ەلوردادا قانشا كاسىپكەر گرانت ۇتىپ الۋعا ءوتىنىم بەردى؟

"بيزنەستىڭ جول كارتاسى" باعدارلاماسى بويىنشا ەلوردا اكىمدىگىنەن گرانت الۋعا ارنالعان بيزنەس-جوبالاردى قاراۋ كەزەڭى اياقتالۋدا. بيىل بايقاۋعا بەرىلگەن 599 ءوتىنىمنىڭ 563-ءى قارالدى.

"بۇگىن "بيزنەستىڭ جول كارتاسى" شەڭبەرىندە گرانت الۋعا ۇمىتكەر جوبالاردى بايقاۋ كوميسسياسى قاراۋىنىڭ سوڭعى كۇنى. اپتانىڭ باسىنان بەرى 443 جوبا قارالىپ, 120-سى قالدى. بايقاۋعا 563 جوبا قاتىسۋدا. بارلىعى قالا تۇرعىندارىنان 599 ءوتىنىش بەرىلدى, بىراق سونىڭ 36-سى باعدارلاما شارتتارىنا سايكەس كەلمەگەندىكتەن قاتىسۋدان شەكتەلدى", دەدى ەلوردالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ كاسىپكەرلىكتى دامىتۋ ءبولىمىنىڭ باس مامانى ادىلەت تىلەپوۆ.

جوبالار بايقاۋعا قاتىسۋشىلار دايىنداعان بەينەروليكتەر مەن بيزنەس-جوسپارلارعا سايكەس باعالانادى. بيىل كونكۋرستىق كوميسسيانىڭ بارلىق وتىرىستارى ونلاين رەجىمدە ءوتىپ, YouTube ارناسىندا تىكەلەي ەفيردە كورسەتىلەدى. بارلىق جوبالاردى قاراپ شىققاننان كەيىن كوميسسيا مۇشەلەرى ۇپايلاردى ەسەپتەيدى. ناتيجە مەن گرانت يەگەرلەرىنىڭ اتى-ءجونى كەلەسى اپتا ىشىندە بەلگىلى بولادى.

ەستەرىڭىزگە سالا كەتەيىك, بيىل "بيزنەستىڭ جول كارتاسى" شەڭبەرىندە گرانتتىق قارجىلاندىرۋعا 260 ميلليون تەڭگە ءبولىندى, سونىڭ 60 ميلليونى 30 جاسقا دەيىنگى كاسىپكەرلەرگە ارنالعان. بۇل رەتتە, گرانت مولشەرى 2-دەن 5 ميلليون تەڭگەگە دەيىن بەلگىلەندى.

ايتا كەتەيىك, "بيزنەستىڭ جول كارتاسى" باعدارلاماسى قازاقستاندا 2010 جىلدان بەرى جۇمىس ىستەيدى. ونىڭ ءبىر باعىتىن اكىمدىكتەر قاداعالايدى. جەرگىلىكتى اتقارۋشى ورگاندار بيزنەسكە گرانتتار مەن ينفراقۇرىلىمدىق قولداۋ ارقىلى كومەك كورسەتەدى. گرانت بەرۋ كونكۋرستارىنا كاسىپكەرلەر دە, ءوز ءىسىن اشقىسى كەلەتىن قازاقستاندىقتار دا, ونىڭ ىشىندە ايەلدەر, مۇمكىندىگى شەكتەۋلى جاندار مەن 50 جاستان اسقان ادامدار دا قاتىسا الادى.