بۇگىندە الماتى وبلىسىنىڭ ينۆەستيتسيالىق پورتفەلىندە 2029 جىلعا دەيىن جۇزەگە اساتىن 469 جوبا بار. بۇل دەگەنىڭىز 4,9 ترلن تەڭگە قارجى جۇمسالاتىن جەكە باستامانىڭ ءسوز جۇزىنەن شىندىققا اينالۋىنا جول اشىلادى دەگەندى بىلدىرەدى. ەگەر وسى جوبالار ساتىمەن ىسكە اسسا, وبلىستا 44 000 ادامعا تۇراقتى جۇمىس ورنى اشىلادى, - دەپ حابارلايدى Egemen.kz.
جانە مۇنىڭ ءبارى قۇر قيال ەمەس, ناقتى ىسكە ۇلاسقان باستامالار ەكەنى قۋانتادى. بۇيىرسا, الداعى 2-3 جىل ارالىعىندا جەكە ينۆەستورلاردىڭ ءىسى جەمىسىن بەرە باستاماق. دەرەك بويىنشا, قازىر ايماقتا 279 جوبا ناقتى ىسكە ۇلاسىپ, اياقتالۋ ساتىسىنا جاقىن قالعان. قۇيىلعان قاراجاتتىڭ جالپى كولەمى 3,2 ترلن تەڭگە شاماسىندا ەكەن. بۇل نەگىزىنەن وڭدەۋ ونەركاسىبى سالاسىنا قاتىستى جوبالار بولىپ وتىر. ناتيجەسىندە 21 000 جۇمىس ورنى اشىلادى. قازىر وڭىردە ترانسۇلتتىق كومپانيالاردىڭ قاتىسۋىمەن 9 جوبا ىسكە اسىرىلىپ جاتىر. تارتىلعان ينۆەستيتسيا كولەمى 140 ملرد تەڭگەنى قۇرادى. ايتپاقشى, الماتى وبلىسىنداعى اتالعان 9 جوبا جالپى ەلىمىز بويىنشا ترانسۇلتتىق كومپانيالاردىڭ قاتىسۋىمەن ىسكە اسقان 19 جوبانىڭ ماڭدايالدىسى. ياعني, جوعارداعى يگى جاقسى ينۆەستوردىڭ جەتىسۋعا ءجيى مويىن بۇراتىندىعىنىڭ ءبىر دالەلى وسى بولسا كەرەك. ناتيجەسىندە «لۋكويل» كومپانياسى,«WILO Central Asia» كومپانياسى, «Eneverse Kunkuat» كومپانياسى, «كۋمسۋات فارم» كومپانياسى, «Alugal» كومپانياسى, «مارەۆەن فۋد تيان-شان» كومپناياسى, «يمپەريا فۋد» كومپانياسى, «KIF Warehouses» كومپانياسى سياقتى الەم نارىعىنا تانىمال, ونىمدەرى جوعارى سۇرانىسقا يە الپاۋىتتاردىڭ ءوندىرىسى جۇمىس ىستەپ تۇر. ولار الماتى وبلىسىنىڭ ەكونوميكاسىنا قارجى قۇيۋمەن شەكتەلىپ قالماي, وتاندىق مۇناي-گاز ونەركاسىبى, فارماتسەۆتيكا, اگروونەركاسىپ كەشەنى مەن باسقا دا سالاداعى ءوندىرىستىڭ دامۋىنا سەرپىن بەرگەنى انىق.
ال ءوڭىردىڭ دامۋىنا وزىندىك ۇلەس قوسىپ وتىرعان مەملەكەت پەن جەكەمەنشىك اراسىنداعى ارىپتەستىكتىڭ دە ماڭىزى زور. اسىرەسە, ىشكى ينۆەستورلاردىڭ ءيىنىن جۇمسارتىپ, ەكونوميكانىڭ دامۋى مەن الەۋمەتتىك باعىتتاعى ماسەلەلەردى شەشۋگە كوندىرۋ يگلىكتى ءىس ەكەنىن انىق. دەمەك, ءدال وسى باعىتتا الماتى وبلىسىندا اتقارىلعان ءىستىڭ ساۋابى مول. ماسەلەن, قازىر وبلىستىڭ قورجىنىندا مەملەكەتتىك-جەكەمەنشىك ارىپتەستىك اياسىندا جالپى سوماسى 84 ملرد تەڭگە بولاتىن 51 جوبا بار ەكەن. ونىڭ ىشىندە قۇنى 54 ملرد تەڭگە بولاتىن 30 جوبا بويىنشا كەلىسىمشارت جاسالعان. ال تارتىلعان ينۆەستيتسيا كولەمى 27 ملرد تەڭگەنى قۇرايدى.
