جاپونيانىڭ وڭتۇستىك-باتىسىندا "حايشەن" تايفۋنىنىڭ سالدارىنان 52 ادام زارداپ شەگىپ, 350 مىڭعا جۋىق ءۇي جارىقسىز قالدى, - دەپ حابارلايدى Egemen.kz Kyodo اگەنتتىگىنە سىلتەمە جاساپ.
تابيعي اپاتقا بايلانىستى 200 مىڭنان استام ادام ەۆاكۋاتسيالاندى. فابريكالار مەن مەكتەپتەر, سونداي-اق ءتۇرلى كاسىپتەر جابىلدى. جاپونيا بويىنشا جۇزدەگەن اۋە جانە تەمىر جول رەيسى توقتاتىلدى.
تروپيكالىق داۋىل اكەلگەن قاتتى جاڭبىر ميادزاكي پرەفەكتۋراسىندا كوشكىننىڭ پايدا بولۋىنا سەبەپ بولىپ, تاۋلى ايماقتاعى ءبىر ءۇي قيرادى. وندا بولعان ءتورت ادام, ونىڭ ىشىندە ۆەتنامنىڭ ەكى ازاماتى حابار-وشارسىز كەتكەن.
سونداي-اق كيۋسيۋ وڭتۇستىك-باتىس ارالىنداعى ەلەكتر جەلىلەرىنىڭ ۇزىلۋىنە بايلانىستى قازىر 350 مىڭعا جۋىق ءۇي جارىقسىز وتىر.
قازىرگى ۋاقىتتا "حايشەن" تايفۋنى جاپونيادان كورەي تۇبەگىنە 40 كم/ساع جىلدامدىقپەن جىلجۋدا, ەپيتسەنتردەگى جەلدىڭ جىلدامدىعى 60 م/س-قا جەتەدى. داۋىل سالدارىنان جاپونيانىڭ وڭتۇستىك-باتىسىنا دۇيسەنبى كۇنى 200 مم-دەن استام جاۋىن-شاشىن تۇسەدى دەپ كۇتىلۋدە.
پرەمەر-مينيستر سيندزو ابە جەكسەنبىدە ۇكىمەتتىڭ شۇعىل وتىرىسىن وتكىزدى. وندا ول جەرگىلىكتى حالىقتى قورعاۋ ءۇشىن قاجەت نارسەنىڭ ءبارىن جاساۋدى تاپسىردى. پرەمەر-مينيستر كەڭسەسى جانىنان تابيعي اپات سالدارىن جويۋ جونىندەگى جۇمىسقا تارتىلعان ءتيىستى مينيسترلىكتەر مەن ۆەدومستۆولاردىڭ قىزمەتىن ۇيلەستىرەتىن داعدارىس شتابى قۇرىلدى.