ءماليدىڭ مازاسى قاشىپ تۇر. تاياۋدا ەلدە كوتەرىلىس بۇرق ەتە ءتۇسىپ, پرەزيدەنت يبراھيم كەيتا پرەزيدەنتتىك لاۋازىمىنان باس تارتتى. بۇل كوتەرىلىسشىلەردى قۋانتسا دا, حالىقارالىق قوعامداستىق ماليدەگى جاعدايعا الاڭداۋشىلىق بىلدىرۋدە.
ي.كەيتا مەملەكەتتىك تەلەارنا ارقىلى ءوز لاۋازىمىنان باس تارتاتىنىن جانە ۇلتتىق كەڭەستى تاراتاتىنىن مالىمدەدى. سونىڭ الدىندا عانا كوتەرىلىسشىلەر پرەزيدەنت پەن پرەمەر-مينيستر بۋبۋ سيسسەنى تۇتقىنداعانى تۋرالى اقپارات تاراعان ەدى.
ORTM ارناسى ارقىلى حالىققا ۇندەۋ جاساعان ي.كەيتا مەرزىمىنەن بۇرىن قىزمەتىنەن كەتۋىنىڭ سەبەبىن ءتۇسىندىرىپ, «بيلىگىمدى ساقتاپ قالۋ ءۇشىن قان توگىلگەنىن قالامايمىن. سوندىقتان پرەزيدەنتتىك مانداتىمنان باس تارتۋعا شەشىم قابىلدادىم», دەدى.
پرەزيدەنتتىڭ وكىلەتتىگىن توقتاتۋى شەرۋشىلەردى ءبىر سەرپىلتىپ تاستادى. The Guardian باسىلىمىنىڭ حابارلاۋىنشا, نارازىلار قازىرگى ۇكىمەتتەن شارشاعانىن جەتكىزگەن. كوپ ۇزاماي كوتەرىلىسشىلەردىڭ باسشىلارى تەلەارنا ارقىلى مالىمدەمە جاسادى. ء«بىز بيلىكتى ۇستاپ تۇرعانىمىز جوق, ءبىز ەلدەگى تۇراقتىلىقتى قامتاماسىز ەتەمىز. ءبارىمىز بىرلەسىپ قانا ەلدىڭ ۇلىلىعىن قايتارا الامىز», دەدى مالي اۋە كۇشتەرى قىزمەتى باسشىسىنىڭ ورىنباسارى يسمايل ۆاگە. سونداي-اق ول ەل شەكاراسى جابىلعانىن, كەشكى 9-دان تاڭعى 5-كە دەيىن كومەندانتتىق ساعات ەنگىزىلگەنىن حابارلادى.
«بۇل قادام از ۋاقىت ىشىندە ماليدەگى بيلىك پەن حالىق اراسىنداعى سەنىمدىلىكتى قالپىنا كەلتىرىپ, كۇندەلىكتى ءومىرىمىزدى جاقسى جاعىنا جەتەلەيتىن الەۋەتتى ينستيتۋت قالىپتاستىراتىن جالپى سايلاۋ وتكىزۋگە مۇمكىندىك بەرەدى», دەدى ي.ۆاگە.
جالپى, ماليدەگى احۋالدىڭ شيەلەنىسۋى ماۋسىمدا باستالعان-دى. وقيعانىڭ ورشۋىنە بيىلعى پارلامەنتتىك سايلاۋ تۇرتكى بولدى. ۇكىمەتكە نارازىلار كوشەگە شىعىپ, پرەزيدەنتتىڭ قىزمەتىنەن كەتۋىن تالاپ ەتكەن. ەل پرەزيدەنتى ي.كەيتا شەرۋشىلەرمەن كەلىسسوزدەر جۇرگىزىپ, سايلاۋدى قايتا وتكىزۋگە ۋادە بەرگەن. بىراق بۇل نارازى تاراپتى توقتاتقان جوق.
