امەريكا قۇراما شتاتتارىندا پوليتسيا قاتىگەزدىگى مەن ناسىلشىلدىككە قارسى نارازىلىق اكتسيالارى بىرنەشە كۇننەن بەرى توقتار ەمەس. وسىدان بىرنەشە اي بۇرىن دا اقش حالقى قۇقىق قورعاۋ قىزمەتكەرلەرىنىڭ وزبىرلىعىنا قارسى شەرۋگە شىققان-دى.
بۇل جولعى وقيعا بىلاي باستالدى. كەنوشا قالاسىنىڭ پوليتسيا دەپارتامەنتىنە بەلگىسىز ايەلدەن شاعىم تۇسەدى. سودان پوليتسيا 23 تامىزدا وقيعا ورنىنا بارىپ, تۇسكەن شاعىم نەگىزىندە دجەيكوب بلەيك دەگەن ازاماتتى ۇستاۋعا تالپىنادى. اۋەلى وعان «ەلەكتروشوكەر» قولدانعان. بىراق ونىسى ءساتسىز شىعىپ, بلەيك پوليتسيا قولىنان سىتىلىپ شىعىپ, ءۇش بالاسى وتىرعان كولىگىنە ۇمتىلعان. بلەيك كولىكتىڭ ەسىگىن اشىپ مىنە بەرگەن كەزدە پوليتسەي ارتىنان جەتى رەت وق اتقان. ال كۋاگەرلەر وقيعانى باسقاشا سيپاتتاپ وتىر. ولاردىڭ ايتۋىنشا, دجەيكوب كوشەدە توبەلەسىپ جاتقان ەكى ايەلدى اجىراتپاق بولادى. پوليتسيا سول كەزدە كەلگەن. سودان كەيىن كەنوشا قالاسىنىڭ پوليتسيا قىزمەتكەرى دجەيكوب بلەيك ەسىمدى ازاماتتى جەتى رەت اتادى.
بۇقارالىق اقپارات قۇرالدارىندا تاراعان مالىمەتكە سۇيەنسەك, وقتىڭ تورتەۋى بلەيككە تيگەن. قازىر ونىڭ جاعدايى اۋىر.
دجەيكوبتىڭ قارا ءناسىلدى بولعانى جاعدايدى ودان ءارى ۋشىقتىرىپ جىبەردى. وقيعانىڭ قالاي وربىگەنىن سول ماڭدا جۇرگەن كۋاگەرلەر ۆيدەوعا ءتۇسىرىپ, الەۋمەتتىك جەلىگە جاريالاپ جىبەردى. وسىدان كەيىن پوليتسيانىڭ ارەكەتىنە نارازىلار كوشەگە شىعىپ, قالانى قيراتا باستاعان. كوپ ۇزاماي قالادا كومەندانتتىق ساعات جاريالاندى. ۆيسكونسين شتاتىنىڭ گۋبەرناتورى توني ەۆەرس توتەنشە جاعداي جاريالاپ, ۇلتتىق گۆارديا جاساعىن كومەككە شاقىردى.
كەيىنىرەك بلەيكتى اتقان پوليتسيا قىزمەتكەرى راستين شەسكي ەكەنى انىقتالدى. ول قۇقىق قورعاۋ سالاسىندا جەتى جىل جۇمىس ىستەگەن. كوپ ۇزاماي وقيعاعا قاتىسى بار پوليتسيا قىزمەتكەرلەرى جۇمىسىنان شەتتەتىلدى. دەگەنمەن بۇل امەريكالىقتاردى سابىرعا شاقىرۋعا جەتكىلىكسىز بولىپ تۇر.
قارا ءناسىلدى ازاماتتىڭ تاعى دا پوليتسيا قولىنان ءزابىر كورۋىنە قارسىلىق اكتسياسىنىڭ سوڭى بەيبەرەكەت تارتىپسىزدىككە ۇلاستى. ناتيجەسىندە كەي باسبۇزارلار دۇكەندەردى توناپ, كولىكتەردى ورتەگەن. بىراق ءبىر توپ ادام قالانى توناۋشىلاردان قورعاۋعا شىققان. ولار 26 تامىزدا شەرۋشىلەرمەن قاقتىعىسىپ, وقيعا سالدارىنان ەكى ادام كوز جۇمدى. پوليتسيا نەگىزگى كۇدىكتى رەتىندە 17 جاستاعى بوزبالانى تۇتقىندادى.
