىڭ اراسىندا بەلگىلى ءبىر بايلانىس, جۇيەلى تۇردە ۇيىمداستىرىلعان «تۋريستىك پاكەت» بولسا, سول تۋريستەردى تارتۋعا بولاتىنى ايتىلعان-دى. ياعني تۇركىستاندى رۋحاني, ينتەللەكتۋالدى ورتالىققا اينالدىرىپ, ىشكى ءتۋريزمدى دە دامىتۋعا بولادى. مىنە, وسى ورايدا تەمىر جول ۆوكزالىنىڭ ىشكى جۇيەسى دە زاماناۋي تالاپقا سايكەستەندىرىلدى.
سونداي-اق تۇركىستانعا ساپارىندا نۇرسۇلتان نازارباەۆ «سامۇرىق-قازىنا» اكتسيونەرلىك قوعامىنىڭ قولداۋىمەن سالىنعان «تۇركىستان-ارەنا» سپورت نىسانىن ارالاپ كوردى. ستاديوننىڭ تريبۋنالارى جەتى مىڭ كورەرمەنگە ارنالعان. اشىق ارەنانىڭ باتىس جانە شىعىس تريبۋناسى بار. سونىمەن قاتار اكروباتيكا, بوكس جانە اۋىر اتلەتيكا جاتتىعۋ زالدارى ورنالاسقان كەشەن كاسىبي سپورتشىلاردىڭ دايىندىعىنا ىڭعايلانىپ سالىنعان. ستاديوننىڭ نەگىزى فۋتبول الاڭىنان, جەڭىل اتلەتيكاعا ارنالعان جابىق ارەنادان تۇرادى. وسى ارادا ايتا كەتەلىك, ەلباسى ارالاپ كورگەن جاڭا نىسان قۇرىلىسى 2019 جىلدىڭ قازان ايىندا قور مەن تۇركىستان وبلىسى اكىمدىگى اراسىنداعى ىنتىماقتاستىق تۋرالى قول قويىلعان مەموراندۋم اياسىندا باستالعان بولاتىن. «سامۇرىق-قازىنا» قورى الەۋمەتتىك ماڭىزى بار بەس نىساندى جۋىردا وبلىس اكىمدىگىنە تاپسىردى. ياعني الەۋمەتتىك بەس نىسان – اتقارىلعان جۇمىس ناتيجەسىن كورسەتەدى. نىسانداردىڭ ءبىرىنشىسى – امفيتەاتر جىل باسىندا پايدالانۋعا بەرىلدى, قالعانى جۋىردا وبلىس اكىمدىگىنە تاپسىرىلدى. ديرەكتورلار كەڭەسىنىڭ مۇشەسى, «سامۇرىق-قازىنا» اق باسقارما توراعاسى احمەتجان ەسىموۆ قۇرىلىس بارىسىندا اكىمدىك تاراپىنان ايتارلىقتاي قولداۋ كورسەتىلگەنىن اتاپ وتكەن بولاتىن. ءوز كەزەگىندە وبلىس اكىمى ءوڭىردىڭ گۇلدەنۋىنە قوسقان ۇلەسى ءۇشىن قورعا العىس ايتقان-دى. «ەلىمىزدىڭ تۇڭعىش پرەزيدەنتى – ەلباسى ن.ءا.نازارباەۆتىڭ تۇركىستاندى جاڭعىرتۋ جونىندەگى تاپسىرماسى اياسىندا ءسىز باسقارىپ وتىرعان «سامۇرىق-قازىنا» ۇلتتىق ءال-اۋقات قورى وبلىس ورتالىعىنداعى الەۋمەتتىك ماڭىزى بار بەس نىساننىڭ قۇرىلىسىن ءساتتى جۇزەگە اسىردى», دەدى ومىرزاق شوكەەۆ باسقارما توراعاسىمەن كەزدەسۋدە. قور سالىپ بەرگەن بەس الەۋمەتتىك نىساننىڭ ايماق ءۇشىن ماڭىزى زور. ماسەلەن, حالىقتىڭ رۋحاني