تاۋەلسىز مەملەكەتىمىز ءۇشىن جاستار ماسەلەسى قاشان دا ماڭىزدى. ەل مەن جەردىڭ ەرتەڭگى يەسى جاس ماماندار مەن اۋىل جاستارىنا جان-جاقتى الەۋمەتتىك جاعداي تۋعىزۋ كۇن تارتىبىنەن ءتۇسىپ كورگەن ەمەس. اۋىلعا جاس مامانداردىڭ كوپتەپ بارۋىن, اۋىل جاستارىن تۇراقتاندىرۋدىڭ شارالارىن الۋدى ەلباسى نۇرسۇلتان نازارباەۆ ۇدايى نازاردا ۇستاپ كەلەدى. مەملەكەت باسشىسى ءوزىنىڭ “جاڭا ونجىلدىق – جاڭا ەكونوميكالىق ءورلەۋ – قازاقستاننىڭ جاڭا ءمۇمكىندىكتەرى” اتتى بيىلعى جولداۋىندا “رەسپۋبليكالىق بيۋدجەتتە زەينەتاقىلاردى ۇستىمىزدەگى جىلعى 1 قاڭتاردان باستاپ,ال شاكىرتاقى مەن بيۋدجەتتەگىلەردىڭ ەڭبەكاقىلارىن 1 شىلدەدەن باستاپ 25 پايىزعا ءوسىرۋ قاراستىرىلعان. وتكەن جىلعى ەكونوميكا ءوسىمىنىڭ وڭ سەرپىنى شاكىرتاقىلار مەن بيۋدجەتتەگىلەر ەڭبەكاقىلارىن ءۇش اي بۇرىن – 2010 جىلدىڭ ساۋىرىنەن باستاپ وسىرۋگە مۇمكىندىك بەرەدى دەپ ەسەپتەيمىن. ۇكىمەتكە وسى قاجەتتى شارالاردى قابىلداۋدى تاپسىرامىن”, دەگەن سوزدەرى ءىس ءجۇزىنە اسىپ وتىر. ەلباسى جولداۋىن قولداپ, ونى حالىققا جەتكىزۋگە اتسالىسىپ كەلە جاتقان اقتوبە مەملەكەتتىك پەداگوگيكالىق ينستيتۋتىنىڭ پروفەسسور-وقىتۋشىلار قۇرامى مەن ستۋدەنتتەر قاۋىمى وسىعان بايلانىستى جيىن وتكىزىپ, نۇرسۇلتان ءابىش ۇلىنىڭ حالىقتىڭ ءال-اۋقاتىن ارتتىرۋعا باعىتتالعان سارابدال ساياساتىنىڭ قايتارىمدىلىعىن اڭگىمە وزەگىنە اينالدىردى. وسى جيىندا ءسوز العان ينستيتۋتتىڭ شەتەل تىلدەرى فاكۋلتەتىنىڭ ستۋدەنتتەرى مانشۇك مولداجانوۆا مەن مانشۇك دۇمباەۆا ەلباسىنىڭ جاستارعا جاساپ وتىرعان اكەلىك قامقورلىعىنا ريزاشىلىعىن ءبىلدىرىپ, الداعى ۋاقىتتا ساباقتى جاقسى وقۋمەن قاتار, قوعامدىق جۇمىستارعا بەلسەنە قاتىساتىندىقتارىنا, جولداۋدا اتاپ كورسەتىلگەن مىندەتتەردى ءجۇزەگە اسىرۋعا ءوز بىلىمدەرى مەن قابىلەتتەرىن جۇمسايتىندىقتارىنا سەندىردى. ال ءتورتىنشى كۋرس ستۋدەنتى ايگەرىم قالنيازوۆا ينستيتۋت ءتۇلەكتەرىن “ديپلوممەن اۋىلعا” باعدارلاماسىن قولداۋعا شاقىردى. وسى جوعارى وقۋ ورنىنىڭ ستۋدەنت جاستارى ۇندەۋ قابىلداپ, وندا ەلباسىنىڭ جاڭا, قۋاتتى قازاقستاندى قۇرۋ جولىنداعى ساياساتىن قولدايتىندىقتارىن جەتكىزدى, ءشاكىرتاقىنى, بيۋدجەتتەگىلەردىڭ ەڭبەكاقىلارىن 25 پايىزعا وسىرگەنى ءۇشىن العىس سەزىمدەرىن ءبىلدىردى.
ساتىبالدى ءساۋىرباي, اقتوبە وبلىسى.