تۇرعىن ءۇي قۇرىلىس جيناق بانكى شاڭىراق "5-10-20" باعدارلاماسى بويىنشا نەسيە بەرە باستادى, دەپ حابارلايدى Egemen.kz
مەملەكەت باسشىسىنىڭ تاپسىرماسىنا سايكەس, باسپانالى بولۋدى ارمانداعان قازاقستاندىق ازاماتتارعا جەڭىلدەتىلگەن شارتتارمەن نەسيە بەرۋ ماقساتىندا ازىرلەنگەن.
"بيىل "شاڭىراق" قاناتقاقتى جوباسىن جۇزەگە اسىرۋ ءۇشىن بيۋدجەتتەن 210 ملرد تەڭگە كولەمىندە قاراجات ءبولۋ جوسپارلانعان. ونىڭ 90 ملرد تەڭگە كولەمىندەگى العاشقى بولىگى تۇرعىن ءۇي قۇرىلىس جيناق بانكىنە ءتۇستى. وسى بيۋدجەتكە سايكەس, ءبىز ەلىمىزدىڭ شامامەن 7-8 مىڭداي وتباسىن باسپانامەن قامتاماسىز ەتۋدى جوسپارلار وتىرمىز. جىلدىق مولشەرلەمەسى 5 پايىزعا تەڭ (جتسم 5,2%), جەڭىلدەتىلگەن زاەمدى الۋ ءۇشىن, باعدارلاما قاتىسۋشىلارى اكىمدىك كەزەگىندە تۇرۋلارى قاجەت. سونداي-اق تۇرعىن ءۇي قۇرىلىس جيناق بانكىندەگى شوتتارىنا زايم مولشەرىنىڭ 10 پايىزىنان كەم تۇسپەيتىن سومانى باستاپقى جارنا رەتىندە جيناۋلارى قاجەت. نەسيەلەندىرۋ مەرزىمى 20 جىلعا دەيىن", دەپ اتاپ ءوتتى تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا.
العاشقىلاردىڭ ءبىرى بولىپ نەسيە العان نۇر-سۇلتان تۇرعىندارى بولدى. ولاردىڭ اراسىندا سالىمشى ايتەنوۆا لاززات بار, ول تۇرعىن ۇيگە مۇقتاج دەپ جەرگىلىكتى اتقارۋشى ورگانداردا تىركەلگەن جانە كەزەگىن 10 جىل كۇتكەن. مەملەكەتتىك قىزمەتشى 18,49 ميلليون تەڭگەنىڭ 2 بولمەلى پاتەرىن ساتىپ الدى. وعان جىلدىق 5% مولشەرلەمەمەن نەسيە بەرىلدى. 20 جىلعا دەيىنگى مەرزىمگە نەسيە سوماسىنان كەمىندە 10% قۇرايتىن باستاپقى تولەممەن.
ەكىنشى باقىتتى نەسيە الۋشى – اكينوۆا گۇلدەن. قىرىق التى جاستاعى ايەل ەلورداداعى كوپسالالى مەديتسينالىق ورتالىقتا مەدبيكە بولىپ جۇمىس ىستەيدى. تۇرعىن ءۇي كەزەگى – 11 جىل. ەندى ونىڭ وتباسى دا جالدامالى پاتەردەن ءوز ۇيىنە اۋىسا الادى. 17 قىركۇيەكتەگى مالىمەتتەر بويىنشا بۇكىل قازاقستان بويىنشا بانك 21 039 ءوتىنىش قابىلدادى, ونىڭ 8 152-ءسى كەزەككە تىركەۋ جىلىنا سايكەس كەلەدى. قازىرگى ۋاقىتتا جالپى سوماسى 6 ميلليارد تەڭگەدەن استام 472 نەسيەلىك ءوتىنىم ماقۇلداندى.
