دالا كەمەلەرىندە دامىل جوق

شىلدەدە باستالعان اپتاپ ىستىقتان استىق تەز جەتىلدى. سوندىقتان وبلىستا وراق ناۋقانى جىلداعىدان ەرتە باس­تالدى. جەر ىرىزدىعىن جيناپ الۋعا ديقاندار ءاۋ باستا قارقىندى كىرىسىپ ەدى, وكىنىشكە قاراي, ءبىر اپتا بويى جاۋعان جاڭبىر كەدەرگى بولىپ, تەحنيكا توقتاپ قالدى. الايدا تامىزدىڭ سوڭى تامىلجىعان شۋاققا ۇلاسىپ, ون شاقتى كۇندەي تۇرىپ قالعان دالا كەمەلەرى ءداندى القاپقا قايتا شىققان. اۋىل شارۋاشىلىعى باسقارماسىنىڭ مالىمەتىنشە, وڭىردە بۇگىنگە دەيىن 700 مىڭ گەكتاردان استام بي­داي القابى ورىلىپ الىنعان. ازىر­گە بيداي ءتۇسىمى ورتا ەسەپپەن گەكتارىنا 10 تسەنتنەردەن اينا­لۋدا.

وراقتىڭ الدىن ادەتتەگىدەي وبلىستىڭ وڭتۇستىك اۋداندارى باس­تاپ كەلەدى. ماسەلەن, اۋليە­كول اۋدانىنىڭ ديقاندارى ال­قاپ­تاعى بيدايدىڭ 30 پايىزعا جۋىعىن باستىرىپ ۇلگەرگەن.

سوڭعى بىرنەشە جىل بويى جەر­دەن ءونىم الا الماي شى­عىنعا باتىپ, قارىزى كوبەيگەن ناۋىر­زىم اۋدانىنىڭ ديقاندارىنا بيىل تابيعات جومارت سىڭاي تانىتىپ تۇرعان سياقتى. اۋداندا 242 مىڭ گەكتار القاپقا ءداندى دا­قىل ەگىلگەن. ونىڭ 241 مى­ڭىن بيد­اي, 19 مىڭىن ارپا, 9 مىڭ­عا جۋىعىن مايلى داقىل الىپ جاتىر.

– جاڭبىر جاۋىپ 1-2 اپتا­داي تۇرىپ قالدىق. ودان كەيىن, مىنە, ءبىر جەتىدەن بەرى وراق قىزىپ تۇر. بارلىق شارۋاشىلىقتار القاپتا. بىلتىر قۋاڭشىلىق سالدارىنان بيداي ءتۇسىمى گەكتارىنا نەبارى 3,2 تسەنتنەر بولعان. بيىل ورتا ەسەپپەن ءار گەكتاردان 7 تسەنتنەر بيداي الۋدى كوزدەپ وتىرمىز. بىراق ءونىم بۇدان دا جوعارى بولۋى مۇمكىن. 3400 توننا جاعارماي قورى بار. ءبارى الىپ جاتىر. الدىگۇنى ءدامدى جاقتا بولدىم, كەشە اۋدان اكىمىمەن بۋرەۆەستنيكتە بولىپ قايتتىق. وراق ناۋقانى قارقىندى ءجۇرىپ جاتىر. اۋا رايى وسى قالپىنان اينىماسا, استىقتى بەلگىلەنگەن مەرزىم ىشىندە شاشاۋسىز جيناپ الامىز, – دەدى اۋدان اكىمىنىڭ ورىنباسارى قابيدوللا وماروۆ.

دەگەنمەن, قوستاناي استى­عى­نىڭ نەگىزگى قورىن سولتۇستىك اۋداندار بەرەدى. بۇل وڭىردەگى ءىرى شا­رۋاشىلىقتاردىڭ ءبىرى – «قار­قىن» اگروفيرماسى. سەرىكتەستىك باسشىسىنىڭ سو­زىنشە, بۇگىنگە دەيىن شارۋا­شى­لىق استىقتىڭ تەڭ جارتىسىن جيناپ العان.

جالپى, بيىل قوستاناي وب­لىسى داقىلداردى ءارتاراپ­تاندىرۋ بويىنشا جوعارعى كورسەتكىشكە قول جەتكىزىپ وتىر. وب­لىستاعى ماي­لى داقىل كولەمى وتكەن جىل­عىدان 130,4 مىڭ گەك­تارعا ارتىق. القاپتاردى ءارتا­راپتاندىرۋ شەڭبەرىندە وڭىردە سوڭ­عى 4 جىل ىشىندە مايلى دا­قىلدار القابى 289,1 مىڭ گەكتارعا ۇلعايعان.

بۇگىندە وبلىستىڭ ەگىن ال­قاپ­­تارىندا 9 مىڭنان استام كوم­باين تولاسسىز جۇمىس ىستەپ جاتىر.

قوستاناي وبلىسى