قازاقستاندىق تەننيسشى الەكساندر بۋبليك گەرمانيانىڭ گامبۋرگ قالاسىندا ءوتىپ جاتقان جۇلدە قورى 1 203 960 ەۋرونى قۇرايتىن تۋرنيردە ءساتتى ونەر كورسەتۋدە, دەپ حابارلايدى Egemen.kz.
العاشقى اينالىمدا ول يسپانيالىق البەرت راموس-ۆينولاستى ۇتسا, ەكىنشى كەزەڭدە كانادالىق فەليكس وجە-الياسيممەن كەزدەستى. 1 ساعات 18 مينۋتكە سوزىلعان بۇل باسەكە 6:4, 6:2 ەسەبىمەن بۋبليكتىڭ پايداسىنان شەشىلدى. ەندى شيرەك فينالدا جەرلەسىمىز چيليلىك كريستيان گارينمەن كۇش سىناسادى. وڭتۇستىك امەريكا ەلىنىڭ ورەنى ايتۋلى ءتۋرنيردىڭ باستاپقى باسەكەلەرىندە جاپونيالىق كەي نيسيكوري مەن گەرمانيالىق ياننيك حانفماننان ايلاسىن اسىردى.
فرانتسيانىڭ ستراسبۋرگ قالاسىندا ءوتىپ جاتقان تۋرنيردە زارينا دياس ەكىنشى اينالىمدا ءسۇرىندى. ول جاپونيالىق ناو حيبينوعا 5:7, 3:6 ەسەبىمەن ەسە جىبەردى. سونداي-اق, كەشە ءدال سول جارىستىڭ شيرەك فينالىندا ەلەنا رىباكينا قىتايلىق چجان شۋايمەن شەبەرلىك بايقاستى.