"شاڭىراق" جوباسىنىڭ اياسىندا جەڭىلدەتىلگەن نەسيەنى ءبىرىنشى كەزەڭدە, باسپاناعا مۇقتاج جان رەتىندە 1986 جىلدان باستاپ 2015 جىلعا دەيىنگى مەرزىمدى قوسا العاندا اكىمدىك كەزەگىنە تۇرعان قازاقستان رەسپۋبليكاسىنىڭ ازاماتتارى الا الادى. وتىنىشتەردى قابىلداۋ مەرزىمى اياقتالعاننان كەيىن, بانكتىڭ "شاڭىراق" جوباسىن ودان ءارى نەسيەلەندىرۋگە قاجەتتى قاراجاتى بولعان جاعدايدا, باعدارلامانىڭ ەكىنشى كەزەڭىنە اكىمشىلىك كەزەگىنە كەيىنگى جىلدارى تۇرعان ازاماتتار دا شاقىرىلۋى مۇمكىن. سونداي-اق باعدارلاماعا قاتىسۋ ءۇشىن سوڭعى التى اي ىشىندەگى وتباسىنىڭ ءار مۇشەسىنە كەلەتىن وتباسىلىق تابىستىڭ ءبىر ايلىق كولەمى 3,1 كۇنكورىس مينيمۋمىنان اسپايتىن (2020 جىلدىڭ 1 ساۋىرىنەن باستاپ كم – 32 668 تەڭگەگە تەڭ) ەڭبەك جانە (نەمەسە) كاسىپكەرلىك قىزمەتتەن تۇسەتىن كىرىستىڭ (زەينەتاقى اۋدارىمدارىن, جەكە تابىس سالىعى مەن باسقا دا مىندەتتى اۋدارىمداردى ەسەپتەمەگەندە) بولۋى تالاپ ەتىلەدى. ياعني 2020 جىلى وتباسىنىڭ ءار مۇشەسىنە كەلەتىن تابىس كولەمى 101 271 تەڭگەدەن اسپاۋى ءتيىس.
اتالعان باعدارلاما بويىنشا تۇرعىن ءۇيدى تەك جاڭا سوعىلعان ۇيلەردەن عانا الۋعا بولادى. بۇل "5-10-20" باعدارلاماسى بويىنشا جەرگىلىكتى اكىمدىكتەر سوعىپ جاتقان نەسيەلىك تۇرعىن ۇيلەر مەن جەكە قۇرىلىس كومپانيالارى سوققان ۇيلەر (سونداي-اق, "تۇرعىن ءۇي قۇرىلىسىنا كەپىلدىك بەرۋ قورى" اق كەپىلدىگى بار).
"شاڭىراق" باعدارلاماسى بويىنشا پاتەر الۋعا بولاتىن قۇرىلىس كومپانيالارىنىڭ ءتىزىمىن hcsbk.kz سايتىنان جۇكتەپ الۋعا بولادى.
اكىمدىكتەر سالعان نەسيەلىك تۇرعىن ۇيلەردىڭ 1 شارشى مەترى بويىنشا كەلەسى باعا مولشەرلەرى بەلگىلەنگەن: 240 مىڭ تەڭگەگە دەيىن – الماتى قالاسىندا, 220 مىڭ تەڭگەگە دەيىن – نۇر-سۇلتان قالاسىندا, 200 مىڭ تەڭگەگە دەيىن – شىمكەنت قالاسى مەن الماتى ماڭىنداعى ايماقتاردا, 180 مىڭ تەڭگەگە دەيىن – اقتوبە, اتىراۋ, اقتاۋ, تۇركىستان, قاراعاندى قالالارى مەن قاراعاندى وبلىسىندا, باسقا وڭىرلەردە – 160 مىڭ تەڭگەگە دەيىن.
پاتەرلەر جەكە قۇرىلىس كومپانيالارى سوققان ۇيلەردەن ساتىپ الىنعان جاعدايدا ەڭ جوعارى زاەم سوماسى: نۇر-سۇلتان مەن الماتى قالالارىندا 18 ملن تەڭگە, اتىراۋ, اقتاۋ, اقتوبە, شىمكەنت, تۇركىستان, قاراعاندى قالالارى مەن قاراعاندى وبلىسىندا 15 ملن تەڭگەگە دەيىن, ال قالعان وڭىرلەردە 12 ملن تەڭگەگە دەيىنگى باعا ۇسىنىلعان.
اكىمدىكتەردە كەزەكتە تۇرعان ازاماتتاردان باعدارلاماعا قاتىسۋعا جانە تولەم قابىلەتتىلىگىن باعالاۋعا وتىنىمدەرىن تەك hcsbk.kz سايتى ارقىلى, سونىڭ ىشىندە تۇرعىن ءۇي قۇرىلىس جيناق بانكىنىڭ كليەنتتەرىنەن دە, ءالى كۇنگە دەيىن بانك كليەنتى بولماعانداردان دا قابىلدانادى.