شاراينا
گرۋزيا حالقى وتكەن جەكسەنبى, 27 قازاندا وزدەرىنە جاڭا پرەزيدەنت سايلاپ الدى. ارينە, ورتالىق سايلاۋ كوميسسياسى ءالى قورىتىندى ناتيجەنى جاريالاعان جوق, بىراق گ.مارگۆەلاشۆيليدىڭ ايقىن جەڭىسكە جەتكەنى قازىردىڭ وزىندە بەلگىلى بولىپ وتىر. ءتىپتى, ونى ۇلىقتاۋ ءراسىمى 17 قاراشادا بولاتىنى تۋرالى دا اڭگىمەلەر كوپ ايتىلۋدا.
گ.مارگۆەلاشۆيلي «گرۋزين ارمانى» اتتى بيلىك پارتياسىنىڭ وكىلى. ونى سايلاۋشىلاردىڭ 63 پايىزعا جۋىعى قولداعان سىڭايلى. ونىڭ ەڭ جاقىن قارسىلاسى, «بىرلەسكەن ۇلتتىق قوزعالىس» (م.سااكاشۆيليدىڭ پارتيالاستارى) پارتياسىنىڭ وكىلى داۆيد باكرادزە ودان ءۇش ەسە از داۋىس جيناعان. ال ليدەرلەر ۇشتىگىندەگى نينو بۋردجانادزەگە سايلاۋشىلاردىڭ 10 پايىزدان ارتىعى عانا داۋىس بەرىپتى. جالپى, سايلاۋعا ەلدەگى داۋىس بەرۋ قۇقى بار حالىقتىڭ 46 پايىزى قاتىسقان. ازداۋ سەكىلدى مە, قالاي؟
شاراينا
گرۋزيا حالقى وتكەن جەكسەنبى, 27 قازاندا وزدەرىنە جاڭا پرەزيدەنت سايلاپ الدى. ارينە, ورتالىق سايلاۋ كوميسسياسى ءالى قورىتىندى ناتيجەنى جاريالاعان جوق, بىراق گ.مارگۆەلاشۆيليدىڭ ايقىن جەڭىسكە جەتكەنى قازىردىڭ وزىندە بەلگىلى بولىپ وتىر. ءتىپتى, ونى ۇلىقتاۋ ءراسىمى 17 قاراشادا بولاتىنى تۋرالى دا اڭگىمەلەر كوپ ايتىلۋدا.
گ.مارگۆەلاشۆيلي «گرۋزين ارمانى» اتتى بيلىك پارتياسىنىڭ وكىلى. ونى سايلاۋشىلاردىڭ 63 پايىزعا جۋىعى قولداعان سىڭايلى. ونىڭ ەڭ جاقىن قارسىلاسى, «بىرلەسكەن ۇلتتىق قوزعالىس» (م.سااكاشۆيليدىڭ پارتيالاستارى) پارتياسىنىڭ وكىلى داۆيد باكرادزە ودان ءۇش ەسە از داۋىس جيناعان. ال ليدەرلەر ۇشتىگىندەگى نينو بۋردجانادزەگە سايلاۋشىلاردىڭ 10 پايىزدان ارتىعى عانا داۋىس بەرىپتى. جالپى, سايلاۋعا ەلدەگى داۋىس بەرۋ قۇقى بار حالىقتىڭ 46 پايىزى قاتىسقان. ازداۋ سەكىلدى مە, قالاي؟
ادام قۇقىن بۇزعان «دەموكرات»
نەمىس باق-تارى اقش پرەزيدەنتى باراك وباما گەرمانيا كانتسلەرى انگەلا مەركەلدىڭ تەلەفونى تىڭدالاتىنىن بىلگەن دەپ شۋلاسا دا اقش ۇلتتىق قاۋىپسىزدىك اگەنتتىگىنىڭ (ۇقا) بۇل اقپاراتتى تەرىسكە شىعارعانىنان كەيىن ۇندەرى ءبىرشاما سايابىرلاپ قالدى.