دەرەك بويىنشا, مەملەكەت پەن جەكەمەنشىك اراسىنداعى ارىپتەستىك اياسىندا 22 نىسان ىسكە قوسىلعان. ونىڭ ىشىندە 15 جوبا ءبىلىم سالاسىنا قاتىستى ەكەن. جالپى, جەكەمەنشىك تاراپىنان الەۋمەتتىك نىسانداردىڭ قۇرىلىسىنا قارجى سالۋ دەرەگىنىڭ كوبەيۋى قۇپتارلىق جاعداي. اتاپ ايتقاندا, ءوڭىردىڭ مەديتسينالىق مەكەمەلەرىنە اقپاراتتىق جۇيەلەر كەشەنىن ەنگىزۋگە ىنتا بىلدىرگە نينۆەستورلاردىڭ قادامى دەنساۋلىق ساقتاۋ سالاسىن تسيفرلاندىرۋ ماقساتىنداعى ماڭىزدى جوبا بولدى. وسى جوبانىڭ اياسىندا تالدىقورعان قالالىق كوپ سالالى اۋرۋحاناسىنىڭ بازاسىندا جوعارى ونىمدىلىكتى سەرۆەرلەر ارقىلى مالىمەتتەردى وڭدەيتىن جاعداياتتىق ورتالىق قۇرىلدى. سەرۆەر ءوڭىردىڭ 13 مەديتسينا مەكەمەسىندە جاسالعان بارلىق رەنتگەندىك زەرتتەۋلەر ءبىر جەرگە جيناقتاپ, ساقتاي الادى. بۇل ءوز كەزەگىندە ناۋقاستىڭ دياگنوزىن ەرتە انىقتاۋعا مۇمكىندىك بەرىپ, ەكىنشى جاعىنان راديولوگ دارىگەردىڭ جەتىسپەۋشىلىگى ماسەلەسىن شەشۋگە ىقپال ەتەدى. وسىلايشا, دەنساۋلىق ساقتاۋ سالاسىن تسيفرلاندىرۋ جاساندى ينتەللەكتى ناقتى تاجىريبەدە قولدانۋ مەن وزىق عىلىمي جەتىستىكتەردى پايدالانۋعا جول اشتى. سونىڭ ناتيجەسىندە ونكولوگيالىق اۋرۋلاردى دياگنوستيكالاۋدا وكپە جانە ءسۇت بەزى راگىن ەرتە باستان انىقتاۋ 13 پايىزدان 60 پايىزعا دەيىن ارتقان. ياعني, ەرتە كەزەڭنەن دياگنوستيكالاۋ ءىسىنىڭ حالىقتىڭ ءومىر ءسۇرۋ ۇزاقتىعىن ارتتىرۋداعى ماڭىزى زور. سونداي-اق, قاراساي اۋدانىندا زاماناۋي تەحنولوگيامەن جابدىقتالعان مەديتسينالىق زەرتحانا مەن تالعار اۋدانىندا اشىلعان 60 ورىندىق وڭالتۋ ورتالىعى دا ەكى جاقتى ارىپتەستىكتىڭ ناقتى دالەلى بولىپ وتىر.
مەملەكەت پەن جەكەمەنشىك ارىپتەستىنىڭ الەۋەتى وڭىردەگى سپورت سالاسىنىڭ ينفراقۇرىلىمىن دامىتۋعا دا وڭ اسەرىن تيگىزدى. جوبا قولعا الىنعالى بەرى وبلىستا سپورت باعىتىندا جالپى سوماسى 22 ملن تەڭگە بولاتىن 5 جوبا جۇزەگە اسىرىلدى. وبلىستىڭ ءار تۇكپىرىندە سالىنعان دەنە شىنىقتىرۋ-ساۋىقتىرۋ جانە سپورت كەشەندەرى ءار ءتۇرلى جاستاعى تۇرعىنداردىڭ, الەۋمەتتىك ءالجۋاز توپتاردىڭ, اۋىل تۇرعىندارىنىڭ سپورتتىق ينفراقۇرىلىم نىساندارىنا قولجەتىمدىلىگىن ارتتىردى. سول سياقتى سپورتپەن اينالىساتىن, سالاماتتى ءومىر سالتىن ۇستاناتىن تۇرعىندار قاتارىنىڭ ارتۋىنا جاعداي جاسادى. سولاردىڭ قاتارىنداعى ەڭ ءىرى جوبالاردىڭ ءبىرى – وبلىس ورتالىعىندا سالىنعان وليمپيالىق تيپتەگى جابىق ءجۇزۋ باسسەينى. جوبانىڭ قۇنى 13 ملرد تەڭگەدەن اسادى, جالپى الاڭى 27 مىڭ شارشى مەتر. نىسان جۇزۋدەن, اكۆااەروبيكادان, سۋ دوبىنان, سۋعا سەكىرۋدەن وقۋ-جاتتىعۋلارىن وتكىزۋگە ارنالعان. سونىمەن قاتار مۇمكىندىگى شەكتەۋلى ازاماتتاردىڭ جاتتىعۋىنا دا جاعداي جاسالعان.
ال بيىل الماتى وبلىسىندا جالپى سوماسى 30 ملرد تەڭگەدەن اساتىن 21 جوبا ىسكە اسۋى ءتيىس. سونىڭ ىشىندە ءبىلىم سالاسىندا قۇنى 2,5 ملرد تەڭگەنى قۇرايتىن 21 جوبا بولسا, دەنساۋلىق ساقتاۋ مەن ەنەرگەتيكا سالالارىندا 16,6 ملرد تەڭگە كولەمىندەگى 6 جوبا بار. جانە قۇنى 2,4 ملرد تەڭگە بولاتىن ەكى جوبا سپورت سالاسىنا قاتىستى ەكەن. سول سياقتى,تۋريزم, مادەنيەت, قاۋىپسىزدىك سالاسى بويىنشا دا ەكى جاقتى ارىپتەستىك ورناپ, 10 ملرد تەڭگەگە جۋىق قارجى يگەرىلمەكشى.