مەملەكەت باسشىسى قاسىم-جومارت توقاەۆ حالىققا جولداۋىندا مەملەكەتتىك قىزمەتشىلەردىڭ, دەپۋتاتتاردىڭ, سۋديالاردىڭ شەتەل بانكتەرىندە ەسەپ-شوتتارى يە بولۋى, قولما-قول اقشا جانە باعالى زاتتار ساقتاۋىنا شەكتەۋ سالىناتىنىن مالىمدەدى, دەپ حابارلايدى Egemen.kz.
"كۆازي مەملەكەتتىك قۇرىلىمداردىڭ قارجى شارۋاشىلىق قىزمەتىن, بيۋدجەت قاراجاتىن پايدالانۋ جونىندەگى مالىمەتتەردى جانە باسقا دا قۇندى دەرەكتەردى بۇكىل قوعامعا قول جەتىمدى ەتۋ ءۇشىن بىرىڭعاي اقپاراتتىق رەسۋرس قۇرۋ اسا ماڭىزدى بولىپ وتىر. مەملەكەتتىك ورگانداردىڭ شەشىمى جونىندەگى اقپاراتتىڭ اشىقتىعى, ازاماتتىق قوعاممەن سىندارلى ديالوگ ورناتۋعا سەپتىگىن تيگىزەدى. اقپاراتقا قول جەتكىزۋ جونىندەگى زاڭ جوباسىن مۇمكىندىگىنشە وسى سەسسيانىڭ اياعىنا دەيىن قابىلداۋ كەرەك.
سونداي-اق سىبايلاس جەمقورلىققا قارسى كۇرەستىڭ جاڭا تاسىلدەرىن ەنگىزگەن ءجون دەپ سانايمىن. 2021 جىلدان باستاپ مەملەكەتتىك قىزمەتشىلەردىڭ, دەپۋتاتتاردىڭ, سۋديالاردىڭ شەتەل بانكتەرىندە ەسەپ-شوتتارى يە بولۋى, قولما-قول اقشا جانە باعالى زاتتار ساقتاۋىنا قاتىستى جەمقورلىقپەن كۇرەس اياسىندا جاڭا شەكتەۋلەر ەنگىزۋ كەرەك", دەدى پرەزيدەنت.
سونىمەن قاتار مەملەكەتتىك قىزمەتشىنىڭ نەمەسە كۆازي مەملەكەتتىك مەكەمە باسشىسىنىڭ قوس ازاماتتىعى انىقتالعان جاعدايدا ولار قىزمەتىنەن بوساتىلادى. قۇقىق قورعاۋ ورگاندارى قىزمەتكەرلەرىنىڭ, سۋديالاردىڭ, پارا بەرۋشىلەردىڭ جانە پاراقورلىققا دەلدال بولعانداردىڭ سىبايلاس جەمقورلىعى ءۇشىن جازانى قاتايتۋ تۇرعىسىنان قىلمىستىق كودەكسكە وزگەرىستەر ەنگىزىلمەك.
"سىبايلاس جەمقورلىققا قاتىستى قىلمىس جاساعاندارعا شارتتى تۇردە مەرزىمىنەن بوساتۋ شاراسى قولدانىلمايدى. جەمقورلىقپەن ۇستالعانداردىڭ مەملەكەتتىك قىزمەتتە جانە كۆازي مەملەكەتتىك سەكتوردا جۇمىس ىستەۋىنە ءومىر بويى تىيىم سالاتىن قاعيدا قاتاڭ ساقتالۋى كەرەك. ءبىز سىبايلاس جەمقورلىق دەرەكتەرى تۋرالى حابارلاعان ادامداردى زاڭ جۇزىندە قورعايتىن جۇيە قالىپتاستىرۋىمىز كەرەك", دەدى مەملەكەت باسشىسى.