بىراق اقش-تىڭ ەۋروپاداعى باسقا جاقتاستارى ۇقا-نىڭ بۇل قىلىعىنا نارازى ەكەندىكتەرىن جاريالاۋدا. «تىڭشى كابينەتى» اقش-تىڭ بەرليندەگى ەلشىلىگىنىڭ 4-قاباتىندا ورىن تەۋىپ كەلىپتى. كەشە يسپانيا بيلىگى دە اقش-تىڭ بۇل ىسىنە نارازى ەكەندىكتەرىن جاريالادى. امەريكانىڭ ارناۋلى قىزمەتتەرى 2012 جىلدىڭ ءبىر ايىندا عانا يسپانيا ازاماتتارىنىڭ تەلەفونمەن سويلەسكەن 60 ملن.-عا جۋىق اڭگىمەلەرىن تىڭداپتى. ۇقا-نىڭ اتى-ءجونىن ايتۋدان قاشقان ينفورماتورىنىڭ ايتۋىنا قاراعاندا, اگەنتتىك ب.وباما بۇل ءىستى توقتاتقانعا دەيىن الەمنىڭ 35 ليدەرىنىڭ تەلەفون اڭگىمەلەرىن بەس جىل بويى تىڭداعان ەكەن.
بارىنەن قاراپايىم حالىققا قيىن
رەسەي شەكاراشىلارى ۋكراينامەن ەكى اراداعى شەكاراعا تىكەنەك سىمنان اران تارتۋعا كىرىستى. اتاپ ايتقاندا, بۇل ءىس لۋگانسك وبلىسىندا ىسكە اسۋدا. ارينە, مۇنداي قادام شەكارا ماڭىندا تۇراتىن تۇرعىندارعا وڭاي ءتيىپ وتىرعان جوق.
وسى ۋاقىتقا دەيىن شەكارانىڭ ەكى بەتىندەگى تۋىسقاندارىمەن ەمىن-ەركىن ارالاسىپ جۇرگەن جەرگىلىكتى تۇرعىندار داعدارىسقا ۇشىراپ وتىر. «داۋدىڭ باسى دايرابايدىڭ كوك سيىرى» دەمەكشى, داۋدىڭ ءبارى ۋكراينانىڭ كەدەن وداعىن كەرەك قىلماي, ەۋرووداقپەن بايلانىستى تەرەڭدەتۋگە بەت بۇرعانىنان ەكەنىن ەكى ەلدىڭ حالقى دا جاقسى بىلەدى.
قىسقا قايىرىپ ايتقاندا:
*جۇرتتىڭ ءبارىن شۋلاتىپ, كەز كەلگەن ەلدىڭ تاماق ونىمدەرىنەن كاكىر تاۋىپ جۇرەتىن رەسەيدىڭ باس سانيتار دارىگەرى گ.ونيششەنكو وتستاۆكاعا كەتتى.
*بۇۇ مەن اراب مەملەكەتتەرى ليگاسىنىڭ وكىلى ل.براحيمي كەشە داماسكىگە ارناۋلى ساپارمەن باردى. ونىڭ ساپارىنىڭ ماقساتى سيريالىقتارمەن بايلانىس ورناتۋدىڭ قوسىمشا مۇمكىندىكتەرىن قاراستىرۋ بولىپ وتىر.
*اۋا رايىنىڭ قولايسىزدىعىنا قاراماي, بيىل وزبەك ديقاندارى 3,350 ملن. توننا ءشيتتى ماقتا جيناۋعا قول جەتكىزدى. بۇل مەملەكەتپەن جاسالعان كەلىسىمشارت مىندەتتەرىنىڭ تولىق ورىندالعاندىعى دەگەن ءسوز, دەپ حابارلادى سا-NEWS (UZ).
*قىرعىزستانداعى توتەنشە وقيعالاردىڭ سالدارىنان جىل باسىنان بەرى 12 ادام كوز جۇمىپتى. بۇل تۋرالى توتەنشە جاعدايلار ءمينيسترى ق.بوورونوۆ حابارلاعان. وسى ۋاقىت ارالىعىنداعى ماتەريالدىق شىعىن 218 ملن. سۋمعا تەڭ بولعان.
*قىتاي استاناسىنىڭ ورتالىندا بولعان جول-كولىك اپاتىنىڭ سالدارىنان 11 ادام زارداپ شەگىپ, 3-ەۋى كوز جۇمعان. قازىر وقيعانىڭ سەبەبى مەن سالدارى تەكسەرىلىپ جاتىر.
