قىتايداعى يانتسزى وزەنى ارناسىنان اسىپ, ەل بيلىگى سۋ تاسقىنىنان قورعانۋ ماقساتىندا 100 مىڭنان استام ادامدى قاۋىپسىز جەرگە كوشىردى. The Guardian باسىلىمنىڭ حابارلاۋىنشا, كەمەرىنەن اسقان سۋ سيچۋان پروۆينتسياسىنداعى ۇلكەن بۋددا ەسكەرتكىشىنە قاۋىپ ءتوندىرىپ تۇر.
كونە جادىگەر وسىدان 1200 جىل بۇرىن سالىنعان. ونىڭ بيىكتى 71 مەترگە جەتەدى. لەشان ۇلكەن بۋددا دەپ اتالاتىن ەسكەرتكىش يۋنەسكو-نىڭ الەمدىك مۇرالارى تىزىمىنە ەنگەن.
ەرىكتىلەر, پوليتسيا قىزمەتكەرلەرى قازىرگى تاڭدا تاريحي جادىگەردى قورعاپ قالۋعا تىرىسىپ جاتىر. ويتكەنى تاسىعان سۋ ەسكەرتكىشتىڭ تومەنگى جاعىن كەمىرە باستاعان. ايماقتا سوڭعى رەت سۋدىڭ مۇنشالىقتى كوبەيۋى سوناۋ 1949 جىلى تىركەلىپتى.
قىتاي وزەندەرىنە جاۋاپ بەرەتىن يانتسزى سۋ رەسۋرسى كوميسسياسى قاۋىپتىڭ قىزىل دەڭگەيىن جاريالاپ, وزەن سۋىنىڭ 5 مەترگە دەيىن كوتەرىلۋى مۇمكىن ەكەنىن ايتىپ دابىل قاعىپ وتىر. ال سۋ رەسۋرستارى مينيسترلىگىنىڭ حابارلاۋىنشا, يانتسزى وزەنىندەگى بوگەتتەردەگى سۋدى جىبەرۋ كولەمى سەكۋندىنا 74 مىڭ شارشى مەترگە كوبەيمەك.