باس پروكۋرور عيزات نۇرداۋلەتوۆ پاۆلودار وبلىسىنا بارىپ, سوتقا دەيىنگى تەرگەپ-تەكسەرۋ ساتىسىنداعى نەگىزگى شەشىمدەردى كەلىسۋ بويىنشا پيلوتتىق جوبانىڭ ىسكە اسىرىلۋ بارىسىمەن تانىستى, دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.
"بۇل جوبا پرەزيدەنتتىڭ جولداۋىندا ايتىلعان ازاماتتاردىڭ كونستيتۋتسيالىق قۇقىقتارىنا اسەر ەتەتىن شەشىمدەردى 2021 جىلدان باستاپ پروكۋرورلارمەن كەلىسۋ تۋرالى تاپسىرمانى ورىنداۋ اياسىندا ەنگىزىلۋدە. قاناتقاقتى جوبا بارىسىندا كەلىسۋ ەلەكتروندى فورماتتا جۇرگىزىلەدى, بۇل بۇزۋشىلىقتاردىڭ دەرەۋ جولىن كەسۋدى قامتاماسىز ەتەدى جانە جازىقسىز ازاماتتاردى قىلمىستىق پروتسەسس شەڭبەرىنە تارتۋعا جول بەرمەيدى. قازىرگى ۋاقىتتا مۇنداي مەحانيزم پاۆلودار وبلىسى مەن شقو-دا سىناقتان وتكىزىلۋدە.
بيىل 1 قازاننان باستاپ وعان ەلىمىزدىڭ بارلىق وڭىرلەرى قوسىلادى. وسىعان بايلانىستى اۋماقتىق پروكۋراتۋرالار باسشىلارىنا زاڭدىلىقتى بۇزۋدىڭ جولىن كەسۋ جانە كىنالى ادامداردى جاۋاپكەرشىلىككە تارتۋ جونىندە تولىق شارالار قابىلداۋ تۋرالى مىندەت قويىلدى.
سونىمەن قاتار ساپار اياسىندا باس پروكۋرور وبلىس اكىمى جانە ءوڭىردىڭ قۇقىق قورعاۋ ورگاندارىنىڭ باسشىلىق قۇرامىنىڭ قاتىسۋىمەن قىلمىسقا قارسى كۇرەس جانە قۇقىق بۇزۋشىلىقتىڭ الدىن الۋ ماسەلەلەرى بويىنشا كەڭەس وتكىزدى", دەلىنگەن حابارلامادا.