ازىعى ءۇشىن سالىنعان قوجا احمەت ياساۋي اتىنداعى مۋزەيدىڭ ەكسپوزيتسياسى ياساۋي مۇراسىنان مول سىر شەرتەدى. جالپى, مۋزەي اۋماعى 3000 شارشى مەتردى قۇرايدى جانە 3 قاباتتان تۇرادى. وبلىستىڭ ءبىلىم سالاسىن دامىتۋعا ۇلەس قوساتىن وقۋشىلار سارايى تۇركىستان قالاسىنداعى بالالارعا قوسىمشا ءبىلىم بەرۋگە باعىتتالعان. نىساندا زەرتحانالى ەكولوگيالىق-بيولوگيالىق مۋزەي, ءارتۇرلى سەكتسيا, روبوتەحنيكا, نانوتەحنولوگيا سياقتى سىنىپتار بار. قور تارتۋ ەتكەن نىساننىڭ ءبىرى – كونگرەسس-حولل وڭىردەگى كوپفۋنكتسيونالدى جالعىز كەشەن. كونتسەرت, تەاترلاندىرىلعان قويىلىم جانە باسقا دا ءىس-شارا ۇيىمداستىرۋعا ارنالعان مادەني نىساندا وتىرىس وتكىزەتىن زال, 1000 كورەرمەنگە ارنالعان كونتسەرت زالى, 1900 شارشى مەتر اۋماقتى الىپ جاتقان كورمە الاڭى بار. اتالمىش عيماراتتى ارالاپ كورۋ كەزىندە نۇرسۇلتان نازارباەۆقا «جاڭارعان ەل – باق قونعان ەل» بەينەروليگى كورسەتىلدى.
ەلباسى تۇركىستانعا ساپارى كەزىندە بارعان نىسانداردىڭ تاعى ءبىرى Rixos Turkistan – وتاندىق ينۆەستور قاراجاتىنا سالىنعان, الەمدىك دەڭگەيدەگى قوناقۇي. قالانىڭ تۋريستىك ينفراقۇرىلىمىنداعى ماڭىزدى نىسانداردىڭ ءبىرى سانالاتىن قوناقۇي قۇرىلىسىن بەلگىلى كاسىپكەر, مەتسەنات سەرىكجان سەيىتجانوۆ قارجىلاندىرعان. ىرگەتاسى تۇركىستان قالاسىنىڭ تۋعان كۇنىنە وراي قالانعان 120 ورىنعا ارنالعان قوناقۇيدە 3 بىردەي مەيرامحانا, SPA سالون, كينوتەاتر جانە ىسكەر توپ وكىلدەرى ءۇشىن بيزنەس-ورتالىقتار بار. سونداي-اق ەلباسى نۇرسۇلتان نازارباەۆ « ۇلى دالا ەلى» ورتالىعىندا بولىپ, « ۇلى دالا مەتاللۋرگياسى», « ۇلى دالانىڭ اتقا ءمىنۋ مادەنيەتى», «التىن ادام جانە اڭ ءستيلى» جانە «قازاقستان – تۇركى الەمىنىڭ بەسىگى» اتتى ەكسپوزيتسيالىق كەشەندەرمەن تانىستى. تۇركىستان شاھارىن تۇلەتۋ ماقساتىندا ەلىمىزدىڭ ءاربىر وبلىسى ءبىر نىساننان تارتۋ ەتىپ وتىرعانى بەلگىلى. سونىڭ ءبىرى اتىراۋ وبلىسى اكىمدىگى كيەلى تۇركىستان جەرىنە ساۋلەت ونەرىنىڭ ۇزدىگىنە اينالار « ۇلى دالا ەلى» رۋحاني ورتالىعىن تارتۋ ەتتى. ورتالىقتا قازاق حاندىعىنىڭ قۇرىلعانىنان باستاپ, جاڭا ءداۋىر دامۋىنا دەيىنگى ءارتۇرلى تاقىرىپتى اشاتىن 9 تاريحي-زاماناۋي زال اشىلماق.
