اقش جوعارعى سوتىنىڭ مۇشەسى رۋت بەيدەر گينزبۋرگ 87-گە قاراعان شاعىندا قايتىس بولدى. ونىڭ قاتەرلى ىسىككە شالدىعىپ, ناۋقاستانىپ جۇرگەنىنە ءبىراز ۋاقىت بولعان-دى.
گينزبۋرگ – اقش تاريحىنداعى جوعارعى سوت سۋدياسى اتانعان ەكىنشى ايەل. ول بۇل قىزمەتتى 1993 جىلدان اتقارىپ كەلدى. سول كەزدەگى اقش پرەزيدەنتى بيلل كلينتون ونى جوعارعى سوت سۋدياسى رەتىندە تاعايىندادى. گينزبۋرگ ايەل قۇقىعى مەن گەندەرلىك تەڭدىك ءۇشىن كۇرەسكەن سۋديا رەتىندە تانىلعان.
رۋت بەيدەر گينزبۋرگ 1933 جىلى نيۋ-يورك قالاسىندا دۇنيەگە كەلگەن. ول اقش-تىڭ بەدەلدى وقۋ ورىندارى كورنەلل, گارۆارد جانە كولۋمبيا ۋنيۆەرسيتەتتەرىندە ءبىلىم العان. وقۋىن اياقتاعان سوڭ ادۆوكات رەتىندە قىزمەت ەتىپ, ايەلدەردىڭ قۇقىعىن جانە ديسكريميناتسياعا تاپ بولعان ازاماتتاردىڭ قۇقىقتارىن قورعاۋمەن اينالىستى.