اۋىل شارۋاشىلىعى ءمينيسترىنىڭ ءبىرىنشى ورىنباسارى ايداربەك ساپاروۆ ورتالىق كوممۋنيكاتسيالار قىزمەتىندە وتكەن بريفينگتە 2020 جىلعى ەگىن جيناۋ جۇمىستارىنىڭ بارىسى جايىندا ايتىپ بەردى, دەپ حابارلايدى Egemen.kz.
"بيىل اۋىل شارۋاشىلىعى داقىلدارىنىڭ جالپى ەگىس الاڭى 22,7 ملن گا قۇرادى. 2019 جىلمەن سالىستىرعاندا 439,2 مىڭ گا ارتىق, ونىڭ ىشىندە ءداندى جانە بۇرشاقتى داقىلدار الاڭى 15,8 ملن گەكتاردى قۇرايدى. وسى جىلعى ماۋسىم ەرەكشە بولدى. ەگىس ناۋقانى قاتاڭ كارانتين رەجيمىندە ءوتتى, سونىمەن قاتار جاز ماۋسىمى, وتكەن جىل سياقتى, قۇرعاق بولدى", - دەدى ايداربەك ساپاروۆ.
ونىڭ ايتۋىنشا, توتەنشە جاعداي رەجيمىنە قاراماستان, ەگىس ناۋقانى ساپالى جۇرگىزىلگەن.
"ساپالى ەگىس ماتەريالدارىمەن, ارزانداتىلعان تىڭايتقىشتارمەن, وسىمدىكتەردى قورعاۋ قۇرالدارىمەن قامتاماسىز ەتۋ, سونداي-اق تەحنيكالىق جاراقتاندىرۋدى ارتتىرۋ بويىنشا ۋاقىتىلى قابىلدانعان شارالار قاتاڭ كليماتتىق جاعدايدىڭ اسەرىن جۇمسارتۋعا مۇمكىندىك بەردى. ەگىن جيناۋ جۇمىستارى ۋاقىتىلى باستالدى. قازىر ول رەسپۋبليكانىڭ بارلىق وڭىرلەرىندە جۇرگىزىلىپ جاتىر. ەگىن جيناۋ ناۋقانىنىڭ قارقىنى وتكەن جىلعىدان جوعارى", - دەدى ول.
ۆيتسە-ءمينيستردىڭ سوزىنە سۇيەنسەك, ءداندى داقىلداردى جيناۋ جامبىل وبلىسىندا اياقتالعان, تۇركىستان جانە باتىس قازاقستان وبلىستارىندا اياقتالۋ ساتىسىندا.
"جەدەل دەرەكتەرگە سايكەس بۇگىنگى كۇنى رەسپۋبليكا بويىنشا بارلىعى 10,5 ملن گەكتار ءداندى جانە ءداندى-بۇرشاقتى داقىلدار نەمەسە ولاردىڭ جالپى جيناۋ الاڭىنىڭ 66% جينالدى, وتكەن جىلدىڭ سايكەس كۇنىندە 5,3 ملن گا نەمەسە 35% جينالعان بولاتىن. ورتاشا ونىمدىلىك 11,7 تس/گا قۇراپ, 12,2 ملن توننا استىق باستىرىلدى. بۇگىنگى تاڭدا ءبىزدىڭ الدىمىزدا تۇرعان ەڭ باستى مىندەت - وسىرىلگەن ەگىندى شىعىنسىز جيناۋ",- دەدى ا.ساپاروۆ.
وسى ورايدا ول رەسپۋبليكادا ەگىن جيناۋ جۇمىستارىن جۇرگىزۋ ءۇشىن بارلىق قاجەتتى تەحنيكانىڭ بارىن ايتىپ ءوتتى.
"جۇمىستىڭ ۇزاق توقتاۋىن بولدىرماۋ ماقساتىندا جوندەۋ بريگادالارى قۇرىلدى, سەرۆيستىك كومپانيالارمەن ولاردىڭ كوشپەلى سەرۆيستى كۇشەيتۋ, سونداي-اق قويمالاردى قاجەتتى قوسالقى بولشەكتەرمەن تولتىرۋ بويىنشا جۇمىس جۇرگىزىلدى. ەگىن جيناۋ جۇمىستارىن ۋاقتىلى جۇرگىزۋ ءۇشىن اۋىل شارۋاشىلىعى تاۋارىن وندىرۋشىلەرگە 395 مىڭ توننا ارزانداتىلعان جانار-جاعارماي ءبولىندى", - دەدى ۆيتسە-مينيستر.