كوروناۆيرۋس پاندەمياسى كينو سالاسىنا ەداۋىر سوققى جاساعانى انىق. ەلىمىزدەن بولەك, الەم بويىنشا قانشاما كينوتەاترلار قاڭىراپ, ءوز كورەرمەندەرىن ءالى دە سارىلا كۇتۋدە.
نە ىستەمەك كەرەك؟ ەلوردالىقتار بۇل ماسەلەنى اشىق اسپان استىنداعى كينوتەاترمەن شەشۋگە تالپىنادى. بۇدان بىلاي استىڭىزدا كولىگىڭىز بولسا, جاڭا فيلمدەردى دالادا تاماشالاۋعا بولادى. الايدا اۆتو-كينوتەاتر اۋماعىنا كەلۋشىلەر بارلىق سانيتارلىق نورمانى قاتاڭ ۇستانۋى ءتيىس.
نۇر-سۇلتان قالاسىندا كوپشىلىكتىڭ كوڭىلىنەن شىققان اشىق اسپان استىنداعى كينوتەاتر جوباسى كورەرمەندەرمەن وسىلاي قايتا قاۋىشۋدا. جۋىردا دالاداعى اۆتو-كينوتەاتر فورماتىندا بولاتىن Nur-Sultan Auto-cinema Festival قايتا جاندانىپ, قالا تۇرعىندارى مەن قوناقتارى كينوتەاتردان شەتەلدىك نەمەسە وتاندىق كينو كارتينالاردى تەگىن تاماشالاي باستادى.
ۇيىمداستىرۋشىلار ەپيدەميولوگيالىق جاعدايدى ەسكەرىپ, ادام قاتىناسىنسىز تىسكەباسارلار مەن سالقىن شىرىندار جەتكىزۋدى دە ويلاستىرعانىن ايتا كەتكەن ءجون.
«اۆتو-كينوتەاتر اۋماعىنا كەلۋشىلەر بارلىق سانيتارلىق نورمالاردى ۇستانۋى ءتيىس, وزىمەن بىرگە مەديتسينالىق بەتبەردە مەن قولعاپتاردىڭ بولۋى, الەۋمەتتىك اراقاشىقتىقتى ۇستانعانى ءجون», دەيدى ۇيىمداستىرۋشىلار.
اتالعان نىسان «Astana Arena» ستاديونىنىڭ قابانباي باتىر داڭعىلىنا قارايتىن كولىك تۇراعىندا ورنالاسقان.