پوليتسيا قىزمەتكەرلەرىنىڭ ارەكەتىن اقش-تاعى تانىمال تۇلعالار سىنعا الدى. ماسەلەن, اقش پرەزيدەنتتىگىنەن ۇمىتكەر دجو بايدەن پوليتسيا قىزمەتكەرلەرى ارەكەتى ءۇشىن جاۋاپ بەرۋى ءتيىس دەپ مالىمدەدى. اقش ۆيتسە-پرەزيدەنتى مايك پەنس الداعى سايلاۋدا دونالد ترامپ جەڭىسكە جەتسە, ناسىلشىلدىكپەن كۇرەسۋگە بارىن سالاتىنىن جەتكىزدى.
نارازىلىق اكتسياسىنا سپورتشىلار دا قوسىلدى. نفل مەن ملس ليگالارى نارازىلىق رەتىندە بىرقاتار ويىندى كەيىنگە شەگەردى. Milwaukee Bucks كومانداسىنىڭ باسكەتبولشىلارى Orlando Magic كومانداسىنا قارسى ويىنعا قاتىسۋدان باس تارتتى.
وسىدان ءۇش اي بۇرىن ميننەاپوليس قالاسىندا دجوردج فلويد ەسىمدى قارا ءناسىلدى ازاماتتى تۇتقىنداۋ ساتىندە ءولتىرىپ الادى. الەۋمەتتىك جەلىلەردە فلويدتى تۇتقىنداۋ ءساتى بەينەلەنگەن ۆيدەو تارادى. وندا پوليتسيا قىزمەتكەرى قارا ءناسىلدى ازاماتتى قىلقىندىرىپ, موينىن تىزەسىمەن باسىپ وتىرعانى بايقالادى. ۆيدەودا فلويد بىرنەشە رەت «دەم جەتپەي بارادى!» دەپ ايقايلاپ, «مەنى ولتىرمەڭدەرشى» دەپ جالىنعانى ەستىلەدى.
فلويدتىڭ ولىمىنەن كەيىن اقش-تىڭ بىرقاتار قالاسىندا شەرۋ جالعاستى. لوس-اندجەلەس, چيكاگو, دەنۆەر, حيۋستون, لۋيسۆيلل, فەنيكس, كولۋمبۋس, مەمفيس قالالارىندا دا جاپپاي شەرۋ بولىپ, قۇقىق قورعاۋ قىزمەتكەرلەرى مەن نارازىلار قاقتىعىستى. اتلانتادا ميتينگكە شىققاندار عيماراتتاردى قيراتىپ, پوليتسيا كولىكتەرىن ورتەدى. ميننەاپوليستە بەيبىت ميتينگتىڭ سوڭى جاپپاي توناۋ مەن ورتەۋگە ۇلاستى. ءتىپتى قالاداعى پوليتسيا ۋچاسكەسى دە وتقا وراندى.
سونداي-اق 2014 جىلى ەريك گارنەر ەسىمدى قارا ءناسىلدى ازامات تا پوليتسيا قولىنان قازا تاپتى. ول كەزدە دە قۇقىق قورعاۋ قىزمەتكەرلەرى قىلقىندىرۋ ءادىسىن قولدانعان. كەيىننەن ە.گارنەر دەمىكپەمەن اۋىرعانى انىقتالدى. تاماعىن وراپ قىلقىندىرعاندا وعان اۋا جەتپەي تۇنشىققان. ءدال سول جىلى فەرگۋسون قالاسىندا پوليتسيا 18 جاستاعى مايكل براۋن ەسىمدى قارا ءناسىلدى بوزبالانى اتىپ ءولتىردى. بۇل ەكى وقيعا دا اقش-تا قىزۋ تالقىلانىپ, قوعام نازارىن اۋدارعان-دى.
قازىر ەلدە جىل سايىن پوليتسيانىڭ قولىنان قازا تاباتىندار سانى ارتىپ كەلەدى. بۇگىندە شامامەن مىڭعا جۋىق تۇرعىن پوليتسيانىڭ قولىنان باقيعا اتتاناتىن كورىنەدى. ونىڭ جارتىسى – اق ءناسىلدى, 26 پايىزى قارا ءناسىلدى, 17 پايىزى لاتىنامەريكالىقتار. بىراق اقش-تاعى حالىقتىڭ ناسىلدىك ءبولىنىسىن ەسەپكە الساق, قارا ناسىلدىلەردىڭ ءجيى ولەتىنى انىق اڭعارىلادى.