كيەلى قالا دامۋدىڭ داڭعىل جولىندا
ءيا, ەلباسى نۇرسۇلتان نازارباەۆ وسىدان ەكى جىل بۇرىن, ياعني 2018 جىلعى 29 قىركۇيەكتە تۇركىستان قالاسىن دامىتۋ ماقساتىندا وڭىرلەر, ۇلتتىق كومپانيالار جانە بيزنەس وكىلدەرىن 26 نىساننىڭ قۇرىلىسىن ىسكە اسىرۋعا شاقىرعان بولاتىن. سول جيىندا مەملەكەت تاراپىنان كاسىپكەرلەرگە ۇنەمى قولداۋ كورسەتىلگەنى, ەندى ولار دا ەلدىڭ دامۋىنا ۇلەس قوسۋى كەرەكتىگى باسا ايتىلىپ, تۇركىستان قالاسىنا قانداي نىساندار قاجەت ەكەنى ايقىندالدى. ناقتىراق ايتساق, اكىمشىلىك-ىسكەرلىك ورتالىعىندا – 15, ءتاريحي-مادەني ورتالىقتا – 9, «ازىرەت سۇلتان» تاريحي مادەني قورىعى ايماعىندا – 2 نىسان. بەلگىلەنگەن جوسپارعا ساي ورىندالىپ كەلەدى. مىسالى, 26 نىساننىڭ وتكەن جىلى 9-ى پايدالانۋعا بەرىلگەن. بۇگىنگى تاڭدا 11 نىساننىڭ قۇرىلىسى اياقتالعان, 4 نىسان قۇرىلىسى جىلدىڭ سوڭىنا دەيىن پايدالانۋعا بەرىلمەك, ال 2 نىسان 2021 جىلعا وتپەلى.
اتاپ ايتار بولساق, اكىمشىلىك-ىسكەرلىك ورتالىقتاعى قۇرىلىسى جۇرگىزىلگەن 15 نىساننىڭ 4-ەۋى, ياعني وبلىس اكىمدىگىنىڭ عيماراتى (BI Group), حالىققا قىزمەت كورسەتۋ ورتالىعى (پاۆلودار وبلىسى), مۋزىكالىق مەكتەپ (بقو) جانە وليمپيادالىق رەزەرۆكە ارنالعان سپورت مەكتەبى (سقو) وتكەن جىلى پايدالانۋعا بەرىلدى. ال بيىل باسقارما, دەپارتامەنتتەر عيماراتتارى (BI Group), مەديا ورتالىق (الماتى قالاسى), نۇر-سۇلتان الاڭى (نۇر-سۇلتان قالاسى), قالالىق ساياباق (الماتى, اقمولا, قاراعاندى وبلىستارى) جانە «سامۇرىق-قازىنا» اق تارتۋ ەتكەن بەس نىسان – وقۋشىلار سارايى, 7000 ورىندىق ستاديون, كونگرەسس ورتالىعى, تسيفرلىق كەڭسە, باسسەينى بار سپورت كەشەنى سىندى 10 نىساننىڭ قۇرىلىسى تولىق اياقتالعان. قازىر پايدالانۋعا قابىلداۋ جۇمىستارى جۇرگىزىلۋدە. سمارت سيتي بايلانىس جەلىلەرى (قازاقتەلەكوم) قۇرىلىسىن جىل سوڭىنا دەيىن پايدالانۋعا بەرۋ جوسپارلانعان. سونداي-اق رۋحاني-مادەني ورتالىقتا 9 نىساننىڭ 5-ەۋى وتكەن جىلى پايدالانۋعا بەرىلسە, بيىل ق.ا.ياساۋي مۇراجايى قۇرىلىسى تولىق اياقتالعان. قالعان 3 نىسان – امبەباپ كىتاپحانا (شىمكەنت قالاسى), ۇلى دالا ەلى ورتالىعى (BI Group, اتىراۋ وبلىسى), دراما تەاتر (اقتوبە وبلىسى, تۇركىستان وبلىسى) قۇرىلىسىن قاراشا ايىنىڭ سوڭىنا دەيىن اياقتاپ, پايدالانۋعا تاپسىرۋ جوسپارلانۋدا. بۇدان بولەك, «ازىرەت سۇلتان» قورىعىنىڭ اينالاسىن اباتتاندىرۋ, كۇلتوبە قالاشىعىنداعى تاريحي نىسانداردى قالپىنا كەلتىرۋ جۇمىستارى جۇرگىزىلۋدە.
ەلباسى جۋرناليستەرگە بەرگەن سۇحباتى بارىسىندا بۇكىل وبلىس اكىمدەرىنە, كومپانيالارعا بەرىلگەن تاپسىرمانىڭ ءبارى ورىندالىپ كەلە جاتقانىن ايتا كەلە, تۇركىستاندى دامىتۋعا اتسالىسقان بارشا ازاماتتارعا ريزاشىلىعىن ءبىلدىردى. بۇل ەلگە, حالىققا سالعان ينۆەستيتسيا ەكەنىن اتاپ ءوتتى.
