شارباقتى اۋدانى ەسىلباي اۋىلىنىڭ بەلسەندى جاستارى زەينەتكەرگە ەكى بولمەلى ءۇي سالىپ بەردى, دەپ حابارلايدى Egemen.kz رavlodarnews.kz سايتىنا سىلتەمە جاساپ.
"66 جاستاعى گۇلناش اپامىز جالعىز تۇرادى. ەسىلباي اۋىلىندا ءۇيى بولعان ەدى. وتكەن جىلى ءبىر بولمەسىنىڭ شاتىرى ءتۇسىپ كەتكەن جانە جوندەۋگە كەلمەيدى. ول ءوزى ەشكىمنەن كومەك سۇراپ, جۇگىنگەن ەمەس. زەينەتكەرگە اۋىل جاستارى وزدەرى ءۇي سالىپ بەرۋگە نيەت ءبىلدىردى. باستاپقىدا اپامىز ۇيالىپ, باس تارتقان بولاتىن. بىرلىگى جاراسقان جاستار قىسقا ۋاقىتتىڭ ىشىندە باسپانا تۇرعىزىپ بەردى. وسى اپتانىڭ اياعىندا ەسىگىن سالىپ, اقتاۋ جۇمىستارىن اياقتايدى", دەيدى شارباقتى اۋدانى ىشكى ساياسات جانە تىلدەردى دامىتۋ ءبولىمىنىڭ باسشىسى سەرجان يمانقۇلوۆ.
ساۋابى مول يگى ىسكە بىلەك ءتۇرىپ, جۇمىلا كىرىسكەن 30 شاقتى ادام قۇرىلىس ماتەريالدارى مەن كەرەك-جاراق ساتىپ العان. بۇعان قوسا, زەينەتكەرگە جايلى جاعداي جاساۋ ءۇشىن توڭازىتقىش, گاز پليتاسى جانە كىر جۋاتىن ماشينا سياقتى تۇرمىستىق تەحنيكالاردى ساتىپ الىپ بەرمەك.
"ەكى جىلدان بەرى تۇرىپ جاتقان اكە-شەشەمنىڭ ءۇيىنىڭ توبەسىنە جوندەۋ جۇمىستارىن جۇرگىزۋ كەرەك بولاتىن. مەن ەشكىمگە سالماق سالىپ, كومەك سۇراعىم كەلمەدى. اركىمنىڭ ءوز وتباسى مەن جۇمىسى بار. بىراق جاستاردىڭ وزدەرى قولقا سالىپ, كومەك كورسەتۋگە نيەت بىلدىرگەن سوڭ مەسەلىن قايتارعىم كەلمەدى. اۋلانىڭ ىشىنەن ءۇي سالىپ, ەلەكتر سىمدارىن تارتتى, قۇرىلىستى اياقتاۋعا تاياپ قالدى. قۇربان ايت مەرەكەسىندە دە نازاردان تىس قالدىرماي, كومەك كورسەتىپ تۇرادى. ولاردىڭ بۇل ىستەرىنە ريزاشىلىعىمدى بىلدىرەمىن. اللا رازى بولسىن! وزگەلەرگە جاساعان جاقسىلىقتارى وزدەرىنە ەسەلەنىپ قايتسىن", دەيدى زەينەتكەر.