جاڭا وقۋ جىلى قارساڭىندا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ وكىلدەرى NIS ۇجىمىنىڭ اتىنان تۇركىستان وبلىسىنداعى سۋ تاسقىنىنان زارداپ شەككەن ەكى اۋىلدىڭ وقۋشىلارىنا سىيلىقتار تابىستادى. ونىڭ ىشىندە 719 مەكتەپ فورماسىنىڭ جيىنتىعى, 36 نوۋتبۋك, بالالارعا ارنالعان كوركەم ادەبيەتتەر مەن پەداگوگتەرگە ارنالعان ادىستەمەلىك ادەبيەتتەر بار.
ورگەباس اۋىلىندا العاشقىلاردىڭ ءبىرى بولىپ جاڭا مەكتەپ فورماسىن العان جانار مامرەجەپوۆا. ول سىنىپتاستارىمەن بىرگە ەلىمىزدىڭ بارلىق بالالارى ءبىلىم الۋدى ارماندايتىن نازارباەۆ زياتكەرلىك مەكتەپتەرى جۇيەسىنىڭ قولداۋىن ماقتان تۇتاتىنىن جەتكىزىپ, ۇستازدارى مەن اتا-انالاردىڭ الدىندا بالا ارمانىمەن ءبولىستى, كەلەشەكتە پەداگوگ بولعىسى كەلەتىنىن ايتتى.
تۇركىستان وبلىسىنىڭ ماقتاارال اۋدانىنداعى سۋ تاسقىنىنان كەيىن نازارباەۆ زياتكەرلىك مەكتەپتەرى جۇيەسىنىڭ ۇجىمى زارداپ شەككەندەرگە كومەك كورسەتۋ قورىنا قاراجات اۋدارعان بولاتىن. قايىرىمدىلىق ناۋقانىنا بارلىق زياتكەرلىك مەكتەپتەردىڭ ۇستازدارى مەن قىزمەتكەرلەرى, ءتورت بىردەي ورتالىق – پەداگوگيكالىق شەبەرلىك, پەداگوگيكالىق ولشەۋلەر, اقپاراتتىق تەحنولوگيالار, سونداي-اق ورتالىق اپپارات ۇلەس قوستى. ەكى اۋىلعا اتاۋلى كومەك كورسەتۋ تۋرالى شەشىم قابىلدانىپ, ورگەباس اۋىلىنداعى ق.امانجولوۆ اتىنداعى ورتا مەكتەپتىڭ جانە جەڭىس اۋىلىنداعى ق.مۇسىرەپوۆ اتىنداعى ورتا مەكتەپتىڭ وقۋشىلارىنا قول ۇشىن سوزدى. سۋ تاسقىنىنان كەيىن ەكى مەكتەپتىڭ دە عيماراتتارى قاتتى زارداپ شەككەن ەدى. قازىر ورگەباس اۋىلىندا كۇردەلى جوندەۋ جۇمىستارى ءالى دە جالعاسۋدا, ال جەڭىس اۋىلىنىڭ وقۋشىلارى قاشىقتان وقىتۋ جۇيەسى اياقتالعان سوڭ جاڭا عيماراتتا ءبىلىم الماق.
سانيتارلىق-ەپيدەميالىق جاعدايعا بايلانىستى سىيلىقتاردى تابىستاۋ بىرنەشە ۇستازدار مەن وقۋشىنىڭ, سونداي-اق اتا-انالار كوميتەتىنىڭ وكىلدەرىنىڭ قاتىسۋىمەن شاعىن ورتادا ءوتتى.
ماقتاارال اۋدانىنىڭ اكىمى باقىت اسانوۆ نازارباەۆ زياتكەرلىك مەكتەپتەرىنىڭ جۇيەسى بالالارعا اتاۋلى قولداۋ كورسەتۋ ارقىلى قۋانىشقا بولەگەنىن ايتتى:
– مەكتەپ فورماسى, كومپيۋتەرلىك تەحنيكا جيىنتىعى, كوركەم جانە ادىستەمەلىك ادەبيەتتەر – ءبىلىم بەرۋ سالاسىندا جاڭا وقۋ جىلى قارساڭىنداعى ەڭ ماڭىزدى كومەك, – دەدى اۋدان باسشىسى.
ال شىمكەنت قالاسى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ ديرەكتورى بالقان قاسىموۆتىڭ ايتۋىنشا, شالبارلار, پەنجاكتار, جەيدەلەر, جاكەتتەر, كەۋدەشەلەر – بارلىق مەكتەپ فورماسى وتاندىق تاۋاروندىرۋشىلەردى قولداۋ ماقساتىندا شىمكەنتتىك «SABTEX» جشس-دا تاپسىرىسپەن تىگىلدى. ورگەباس اۋىلىنداعى ورتا مەكتەپتىڭ ديرەكتورى داۋرەنبەك ابدىعالي بالالارعا ارنالعان نوۋتبۋكتار مەن مۇعالىمدەرگە ارنالعان ادىستەمەلىك ادەبيەتتەرگە ريزاشىلىعىن ءبىلدىرىپ, مامىرداعى سۋ تاسقىنى ءوڭىر ءۇشىن سىناق بولعانىمەن تۇرعىندار ەلمەن بىرگە ەكەنىن جەتە تۇسىنە تۇسكەنىن جەتكىزدى.
ايتا كەتەلىك, كەزدەسۋگە كەلگەن ورگەباس اۋىلىنداعى ورتا مەتكەپتە التى بالاسى ءبىلىم الاتىن كوپبالالى انا ايمان باتىربەكوۆانىڭ تۇڭعىشى جاڭا وقۋ جىلىندا مەكتەپتى تامامداعالى وتىرسا, كەنجەسى ءبىرىنشى سىنىپقا بارادى ەكەن.
– ەلىمىزدىڭ تۇكپىر-تۇكپىرىنەن سان مىڭداعان بەيتانىس ادام ءبىز ءۇشىن قام جەپ, بالالارىمىز بەن نەمەرەلەرىمىزدىڭ وقۋىنا ەڭ قاجەت سىيلىقتار دايىندادى. قۋانىشىمدا شەك جوق, – دەيدى ق.مۇسىرەپوۆ اتىنداعى ورتا مەكتەپتىڭ وقۋشىسى رۇستەم جاندوستىڭ اجەسى سارسەنكۇل اقتورەەۆا.
جيىندا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا وسىنشاما قيىندىقتىرعا قاراماستان ەلىمىز ءبىلىم بەرۋ سالاسىنا قولداۋ كورسەتىپ جاتقان كەزدە ءومىردىڭ ءوز ارناسىمەن جالعاساتىنىن ايرىقشا اتاپ ءوتتى.
– ءبىز بالالاردىڭ وقۋعا شابىتتانىپ, مەكتەپكە اسىققاندارىنا, اتا-انالاردىڭ بالالارى مەن نەمەرەلەرىنىڭ ءبىلىم الۋىن باعالايتىندارىنا كۋا بولىپ قايتتىق. ورگەباس جانە جەڭىس اۋىلدارىنداعى مەكتەپتەرمەن ىنتىماقتاستىقتى قولداۋدى جالعاستىراتىن بولامىز, – دەدى كۇلاش نوعاتايقىزى.
تۇركىستان وبلىسى