مەملەكەت باسشىسىنىڭ تاپسىرماسى بويىنشا ەلشى داۋرەن كارىپوۆ ستراتەگيالىق ىنتىماقتاستىق جونىندەگى قازاقستان-گەرمان ىسكەرلىك كەڭەسىنىڭ (قگىك) بۇرىنعى تەڭ توراعاسى, بۇعان دەيىن "Deutsche Bank" اق-نىڭ باس اتقارۋشى ديرەكتورىنىڭ لاۋازىمىن اتقارعان پەتەر تيلسكە 1-دارەجەلى "دوستىق" وردەنىن تابىستادى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ماراپاتتاۋ ءراسىمى سالتاناتتى تۇردە ەلىمىزدىڭ بەرليندەگى ەلشىلىگىنىڭ عيماراتىندا "Deutsche Bank" باسقارما مۇشەسى يورگ بونگارتستىڭ, گفر ءسىم-ءنىڭ "وڭتۇستىك كاۆكاز جانە ورتالىق ازيا" ءبولىمىنىڭ باسشىسى انكە كونرادتىڭ, گفر ەكونوميكا جانە ەنەرگەتيكا فەدەرالدىق مينيسترلىگىنىڭ سىرتقى ەكونوميكالىق ساياسات دەپارتامەنتىنىڭ ديرەكتورى ەكحارد فرانتستىڭ, "DB Engineering & Consulting" كومپانياسىنىڭ باس ديرەكتورى, بيىل پ.ءتيلستىڭ ورنىنا قگىك تەڭ توراعاسى لاۋازىمىنا تاعايىندالعان نيكو ۆاربانوففتىڭ, سونداي-اق گفر-دىڭ باسقا دا قوعامدىق-ساياسي جانە ىسكەر توپ وكىلدەرىنىڭ قاتىسۋىمەن ءوتتى.
د.كارىپوۆ قر پرەزيدەنتى قاسىم-جومارت توقاەۆتىڭ اتىنان ەكىجاقتى جەمىستى ىنتىماقتاستىقتى نىعايتۋعا قوسقان ۇلەسى ءۇشىن پ.تيلسكە جوعارى مەملەكەتتىك ناگرادانى تابىستاي وتىرىپ, "9 جىل بويى قگىك تەڭ توراعاسى لاۋازىمىن اتقارعان پەتەر تيلس ەكونوميكانىڭ ءتۇرلى سالالارىنداعى بىرلەسكەن جوبالاردى جۇزەگە اسىرۋعا جان-جاقتى قولداۋ كورسەتتى, بيزنەس وكىلدەرى اراسىندا بايلانىس ورناتتى", – دەپ اتاپ ءوتتى قازاقستاندىق ديپلومات.
مەملەكەت باسشىلىعىنا وسىنداي جوعارى ناگرادا ءۇشىن ريزاشىلىعىن بىلدىرگەن پ.تيلس قازاقستان مەن گەرمانيا اراسىنداعى قاتىناستاردى ودان ارى دامىتۋ مەن ديۆەرسيفيكاتسيالاۋدىڭ زور الەۋەتىنە توقتالدى.
پەتەر تيلس تاجىريبەلى بانكير جانە قارجىلىق قىزمەتتەر باسشىلىعىندا 40 جىلدىق ەڭبەك ءوتىلى بار. 1977 جىلدان باستاپ ول "Deutsche Bank AG" كومپانياسىندا ءتۇرلى جوعارى لاۋازىمدار اتقاردى, بانكتىڭ ەۋروپا جانە ورتالىق امەريكا ەلدەرىندەگى ايماقتىق بولىمشەلەرىن باسقاردى. جوعارى دەڭگەيدەگى كاسىبيلىگى مەن ەڭبەك تاجىريبەسى ارقاسىندا, 2007-2019 جىلدار ارالىعىندا قازاقستان پرەزيدەنتى جانىنداعى شەتەلدىك ينۆەستورلار كەڭەسىنىڭ مۇشەسى بولدى.