بەردىبەك ساپارباەۆ شۋ اۋدانىنداعى گاز ماسەلەسىن ءبىر اپتادا شەشۋدى تاپسىردى

اتالعان اۋىلعا گاز قۇبىرى بىرنەشە جىل بۇرىن تارتىلعانىمەن, كەيبىر ۇيلەر ءالى كۇنگە دەيىن كوگىلدىر وتىنسىز وتىر. ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى قۇدايبەرگەن قورعانباەۆتىڭ ايتۋىنشا, ۇيلەرگە گاز جەتكىزۋگە جاۋاپتى مەردىگەر - "پاريەۆ" جشس.

2016 جىلى ولاردىڭ قىزمەتتەرىنىڭ باستاپقى باعاسى 420 مىڭ تەڭگەنى قۇراسا, كەيىننەن ول سوما 570 مىڭ تەڭگەگە دەيىن وسكەن. مەردىگەردىڭ ايتۋىنشا, قۇرىلىس ماتەريالدارى قىمباتتاعان. بۇل جاعداي تۇرعىنداردىڭ نارازىلىعىن تۋدىرىپ وتىر. ولار مۇنداي قاراجاتتى كەز-كەلگەننىڭ قالتاسى كوتەرە المايتىندىعىن ايتادى.

شۋ قالاسىنان تولە بي اۋىلىنا دەيىن ۇزىندىعى 8,7 شاقىرىم ماگيسترالدى قۇبىردى ساتىپ الۋ جانە مەملەكەت بالانسىنا قويۋ ءۇشىن وبلىستىق بيۋدجەتتەن 251,1 ميلليون تەڭگە بولىنگەن.

بۇل شەشىم "پاريەۆ" جشس قىزمەتتەرىنىڭ باعاسىن 475 مىڭ تەڭگەگە دەيىن تومەندەتۋگە مۇمكىندىك بەرگەن. بۇگىندە تولە بي اۋىلىنداعى 4200 ءۇيدىڭ 35,2 پايىزى عانا گازعا قوسىلعان. قالعان ۇيلەر قىزمەتتىڭ قىمباتتىعىنا بايلانىستى قوسىلا الماي وتىر.

تابيعي مونوپوليالاردى رەتتەۋ جانە باسەكەلەستىكتى قورعاۋ جونىندەگى وبلىستىق دەپارتامەنت "پاريەۆ" جشس-عا قاتىستى تەرگەۋ جۇرگىزگەن. مەركى اۋداندىق سوتىنا جىبەرىلگەن ءىس اكىمشىلىك قۇقىق بۇزۋشىلىق قۇرامىنىڭ بولماۋىنا بايلانىستى توقتاتىلدى.

دەگەنمەن, قۇدايبەرگەن قورعانباەۆ "پاريەۆ" جشس ءوز مىندەتتەمەلەرىن تولىق ورىنداماعاندىعىن مالىمدەپ وتىر. كومپانيا تەحنيكالىق قىزمەت كورسەتۋدى جۇرگىزۋگە مۇمكىندىك بەرەتىن شارت جاساسپاعان. بۇل, وسى جىلدىڭ قىركۇيەگىندە تولە بي اۋىلىندا گازدىڭ وشىرىلۋىنە اكەلگەن.

"پاريەۆ" جشس قىزمەت كورسەتەتىن ۋچاسكەدە تۇراتىن شۋ قالاسىنىڭ تۇرعىندارى دا وسىنداي ماسەلەنى باستان كەشىردى.

"جۇمىس توبى ءبىر اپتا ىشىندە ءبىر شەشىمىن تابۋى كەرەك. كومپانيانىڭ قىزمەتتەرى باسقا اۋداندارعا قاراعاندا نەگە قىمبات ەكەنىن سارالاڭىزدار. قورداي اۋدانىندا وسى سەكىلدى قىزمەت قۇنى 350 مىڭ, ال شۋ اۋدانىندا جارتى ميلليوننان اسادى. ولاردىڭ گازى التىن ەمەس شىعار؟ نەلىكتەن تۇرعىندار ەكى اپتا بويى گازسىز قالادى؟ تۇرعىندار قىزمەتتەرگە ۇزدىكسىز اقى تولەيدى, سوندىقتان گاز دا تۇراقتى بەرىلۋى ءتيىس. ولاردىڭ نارازىلىعى ورىندى. بارلىق كىنالىلەر ءادىل جازاعا تارتىلۋى كەرەك. ەشكىمگە حالىقتى الداۋعا جول بەرىلمەيدى", دەپ اتاپ ءوتتى وبلىس اكىمى.

ايماق باسشىسى بۇل ماسەلە ءوزىنىڭ جەكە باقىلاۋىندا بولاتىنىن باسا ايتتى. جيىندا بەردىبەك ساپارباەۆ سونىمەن قاتار قورداي اۋدانىنداعى گازداندىرۋ جۇمىستارىن باقىلاۋدى تاپسىردى. اعىمداعى جىلى قورداي اۋدانىنىڭ 22 ەلدى مەكەنى كوگىلدىر وتىنمەن قامتاماسىز ەتىلۋى ءتيىس.