وتكەن اپتادا كاتي ايماعىنداعى ساربازدار قولدارىنا قارۋ الىپ, جوعارى شەندى وفيتسەرلەردى تۇتقىندادى. ۇكىمەتكە نارازىلار ولاردىڭ ارەكەتىن قۇپ كورىپ, ادىلەت مينيسترلىگىنىڭ عيماراتىن ورتەدى.
وقيعانىڭ بۇلاي ورشۋىنە الاڭداعان پرەمەر-مينيستر ب.سيسسە ساربازداردى قارۋىن تاستاۋعا شاقىرعان. بىراق كوتەرىلىسشىلەر العان بەتىنەن قايتقان جوق. وسىلايشا, ولار پرەزيدەنت ي.كەيتانى, پرەمەر-مينيستر ب.سيسسەنى جانە قارجى ءمينيسترى ابدۋللا داففەنى تۇتقىندادى.
ماليدەگى جاعدايعا حالىقارالىق قوعامداستىق تا الاڭداپ وتىر. وقيعاعا بايلانىستى بۇۇ قاۋىپسىزدىك كەڭەسى جابىق ەسىك جاعدايىندا جيىن وتكىزگەن. ايتا كەتەرلىگى, ماليدە بۇۇ بەيبىتشىلىك ميسسياسىنىڭ 15600 وكىلى قىزمەت ەتەدى.
بۇۇ باس حاتشىسى انتونيو گۋتەرريش ماليدەگى جاعدايدى كونستيتۋتسيالىق ءتارتىپ پەن زاڭ ەرەجەسىن ورەسكەل بۇزۋ دەپ ايىپتادى. افريكا ۇيىمىنىڭ توراعاسى مۋسسا فاكي ماحامات تا كوتەرىلىسشىلەردىڭ ارەكەتىن زاڭ بۇزۋعا بالاپ, پرەزيدەنت پەن پرەمەر-ءمينيستردى بوساتۋعا شاقىردى.
فرانتسيانىڭ سىرتقى ىستەر ءمينيسترى جان-يۆ لە دريان مۇنداي اۋىر وقيعانى فرانتسيا قاتاڭ ايىپتايتىنىن جەتكىزدى. قىتايدىڭ سىرتقى ىستەر ءمينيسترى بەيجىڭ بيلىگى ۇكىمەتتى كۇشپەن اۋىستىرۋعا قارسى دەپ حابارلادى. ەۋروپالىق وداق كوتەرىلىستىڭ ءماليدى عانا ەمەس, وڭىردەگى بۇكىل احۋالدى قيىنداتاتىنىن مالىمدەدى.
ءبىر قىزىعى, ي.كەيتانىڭ قازىرگى تاعدىرى ءماليدىڭ بۇعان دەيىنگى پرەزيدەنتى امادۋ تۋرەگە وتە ۇقساس. 2012 جىلى وسى ەلدە اسكەري كوتەرىلىس بولىپ, تۋرە قىزمەتىنەن كەتكەن ەدى. كوتەرىلىس سالدارىنان ەلدەگى احۋال قيىنداپ, بىرقاتار ايماقتا ەكسترەميستىك باعىتتاعى قارۋلى توپتار كۇشەيە ءتۇستى.
كەيىنىرەك فرانتسيا اسكەرىنىڭ كومەگىمەن ەكسترەميستەردى تالقانداۋدىڭ ءساتى تۇسكەن. دەگەنمەن يبراھيم كەيتانىڭ باسشىلىعى كەزىندە اتالعان توپتار قايتا كۇش جيناعان سىڭايلى. ونىڭ ۇستىنە, كەي توپتاردىڭ دايش تەرروريستىك ۇيىمىنا قاتىسى بار ەكەنى ايتىلادى. حالىقارالىق قوعامداستىقتىڭ قاۋىپتەنىپ وتىرعانى دا وسى.