تۇركىستاننىڭ دامۋى باعىتىندا اتقارىلعان جۇمىستار, ەرتەڭگى جۇزەگە اسىرىلار جوبالار «ساپار ورتالىعىندا» باياندالدى. ەلىمىزدىڭ تۋريستىك الەۋەتىن جوعارىلاتۋ جانە وسى سالاداعى كادرلىق الەۋەتتى ارتتىرۋ بويىنشا ەلباسى بەرگەن تاپسىرمانىڭ ورىندالۋ بارىسى تۋرالى بايانداعان مادەنيەت جانە سپورت ءمينيسترى اقتوتى رايىمقۇلوۆا 2030 جىلعا قاراي تۋريستەردىڭ الەۋەتتى اعىنى 3,5 ملن ادامدى قۇرايتىنى بولجانۋدا ەكەنىن اتاپ ءوتتى. «وسىنى نازارعا الا وتىرىپ, ءسىز بەرگەن تاپسىرمانى ورىنداۋ ماقساتىندا حالىقارالىق تۋريزم جانە سپورت ۋنيۆەرسيتەتى تۇركىستان قالاسىندا بوي كوتەردى. ۋنيۆەرسيتەت جالپى اۋدانى 12 مىڭ شارشى مەتردەن اساتىن زاماناۋي قۇرالدارمەن جابدىقتالعان عيماراتتارمەن قامتاماسىز ەتىلگەن. ولار: شىعىس ستيلىندە جاسالعان باس كورپۋسى, جاتاقحاناسى بار وقۋ عيماراتى جانە سپورتتىق جاتتىعۋ ورتالىعى. بيىل 588 ستۋدەنت ءبىلىم الا باستادى. ولاردىڭ 22-ءسى «التىن بەلگى» يەگەرى, 45-ءى حالىقارالىق سپورت جارىستارىنىڭ جۇلدەگەرى. ءبىرىنشى جىلى ۋنيۆەرسيتەتتە 11 عىلىم جانە PhD دوكتورلارى, 5 «بولاشاق» باعدارلاماسىنىڭ تۇلەكتەرى مەن 4 شەتەلدىك پروفەسسور ونلاين رەجىمىندە ساباق بەرىپ كەلەدى. ستراتەگيالىق سەرىكتەستىك ورناتۋ ماقساتىندا جەتەكشى ۋنيۆەرسيتەتتەردىڭ ۇزدىك الەمدىك تاجىريبەسى نەگىزىندە نارىقتىڭ ناقتى قاجەتتىلىكتەرىن ەسكەرە وتىرىپ, اۋستريا, سينگاپۋر, تۇركيا, مالايزيا سياقتى بىرقاتار ەلدەگى تانىمال شەتەلدىك ءبىلىم بەرۋ مەكەمەلەرىمەن كەلىسىم جاسالدى», دەدى مينيستر. سونىمەن قاتار مينيستر تاجىريبەگە باعىتتالعان ءبىلىم بەرۋ الەۋەتىن ارتتىرۋ ءۇشىن ەلباسى تاپسىرماسىمەن سالىنعان تۋريستىك ينفراقۇرىلىمدىق وبەكتىلەردە جانە بەدەلدى تۋريستىك ۇيىمداردا ۋنيۆەرسيتەتتىڭ تۇلەكتەرى كەلىسىمشارت نەگىزىندە جۇمىس اتقاراتىنىن ايتىپ ءوتتى. بۇۇ جانىنداعى دۇنيەجۇزىلىك تۋريستىك ۇيىمنىڭ يسپانيا مەن پورتۋگاليادان كەيىنگى الەمدەگى ءۇشىنشى حالىقارالىق ءبىلىم بەرۋ ورتالىعىن تۇركىستاندا قۇرۋى تۋرالى كەلىسىم – ماڭىزدى جەتىستىكتەردىڭ ءبىرى. ءمينيستردىڭ مالىمدەۋىنشە, كەلىسىم اياسىندا ستۋدەنتتەر مەن وقىتۋشىلار الماسۋى, عىلىمي-زەرتتەۋ ورتالىعىن قۇرۋى جانە حالىقارالىق TedQual UNWTO ستاندارتى شەڭبەرىندە ءبىلىم بەرۋ باعدارلامالارىن سەرتيفيكاتتاۋعا مۇمكىندىك بەرەدى. وسىلايشا, قوسارلى ءبىلىم بەرۋ, تاجىريبەگە باعىتتالعان وقىتۋ, ءتىل ورتالىعى, قوس ديپلومدى باعدارلاما سياقتى زاماناۋي الەمدىك ۇزدىك ادىستەردى قولدانۋ – تۇلەكتەرگە تەوريامەن قاتار تەرەڭ پراكتيكالىق ءبىلىم الۋعا جانە ەڭبەك نارىعىندا سۇرانىسقا يە بولۋعا جول اشادى.
