" ۇلى دالانىڭ ۇلىق تۇلعاسى" ۇزدىك ەسسە بايقاۋى ءوز مارەسىنە جەتتى

ەلباسى كىتاپحاناسى شىعىستىڭ ۇلى عالىمى, فيلوسوف, ماتەماتيك, مۋزىكا تەورەتيگى ءابۋ ناسىر ءال-ءفارابيدىڭ 1150 جىلدىعىنا وراي جالپى ءبىلىم بەرەتىن استانا مەكتەپتەرىنىڭ 7-11 سىنىپ وقۋشىلارى اراسىندا " ۇلى دالانىڭ ۇلىق تۇلعاسى" تاقىرىبىندا ۇزدىك ەسسە بايقاۋىن جاريالاعان بولاتىن.

بايقاۋدىڭ ماقساتى – وسكەلەڭ ۇرپاق اراسىندا ءابۋ ناسىر ءال-ءفارابيدىڭ مۇراسىن تانىتۋ, وقۋشىلاردىڭ شىعارماشىلىق جانە الەۋمەتتىك-كوممۋنيكاتيۆتى داعدىلارىن شىڭداۋ, ءوز وتانىنىڭ تاريحىنا, ۇلى دالا ەلىنىڭ ۇلىق تۇلعالارىنىڭ ەڭبەگىنە دەگەن ەلجاندىلىق سەزىمىن قالىپتاستىرۋ.

قابىلداۋ جۇمىسىنىڭ قورىتىندىسىنا سايكەس, 100-دەن استام جۇمىس قازاق, ورىس, اعىلشىن تىلىندە جازىلىپ, سكانەرلەنگەن. جەڭىمپازداردى كونكۋرس كوميسسياسىنىڭ مۇشەلەرى اشىق داۋىس بەرۋ ارقىلى انىقتادى.

7-9 سىنىپ:

ءى ورىن – اميرەەۆا ادەمى, № 37 مەكتەپ-گيمنازيا;

ءىى ورىن – ابدىكارىم ايىم (№ 68 مەكتەپ-گيمنازيا), اراپباەۆا نازيرا (№ 53 مەكتەپ-ليتسەي);

ءىىى ورىن – ازاتقىزى سامعات (№64 مەكتەپ-ليتسەي), حامزينا ارۋجان (№ 73 مەكتەپ-ليتسەيى), ەسەنبەكوۆا قىز جىبەك (№ 50 مەكتەپ-ليتسەي), تولەۋتاەۆا كاليما (№ 10 مەكتەپ-گيمنازيا);

10-11 سىنىپ:

ءى ورىن – التىنبەكوۆا ازەل, № 50 مەكتەپ-ليتسەي;

ءىى ورىن – قونىسوۆا يزميرا (№74 مەكتەپ-گيمنازيا), دينمۋحاممەدوۆا گۋلنۋر (№ 50 مەكتەپ-ليتسەي); ساپاربەكوۆا ديلناز (№ 68 مەكتەپ-گيمنازيا),

ءىىى ورىن – تۇماربەك نۇردانا مارلانقىزى (№ 2 مەكتەپ-گيمنازيا), ابدىكاريموۆا اسەل (№ 71 مەكتەپ-ليتسەي).

سونىمەن قاتار «عىلىمي-ىزدەنىس شەبەرلىگى ءۇشىن», «ۇشقىر ويلىلىعى ءۇشىن» نوميناتسيالارى بويىنشا جەڭىمپازدار انىقتالدى. ءاربىر جۇمىس ءوزىنىڭ اۆتورلىق وي ەركىندىگىمەن, شىعارماشىلىعىمەن ەرەكشەلەنەدى.

