قوستاناي وبلىسىندا 1 اپتاعا سوزىلعان جاۋىن-شاشىنعا بايلانىستى ەگىن وراعى توقتاپ تۇر. اۋىل شارۋاشىلىعى باسقارماسىنىڭ مالىمەتىنشە, ايماقتا بيداي القابىنىڭ 287 مىڭ گەكتارى, ياعني 7%-ى عانا ورىلعان. ازىرگە بيداي ءتۇسىمى ورتا ەسەپپەن گەكتارىنا 9 تسەنتنەردەن اينالۋدا. وراقتىڭ الدىن ادەتتەگىدەي وبلىستىڭ وڭتۇستىك اۋداندارى باستاپ كەلەدى. ماسەلەن, اۋليەكول اۋدانىنىڭ ديقاندارى القاپتاعى بيدايدىڭ 13%-ىن باستىرىپ ۇلگەرگەن, دەپ حابارلايدى Egemen.kz.
بيىل شىلدەنىڭ ەكىنشى جارتىسى اپتاپ ىستىققا ۇلاسىپ, استىق تەز جەتىلدى. سوندىقتان ديقاندار دا ناۋقاندى جىلداعىدان بىرنەشە اپتا ەرتە باستاپ كەتتى. القاپ جۇمىستارى تامىزدىڭ تورتىندە باستالعان. بىراق, وكىنىشكە قاراي, القاپ جۇمىستارىنا 1 اپتادان بەرى جاۋعان جاڭبىر كەدەرگى كەلتىرىپ تۇر.
"قازىر جاۋىن-شاشىن سايابىرسىدى. ەندى 1-2 كۇن ىشىندە جەر دەگدىسە, كومبايندار قايتا قوزعالادى", دەدى مەڭدىقارالىق ديقان تالعات قاپانوۆ.
قوستاناي وبلىسىنا 4,1 ملن گەكتار القاپقا ءداندى داقىل ەگىلگەن. ونىڭ 84,8 پايىزى بيداي. 640,5 مىڭ گەكتار مايلى داقىل بار. ايماق ديقاندارى بيىل ەل قامباسىنا 4 ملن توننا استىق قۇيۋدى جوسپارلاپ وتىر.
قوستاناي وبلىسى