ۇكىمەت جولداۋدى ىسكە اسىرۋ جونىندەگى جالپىۇلتتىق جوسپاردى قابىلدادى

ۇلتتىق ەكونوميكا ءمينيسترى ر. دالەنوۆ ۇسىنعان جالپىۇلتتىق جوسپار (جۇج) مەملەكەت باسشىسى بەلگىلەگەن نەگىزگى باعىتتار بويىنشا 143 تارماقتان تۇرادى, ونىڭ ىشىندە "مەملەكەتتىك باسقارۋدىڭ جاڭا مودەلى"  – 10 تارماق, "جاڭا جاعدايداعى ەكونوميكالىق دامۋ" – 42 تارماق, "تەڭگەرىمدى اۋماقتىق دامۋ" – 2 تارماق, "ازاماتتاردىڭ الەۋمەتتىك ءال-اۋقاتى – باستى باسىمدىق" – 10 تارماق, "قولجەتىمدى جانە ساپالى ءبىلىم بەرۋ" – 16 تارماق, "دەنساۋلىق ساقتاۋ جۇيەسىن دامىتۋ" – 10 تارماق, "ەكولوگيا جانە بيوالۋانتۇرلىلىكتى قورعاۋ" – 8 تارماق, "ازاماتتاردىڭ مۇددەلەرىن قورعاۋداعى ادىلەتتى مەملەكەت" – 30 تارماق, "تسيفرلاندىرۋ – بارلىق رەفورمالاردىڭ بازالىق ەلەمەنتى" – 8 تارماق, "مەملەكەتتى باسقارۋعا ازاماتتىق قاتىسۋ" – 7 تارماق.

پرەمەر-مينيستر ۇكىمەتتىڭ باستى مىندەتى حالىقتىڭ ءال-اۋقاتىن ارتتىرۋ, ەكونوميكانى دامىتۋ جانە تۇراقتى جۇمىس ورىندارىن قۇرۋ ەكەنىن اتاپ ءوتتى. بيۋدجەتتىك جوسپارلاۋدىڭ جاڭا جۇيەسىندە ۇلتتىق باسىمدىقتار قامتاماسىز ەتىلەدى جانە بيۋدجەتتەن تىس قورلاردىڭ قاراجاتىن ەسكەرە وتىرىپ, "كەڭەيتىلگەن بيۋدجەت" ەنگىزىلەدى. ازاماتتاردىڭ الەۋمەتتىك ءال-اۋقاتىن قامتاماسىز ەتۋ ماقساتىندا تۇرعىن ۇيگە قولجەتىمدىلىكتى كەڭەيتۋ, قولايلى وتباسىلىق-دەموگرافيالىق جاعدايلار جاساۋ, ەكولوگيانى, ءبىلىم بەرۋ ساپاسىن جاقسارتۋ, سونداي-اق دەنساۋلىق ساقتاۋ جۇيەسىن جەتىلدىرۋ جونىندە شارالار قابىلدانادى.

"بۇگىن تانىستىرىلعان مەملەكەت باسشىسىنىڭ جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارى العا قويىلعان مىندەتتەرگە ساي كەلەدى. پرەزيدەنت جوسپاردى بەكىتكەننەن كەيىن بارلىق مەملەكەتتىك ورگاندار مەن اكىمدىكتەر ونى دەرەۋ ورىنداۋعا كىرىسۋى ءتيىس", — دەدى ا. مامين.  

ۇكىمەت باسشىسى ورتالىق جانە جەرگىلىكتى اتقارۋشى ورگانداردىڭ ءبىرىنشى باسشىلارى جوسپار ءىس-شارالارىنىڭ ساپالى ءارى ۋاقىتىلى ورىندالۋىن قامتاماسىز ەتۋى ءتيىس ەكەنىن اتاپ ءوتتى. "بىزدەن جەدەلدىك پەن ناقتى ناتيجە تالاپ ەتىلەدى", — دەپ تۇيىندەدى ا. مامين.