كەشە ەلوردادا “قازاقستاننىڭ عارىشتىق ءداۋىرى: بۇگىنى, بولاشاعى جانە يننوۆاتسيالارى”, دەگەن تاقىرىپتا كونفەرەنتسيا ءوتتى. بۇل باسقوسۋعا حالىق قاھارمانى, “قازعارىش” ۇعا توراعاسى تالعات مۇساباەۆ, سونداي-اق, “نۇر وتان” حدپ استانا قالالىق فيليالى وكىلدەرى, پارلامەنت دەپۋتاتتارى, مينيسترلىكتەر مەن ۆەدومستۆولار قىزمەتكەرلەرى, “قازاقستان عارىش ساپارى” كومپانياسى وكىلدەرى قاتىستى.
يننوۆاتسيا ۇردىسىمەن تىعىز بايلانىستىرىلاتىن عارىش سالاسىن جەدەلدەتە دامىتۋ – بۇگىندە مەملەكەتتىڭ العا قويعان اۋقىمدى مىندەتتەرىنىڭ ەلەۋلىسى سانالادى. مەملەكەت باسشىسىنىڭ “قازاقستان-2030” ستراتەگياسى مەن قازاقستان حالقىنا ءداستۇرلى جولداۋلارىندا دا عارىشتىق زەرتتەۋلەردى ارتتىرۋ تۇرعىسىندا ناقتىلى ايتىلعان.
بۇگىندە وسى اۋقىمدى مىندەت ۇدەسىنەن شىعۋ سالا ماماندارىنا ۇلكەن جاۋاپكەرشىلىك جۇكتەپ وتىر. كونفەرەنتسيا بارىسىندا ءسوز العان “قازعارىش” ۇعا توراعاسى تالعات مۇساباەۆ عارىشتى زەرتتەۋ سالاسىنىڭ بۇگىنگى جاي-كۇيى, كەدەرگىلەرى مەن بولاشاعى توڭىرەگىندە ءوز وي-پايىمىمەن ءبولىستى. ونىڭ سوزىنە قاراعاندا, عارىش سالاسىنا قاجەتتى مامانداردى كوپتەپ شوعىرلاندىرۋ – بۇگىنگى كۇننىڭ ماڭىزدى تالابى بولۋى ءتيىس. بۇل رەتتە, جوعارى وقۋ ورىندارىندا عارىش سالاسىنا مامانداناتىن جاستاردى دايارلاپ, ولاردىڭ بىلىكتىلىگىن ارتتىرۋ باعىتىنداعى جۇمىستار جۇيەلى تۇردە جۇزەگە اسىرىلۋى قاجەت. “ماسەلەن, پرەزيدەنتتىڭ “بولاشاق” مەملەكەتتىك باعدارلاماسى نەگىزىندە الىس جانە جاقىن شەتەلدەردىڭ جوعارى وقۋ ورىندارىندا عارىش سالاسى ماماندارىن دايارلاۋ بۇدان كەيىن دە جالعاسىن تابۋى ءتيىس. مۇنداي يگى ۇدەرىس ءوز ەلىمىزدە دە بار. ماسەلەن, جاقىن بولاشاقتا ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتى مەن ءال-فارابي اتىنداعى قازاق ۇلتتىق ۋنيۆەرسيتەتىندە عارىش سالاسىنىڭ بىلىكتى ماماندارى دايارلانىپ شىعادى. بۇعان بارلىق مۇمكىندىك بار”, دەيدى تالعات مۇساباەۆ.
باسقوسۋدا سونداي-اق, اگەنتتىكتىڭ اۋقىمدى ءارى ماڭىزدى جوبالارىن ءتيىمدى قارجىلاندىرۋ, عارىشتىق, عىلىمي-تەحنولوگيالىق ءبىلىم ماسەلەلەرى دە تالقىعا ءتۇستى.
ءلايلا ەدىلقىزى.