پاراليمپياداشىلار پاتەرلى بولدى

تاياۋدا ءۇش تەننيسشىگە قوستا­نايداعى «يۋبيلەينىي» شاعىن اۋدانىنان ءبىر بولمەلى پاتەردىڭ كىلتتەرى تابىس ەتىلدى. «قوعامدىق كەلىسىم» ۇيىندە وتكەن سال­تاناتتى شاراعا دەنەشىنىق­تىرۋ جانە سپورت باسقار­ما­سى­نىڭ باسشىسى ازامات بەگالين قاتىسىپ, پاراليمپياداشىلاردىڭ ايماق سپورتىنىڭ دامۋىنا ۇلكەن ۇلەس قوسقانىن اتاپ ءوتتى.

تەننيسشىلەردىڭ باپكەرى سەرىك دانياروۆ وبلىس اكىمىنىڭ العىس حاتىن الدى. باپكەر 20 جىلدان بەرى قوستانايداعى ەستۋ قابىلەتى ناشار بالالارعا ارنال­عان مەك­تەپ-ينتەرناتتىڭ ورەن­دەرىن سپورت­قا باۋلىپ كەلەدى.

– ەستۋ قابىلەتى تومەن سپورت­شى­لارعا ارنالعان سۋردليم­پيا­دا ويىندارى تۇڭعىش رەت 1924 جىلى پاريج قالاسىندا ءوتتى. ءوزى 4 جىلدا ءبىر رەت ۇيىمداس­تىرىلادى. وعان 100-گە جۋىق مەم­لە­كەتتىڭ سپورتشىلارى قا­تىسادى. تۇركيادا وتكەن ءدۇبىرلى دودادا شاكىرتتەرىمنىڭ باعى جا­نىپ, قولا جۇلدەگە تابان تىرە­دى. ەندى, مىنە, بۇگىن تاعى قۋا­نىش­قا كەنەلىپ جاتىرمىز. ءۇش سپورتشىمىز دا باسپانالى بولدى. قالانىڭ ەڭ جاڭا شا­عىن اۋدانىنان پاتەر بەرىپ جاتقان وبلىس باسشىلارىنا العىسىمىز شەكسىز. بۇل قۇرمەتكە شاكىرتتەرىم دە ابدەن لايىق دەپ ويلايمىن. ۇشەۋى دە قاراپايىم, ەڭبەكقور جىگىتتەر. مىسالى, دا­نيار ەسكەندىروۆ كىشكەنتاي كەزى­نەن وسى ەستۋ قابىلەتى ناشار با­لالارعا ارنالعان مەكتەپ-ينتەرناتتا وقىدى. قازىر وسى مەكتەپتە اۋلا سىپىرۋشى بولىپ جۇمىس ىستەپ ءجۇر. الەم­دىك جارىس­تاردا ەل بايراعىن جەلبى­رەتىپ جۇلدەلى ورىنداردان كورى­نىپ جۇرسە دە, قول ەڭبەگىن قوراش ساناعان ەمەس, – دەدى بىلىكتى باپكەر.

ءۇش سپورتشىنى وبلىس اكىمى ارحيمەد مۇحامبەتوۆ الەۋمەتتىك جەلى ارقىلى قۇتتىقتادى.

«سپورتشىلارىمىزدى جاڭا باسپانامەن قۇتتىقتايمىن! جاڭا پاتەر­لەردە جايلىلىق, جىلۋ­لىق جانە سپورتتىق جەتىستىك­تەر تىلەي­مىن!», دەپ جازدى وبلىس باس­شىسى «ينستاگرام» پاراقشاسىندا.

سامسۋن سۋردليمپياداسىنا ەستۋ قابىلەتى ناشار ءۇش مىڭعا جۋىق سپورتشى قاتىستى. ال قازاقستاننان 9 سپورت ءتۇرى بو­يىنشا 50-گە جۋىق سپورتشى بارعان. ولار ەركىن جانە گرەك-ريم كۇرەسى, سامبو, جەڭىل اتلەتيكا, ءجۇزۋ, تاەكۆوندو, ۇستەل تەننيسى بويىنشا سىنعا ءتۇسىپ, وتاندىق سۋردسپورت تاريحىنداعى ەڭ ۇزدىك كورسەتكىشكە قول جەتكىزگەن.

قوستاناي وبلىسى