كوروناۆيرۋستىڭ كۇزدە بولۋى مۇمكىن جاڭا تولقىنىنا باس قالا ايتارلىقتاي دايىندالىپ جاتىر. اۋرۋحانالارعا كەزەڭ-كەزەڭمەن توسەك-ورىن قويىلۋدا.
نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ حابارلاۋىنشا, قالادا ەپيدەميالىق جاعداي تۇراقتى. باسقارما اكىمدىكپەن بىرلەسىپ كۇزگى-قىسقى كەزەڭدەگى COVID-19-دىڭ الدىن الۋ جانە ەمدەۋ ءىس-شارالارىنىڭ جوسپارىن جاسادى. اتاپ ايتقاندا, العاشقى مەديتسينالىق-سانيتارلىق كومەك ۇيىمدارىنىڭ دەڭگەيىندە COVID-19 سيمپتومسىز جانە جەڭىل تۇردە اۋىرعان ناۋقاستارعا, ىندەت جۇقتىرعاندارمەن بايلانىستا بولعاندارعا قاشىقتان باسقارۋ بويىنشا جۇمىس ۇيىمداستىرىلادى. كۆي جانە پنەۆمونيامەن اۋىراتىن ناۋقاستارعا ءۇي جاعدايىنداعى اۋرۋحانالار ۇيىمداستىرۋ, ولارعا اقىسىز ءدارى-دارمەكتەر بەرۋ قاراستىرىلعان.
«قالانىڭ بارلىق ەمحانالارىندا ءموبيلدى توپتاردىڭ جۇمىسى پاتسيەنتتەرگە ۇيگە بارۋ ارقىلى قىزمەت كورسەتۋ جۇمىسى ۇيىمداستىرىلدى. ىندەتكە كۇدىكتى ناۋقاستاردان كوروناۆيرۋستىق ينفەكتسياعا ۇيدەن پتر تەست الۋ قاراستىرىلعان. ولاردىڭ سانى 207-ءنى قۇرايدى», دەيدى باسقارما باسشىسىنىڭ ورىنباسارى ءاليا رۇستەموۆا.
سونداي-اق 50-دەن استام وكپەنى جاساندى تىنىستاندىرۋ اپپاراتى, 2 كومپيۋتەرلىك توموگراف, وكپەنىڭ زاقىمدانۋ پايىزىن كورۋگە مۇمكىندىك بەرەتىن 7 ساندىق رەنتگەن جۇيەسى, 3 وتتەگى رەزەرۆۋارى قوسىمشا ساتىپ الىنعان. قالانىڭ ەمدەۋ مەكەمەلەرىنە 500-دەن استام وتتەگى كونتسەنتراتورى, 250-گە جۋىق وكپەنى جاساندى تىنىستاندىرۋ اپپاراتى, 300-گە جۋىق فلوۋمەتر, 500 كوپفۋنكتسيونالدى ارنايى كەرەۋەت جەتكىزىلدى. 1600-گە جۋىق وتتەگى نۇكتەسى بار.
جالپى, COVID-19 كوروناۆيرۋستىق ينفەكتسيامەن كۇرەسۋدىڭ 3 كەزەڭىنە جوسپار قۇرىلعان. اتاپ ايتقاندا, 1-كەزەڭدە 5 مەديتسينالىق ۇيىمنىڭ بازاسىندا 1645 توسەكتىك ورىن ورنالاستىرۋ جوسپارلانۋدا. سونىمەن قاتار كوپسالالى مەديتسينالىق ۇيىمدار جەدەل قابىلداۋ جانە ناۋقاستاردى جوسپارلى تۇردە قابىلداۋدى جالعاستىرادى. 2-كەزەڭدە بىرقاتار رەسپۋبليكالىق كلينيكالاردا قوسىمشا 1500 توسەك ورنالاستىرۋ قاراستىرىلعان. ال 3-كەزەڭ توسەكتەردى تەك قالالىق اۋرۋحانالار مەن ەمحانالاردا عانا ەمەس, سونىمەن قاتار قوناقۇي كەشەندەرى مەن جاتاقحانالاردىڭ بەيىمدەلگەن بولمەلەرىندە ورنالاستىرۋ كوزدەلۋدە. سانيتارلىق دارىگەرلەردىڭ تەكسەرۋىنەن كەيىن بىرقاتار مەديتسينالىق ۇيىم «كوۆيدتىك اۋرۋحانالارعا» رەزەرۆتە تۇر.
ءاليا رۇستەموۆانىڭ ايتۋىنشا, مۇنىڭ بارلىعى 5600-دەي ورىن, ونىڭ 465-ءى – رەانيماتسيالىق ورىن.
جاقىن ارادا مەديتسينالىق جابدىقتاردان باسقا جىلجىمالى فليۋوروگرافيالىق كەشەندەر, تسيفرلى رەنتگەن جۇيەلەرى جانە جوعارى دالدىكتەگى جەلدەتكىشتەر دە كەلەدى. بۇگىندە ستاتسيونارلاردىڭ شامامەن 94%-ى وكپەنى جاساندى تىنىستاندىرۋ اپپاراتىمەن قامتاماسىز ەتىلگەن.