ەل پرەزيدەنتىنىڭ بىزدەر, ياعني ۇستازدار قاۋىمى ءۇشىن اسا ماڭىزدى سانالاتىن ءبىلىم كۇنىندە جاريالاعان جولداۋىن ەرەكشە ىقىلاسپەن قابىلدادىم. الەمدە ورىن العان پاندەميا جاعدايىنا بايلانىستى «ەندى نە بولار ەكەن؟» دەگەندەي ءارى-ءسارى كۇيدە وتىرعانىمىزدا جولداۋدىڭ ەرتەڭىمىزگە دەگەن سەنىمىمىزدى ارتتىرىپ, بەت العان باعدارىمىزدى ايقىنداي تۇسكەنى انىق.
كۇندەلىكتى قوعامدا كەڭىنەن تالقىلانىپ, الاڭداتىپ جۇرگەن ماسەلەلەردىڭ وسى جولداۋدا كوتەرىلۋى, پرەزيدەنتتىڭ قوعام تىنىسىن ءجىتى باقىلاپ وتىرعانىن اڭعارتادى. بۇل ءوز كەزەگىندە حالىق پەن بيلىكتى جاقىنداتا تۇسەدى.
«اشىعىن ايتقاندا, ءالى كۇنگە دەيىن ناقتى ءبىر ونلاين-پلاتفورما جوق. مۇعالىمدەر, وقۋشىلار جانە اتا-انالار كۇندىز-ءتۇنى «WhatsApp»-تان باس كوتەرمەيتىن بولدى», دەگەن پرەزيدەنت ورىن العان جاعدايدى ءدوپ باستى. ول وسى ورايدا, تولىققاندى وقۋ ۇدەرىسى ءۇشىن قاجەتتى بارلىق فۋنكتسيالارى بار بىرىڭعاي ونلاين ءبىلىم بەرۋ پلاتفورماسىن شۇعىل ازىرلەۋ قاجەت ەكەنىن اتاپ كورسەتتى.
اۋدان ورتالىعىنداعى باستاۋىش مەكتەپتىڭ مۇعالىمى ءارى كوپبالالى انا رەتىندە مەنى قالالىقتارعا قاراعاندا اۋىل بالالارىندا ساپالى ءبىلىم رەسۋرستارى مەن تەحنولوگيالارعا دەگەن قولجەتىمدىلىكتىڭ تومەندىگى ۇنەمى الاڭداتاتىن. ماسەلەن, مەنىڭ شاكىرتتەرىمنىڭ اراسىندا ونەرتاپقىشتىقپەن اينالىسىپ, ءوز قولدارىمەن ءتۇرلى تىڭ دۇنيەلەر جاساعىسى كەلەتىندەر كوپ. ولاردىڭ ءبىرازى ءوز بەتتەرىنشە ىزدەنىپ, قولدا بار قۇرالدارمەن جاڭا دۇنيەلەر جاساپ تا ءجۇر. دەگەنمەن, «بولام دەگەن بالانىڭ بەلىن بۋىپ», باعىت-باعدار كورسەتەتىن بىلىكتى مامان, ارنايى ۇيىرمە, زەرتحانالار بولسا دەيمىز.
وسى ورايدا مەملەكەت باسشىسى كۇندەلىكتى ماسەلەلەردى شەشۋمەن قاتار, بالالاردىڭ بارىنە بىردەي مۇمكىندىك تۋعىزۋ ءۇشىن جۇيەلى شارالار قابىلداۋ قاجەت ەكەنىن, بالالارىمىز قاي جەردە تۇرسا دا, قانداي تىلدە وقىسا دا ساپالى ءبىلىم الۋى كەرەك ەكەنىن ورىندى كوتەردى.
ۇستاز بولعان سوڭ وقۋشىلاردىڭ اراسىنداعى الەۋمەتتىك تەڭسىزدىكتەرگە قاتىستى تۋىنداعان ءتۇرلى ماسەلەلەرگە كۋا بولاتىنىمىز جاسىرىن ەمەس. پرەزيدەنتتىڭ ءبىلىم سالاسىنداعى جۇمىستى «قولجەتىمدى ءارى ساپالى ءبىلىم» قاعيداسىنا باعىندىرۋى وتە دۇرىس دەپ بىلەمىن. ويتكەنى پرەزيدەنتتىڭ ايتۋىنشا, مەملەكەتتىڭ تەك دارىندى وقۋشىلاردى قولداۋى بالالار اراسىندا الەۋمەتتىك اراجىكتى ۇلعايتۋى مۇمكىن. بۇعان جول بەرۋگە بولمايدى. مەملەكەت قاراپايىم مەكتەپتەرگە قولداۋ كورسەتەدى. بۇل قادام قالا مەن اۋىل اراسىنداعى ءبىلىم بەرۋ سالاسىنداعى الشاقتىقتى قىسقارتۋعا جول اشادى.
پرەزيدەنتتىڭ جولداۋدا كوتەرگەن ءبىلىم سالاسىنا قاتىستى ماسەلەلەردەن وزگە, اۋىل تۇرعىنى بولعاندىقتان, اۋىل-ايماقتى دامىتۋعا قاتىستى ايتقاندارى دا ەرەكشە نازارىمىزدى اۋداردى. اۋىلدىڭ الەۋەتىن پايدالانۋ ستراتەگيالىق ماڭىزدى ماسەلە ەكەنىن مەملەكەت باسشىسى جاقسى ءتۇسىنىپ وتىر. وسى رەتتە اۋىل-ايماعىمىزدا وڭ وزگەرىستەر جاسالىپ جاتقانىن ايتا كەتكىم كەلەدى. اۋىلىمىزدا اۋىز سۋ ماسەلەسى شەشىلگەن. بۇرىن الىستان شەلەكتەپ تاسيتىن سۋىمىز, بۇگىندە ەسىك الدىندا شۇمەكتەن اعىپ تۇر. ەندى اۋىلىمىز گازبەن قامتىلماق. ول ءۇشىن ارنايى قۇبىرلار جۇرگىزىلىپ تە قويدى. بۇيىرسا, كوگىلدىر وتىن ارقىلى اۋىل ماڭىنداعى ورمان-توعاي وتىنعا شابىلماي, جايقالاتىن كۇن دە الىس ەمەس.
پرەزيدەنت ءسوزىنىڭ تۇيىنىندە ەندىگى مىندەت حالقىمىزدىڭ جاڭا بولمىسىن قالىپتاستىرۋ, تۇتاس ۇلت ساپاسىن ارتتىرۋ ەكەنىن اتاپ ءوتتى. وسى مىندەتتى جۇزەگە اسىرۋ ءۇشىن ءاربىرىمىز اتسالىسۋىمىز قاجەت. بۇل ۇرپاق تاربيەسىمەن اينالىسىپ وتىرعان ۇستازدار قاۋىمىنا ۇلكەن جاۋاپكەرشىلىك جۇكتەيدى.
تامارا ناحىپ,
ء«شاۋىلدىر» باستاۋىش مەكتەبىنىڭ مۇعالىمى
تۇركىستان وبلىسى,
وتىرار اۋدانى