№74 مەكتەپ-گيمنازيانىڭ وقۋشىسى قونىسوۆا يزميرا «ەلىمنىڭ ەرتەڭى جارقىن بولۋى ءۇشىن بۇگىنگى جاستاردىڭ ءبىرى – مەن نە ىستەۋىم كەرەك؟ ارينە, وتانىما, تۋعان ەلىمە, حالقىما پايداسى تيەر ىسپەن اينالىسقاندى ءجون سانايمىن. بولاشاعىمنىڭ كىلتى بىلىمدە ەكەنىن انىق بىلەمىن. فارابي بابام «ادام ءوز ماقساتىنا ءوزىن ءوزى جەتىلدىرۋ ارقىلى جەتەدى» دەگەندەي, ماقساتىما قول جەتكىزۋ ۇنەمى ءبىلىمىمدى جيناقتاپ, تولىقتىرىپ وتىرۋىم كەرەك,- دەپ وي تولعاسا, № 68 مەكتەپ-گيمنازيانىڭ وقۋشىسى ساپاربەكوۆا ديلناز

ءازيز اتا, ءال-فارابي بابامىز,

بىزگە پارىز – ۇلىلىعىڭ تانىماق

تۇڭعيىقتان, تۇڭعيىقتان شىعا الدىق

قىپشاقتاردىڭ الەمگە اتىن شىعاردىق.

زامانىندا تۇرا الاتىن قاتار كىم

سەن ەكىنشى اريستوتەل اتاندىڭ, - دەگەن ولەڭ جولدارىن ارنايدى.

№ 10 مەكتەپ-گيمنازيانىڭ تولەۋتاەۆا كاليما:  ءال-فارابي ەڭبەكتەرىنىڭ رۋحاني ازىعى جانە ەڭبەكتەرىنىڭ مازمۇنى بۇگىنگى تاۋەلسىز, باقىتتى ۇرپاقتىڭ ساناسىنا ء«بىلىم ال, دانا بول, رۋحاني باي بول» دەپ ىشتەي سىبىرلاپ, ەلىمىزدىڭ, جەرىمىزدىڭ ۇلىلارىنىڭ ۇلىسى بولۋىنا جانە جالپى رۋحاني ازىعى مول, بويىندا ادامگەرشىلىك قاسيەتتەرى باسىم, كوكىرەگى وياۋ دانا, ومىردە ءوزىنىڭ ورنىن تابا العان, بولاشاقتىڭ دامۋىنا ۇلەس قوسقان تۇلعا بولۋعا شاقىراتىنداي. مەنىڭ ويىمشا, بالالاردى ءال-فارابي تۇلعاسىمەن, ونىڭ ىشىندە شىعارمالارى جانە ناقىل سوزدەرىمەن مەكتەپ كەزىنەن پايىمداپ, تانىستىرعاندى ءجون دەپ سانايمىن. ولارعا رۋحاني ءمانى مول ءبىلىمنىڭ قاينار كوزى سانالاتىن اقپارات ۇسىنىلسا, وسە كەلە بولاشاقتا رۋحاني ساۋاتتى, بىلىكتى, ەڭ ءبىرىنشى جان-دۇنيەسى تاربيەلەنگەن ءارى تازا, مىقتى, ەلىمىزدىڭ ودان ءارى دامۋىنا قىزمەت ەتەتىن ازاماتتار مەن ازاماتشالار وسەتىنىنە سەنەمىن! سوندىقتان عۇلاما اتامىزدىڭ مۇرالارىن باعالاپ, مەڭگەرىپ رۋحاني بايلىعى مول تۇلعا بولىپ جەتىلۋ ءبىزدىڭ پارىزىمىز دەپ بىلەمىن!

ادامزاتتىڭ جيناقتاعان ماتەريالدىق بايلىعى قانداي قىمبات بولسا, ۇلى تۇلعالاردىڭ ەڭبەكتەرى مەن رۋحاني بايلاعى سونداي قىمبات. بۇل مادەني مۇرانىڭ قۇندىلىعىن ءبىلىپ, ونىڭ ماڭىزىن جوعالتپاۋ – ءبىزدىڭ ابىرويلى مىندەتىمىز. ءال-فارابي – رۋحاني بۇلاق باستاۋى, ۇلى دالانىڭ ۇلىق تۇلعاسى, - دەپ قورىتىندىلايدى № 53 مەكتەپ-ليتسەيدىڭ وقۋشىسى اراپباەۆا نازيرا.

جەڭىمپازدارعا ديپلوم جانە ەستەلىك سىيلىقتار, قاتىسۋشىلارعا سەرتيفيكاتتار ۇسىنىلادى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.