*پولشانىڭ ەكس-پرەمەر-ءمينيسترى تادەۋش مازوۆەتسكي 86 جاسقا قاراعان شاعىندا قايتىس بولدى. ول «سوليدارنوست» قوزعالىسىندا لەح ۆالەنسانىڭ جانىنداعى كوشباسشىلاردىڭ ءبىرى بولعان ەدى.
ەسكى توراعا قايتىپ ورالدى
وتكەن سەنبى-جەكسەنبىدە رەسەيدىڭ ەڭ ۇلكەن ساياسي پارتيالارىنىڭ ءبىرى – «سپراۆەدليۆايا روسسيانىڭ» كەزەكتى سەزى بولىپ, وندا پارتيا سەركەسى سەرگەي ميرونوۆ قايتادان توراعا بولىپ سايلاندى. 2011 جىلدىڭ 16 ساۋىرىندە بولعان پارتيا سەزىندە ول توراعالىقتان شەتتەتىلىپ, تەك دەپۋتاتتار پالاتاسىنىڭ باسشىسى بولعان ەدى.
ال بۇعان دەيىن توراعا بولعان نيكولاي لەۆيچەۆ ونىڭ ورنىنا كەتتى. وعان قارسىلاس رەتىندە تىركەلگەن پەتەربۋرگتىك وكسانا دميتريەۆا بار- جوعى جەتى-اق داۋىس الدى.
جاپونعا وتپەپ ەدى, قىتاي باس سالدى
امەريكالىق «بوينگ» اۆياجاساۋ كومپانياسى قىتايدان 200 ۇشاق ساتىپ الاتىندىعى تۋرالى رەكوردتى تاپسىرىس الىپ, توبەلەرى كوككە جەتكەندەي قۋانۋدا. بۇعان دەيىن «بوينگ» كومپانياسى جاپون تۇتىنۋشىلارىنان 9 ملرد. دوللارلىق كەلىسىمشارتتان ايىرىلىپ قالعان بولاتىن. ونى فرانتسۋزدىڭ «ەيرباس» كومپانياسى جەڭىپ كەتكەن.
ال قىتايمەن اراداعى كەلىسىمشارتتىڭ قۇنى 20 ملرد. دوللارعا جەتىپ وتىر. الىناتىن ۇشاقتاردىڭ ءبارى دە جاقىن ماگيسترالدى دەپ اتالاتىن 737 ماركالى «بوينگتەر». ونى ساتىپ الۋشىلاردىڭ قاتارىندا قىتايدىڭ جەكەمەنشىك اۆياكومپانيالارىمەن قاتار, مەملەكەتتىك مەنشىكتەگى ەڭ ۇلكەن كومپانيا دا بار. ايتا كەتەرلىگى سول, وسىعان دەيىن بۇل ۇشاقتاردان جاپون تۇتىنۋشىلارى بولار-بولماس كىنارات تاپقان بولاتىن.
قانىشەرگە بەرىلگەن ءادىل جازا
بريتانيانىڭ بيرمينگەم قالاسىندا ءۇش مەشىتكە قاراقشىلىق شابۋىل جاساپ, بىرەۋىندە قارتاڭ مۇسىلمان ازاماتتى ولتىرگەن ۋكراينالىق لاپشينگە سوت پروتسەسى اياقتالدى. قاراقشى ادىلەتتى جازاسىن الىپ, ءومىر-باقي تۇرمەدە وتىرۋعا كەسىلدى.
ۇكىمدە ءتىپتى ونىڭ مەرزىمىنەن بۇرىن بوساتىلۋ مۇمكىندىگى تەك 40 جىلدان كەيىن بولادى دەپ ايتىلعان. قانىشەر بيرمينگەمگە ۋكراينانىڭ دنەپروپەتروۆسك قالاسىنان بريتانيانىڭ «دەلكام» كومپانياسىنا تاجىريبەدەن ءوتۋ ءۇشىن كەلگەن. ول قولدان جارىلعىش قۇرىلعىلار دايىنداپ, ونى قالانىڭ ءۇش مەشىتىندە قولدانعان. لاپشين ءوزىنىڭ كىناسىن تولىق مويىنداعان.
ينتەرنەت ماتەريالدارى نەگىزىندە ازىرلەندى.