«ساپار ورتالىعىندا» ءسوز العان تۇركىستان قالاسىنىڭ اكىمى راشيد ايۋپوۆ وبلىس ورتالىعىن, ءتۋريزمدى دامىتۋ باعىتىندا قولعا الىنعان جوبالارعا توقتالدى. ولاردىڭ قاتارىندا «قاسقاسۋ» تۋريستىك-رەكرەاتسيالىق كەشەنى» تاۋ ينفراقۇرىلىمىنىڭ جوباسى دا بار ەكەنىن ايتىپ ءوتتى.
ال قازاقستاننىڭ تۇڭعىش پرەزيدەنتى نۇرسۇلتان نازارباەۆ تۇركىستاندا سامميت, مۋزىكالىق فەستيۆال جانە جاستار فورۋمىن وتكىزۋ كەرەگىن ايتتى. «بۇگىن ءبىز تۇركىستانداعى جاڭا نىساندارمەن تانىستىق. بۇل نىساندار قالانىڭ كورىكتى ورنىنا اينالىپ, قالا تۇرعىندارىن, قازاقستاندىقتار مەن الەمدىك تۋريستەردى تارتۋعا مۇمكىندىك بەرەدى. تۇركىستانداعى اۋقىمدى قۇرىلىس قازاقستانداعى حالىق تىعىز قونىستانعان ءوڭىردىڭ دامۋىنا جاڭا ەكونوميكالىق سەرپىن بەرەدى. قالانىڭ 163 ءىرى نىسانىنىڭ قۇرىلىسىنا 450 ميلليارد تەڭگە تىكەلەي ينۆەستيتسيا تارتىلدى», دەدى ەلباسى. سونداي-اق ن.نازارباەۆ سوڭعى جىلى جۇمىس ىستەپ تۇرعان شاعىن جانە ورتا بيزنەس سۋبەكتىلەرى سانى 20 پايىزعا ارتقانىن, بيىلعى جىلدىڭ قورىتىندىسى بويىنشا قالادا 750 مىڭ شارشى مەتر تۇرعىن ءۇي پايدالانۋعا بەرىلەتىنىن ايتىپ ءوتتى. «مەن مۇندا سامميت بولادى دەپ ويلاعانمىن. الايدا الەمدەگى جاعدايعا بايلانىستى ول كەيىنگە قالدىرىلدى. ەگەر ءبارى جاقسى بولسا, ءبىز ناۋرىزعا قاراي وسى ءسامميتتى وتكىزەمىز», دەدى ەلباسى جۋرناليستەرگە. سونىمەن قاتار ن.نازارباەۆ قالا تۇرعىندارى ءۇشىن قولايلى ءومىر ءسۇرۋ جاعدايىن قامتاماسىز ەتۋدىڭ ماڭىزدى ەكەنىن اتاپ ءوتتى. ء«بىز مۇندا ەاەو مەملەكەتتەرى باسشىلارىنىڭ ءسامميتىن جانە رەسەي – قازاقستان وڭىرارالىق ءسامميتىن وتكىزۋگە دايىندالۋىمىز كەرەك. مۇندا جىل سايىن مۋزىكالىق فەستيۆالدار, جاستار فورۋمدارىن وتكىزۋ قاجەت. تۇركىستاندى تەزىرەك تانىتۋ كەرەك. بۇل – تاريحي قالا, تۇركىلەردىڭ قالاسى. تۇركىستان – شامشىراعى قايتا جانعان كونە شاھار», دەپ تۇيىندەدى ءسوزىن ن.نازارباەۆ.
تۇركىستان وبلىسى