نۇر-سۇلتان قالاسى سارىارقا اۋدانى اۋماعىندا 540 اۋلا بار, ولاردىڭ 77,5% قاناعاتتانارلىق جاعدايدا. بيىل 40 اۋلا الاڭى جوندەلۋدە. بۇل تۋرالى سارىارقا اۋدانىنىڭ اكىمى ەرعالي ەگەمبەردى نۇر-سۇلتان قالالىق اكىمدىگىنىڭ رەسمي ينستاگرام پاراقشاسىنداعى تىكەلەي ەفير كەزىندە ايتتى, - دەپ حابارلايدى Egemen.kz.
اۋماقتى اباتتاندىرۋ جانە اسفالتتاۋ ماسەلەسى وتە وزەكتى. سوندىقتان اكىم تۇرعىنداردى باستاما كوتەرۋگە شاقىردى.
«بيىل ەكىنشى جىل قاتارىنان «بيۋدجەتكە قاتىسۋ» جوباسى جۇزەگە اسىرىلۋدا. سارىارقا اۋدانى اكىمى اپپاراتىنىڭ سايتىنا كىرۋ قاجەت. وندا ءسىز قاتىسۋدىڭ بارلىق تالاپتارىن كورەسىز. بەلسەندى بولىڭىز, جۇمىس ىستەڭىز, سىزدەرمەن بىرگە ءبىز بارلىق ماسەلەلەردى شەشەمىز», – دەدى ەرعالي ەگەمبەردى.
گازداندىرۋ – ايماقتا كۇن تارتىبىندەگى باستى ماسەلەنىڭ ءبىرى. بۇگىنگى كۇنگە جوسپارلانعان 200 كم-ءدىڭ 101 كم-دە جۇمىستار اياقتالدى. قازىر كۆارتالىشىلىك قۇبىرلار تارتىلۋدا.
«كوكتال-1 الابىندا 91 كوشە بار, ولاردىڭ 88-نە قۇبىر تارتۋ اياقتالدى. كوكتال-2-دە جالپى كوشەلەر سانى – 41, جۇمىس ەكى كوشەدە قالدى. اگروقالاشىقتاعى 94 كوشەنىڭ 22-دە جۇمىستار جوسپارلانعان. بۇل جوبا بىرنەشە جىلعا ارنالعان. قازىر وسى اۋدانداردا 10 230 جەكە تۇرعىن ءۇي بار, ونىڭ ىشىندە بيىل 5000-نان استام ءۇيدى گازداندىرۋ جوسپارلانۋدا. ءبىز كۆارتالىشىلىك قۇبىرلاردى جۇرگىزەمىز. كوشەدەن ۇيگە, جەلىلەرگە, قۇبىرلارعا ءۇي يەسى ءوز قاراجاتى ەسەبىنەن جۇرگىزەدى. بۇل شامامەن 300 مىڭ تەڭگەدەن استام قارجى تۇرادى. ەسەپتەگىشتەر اكىمدىك ەسەبىنەن ورناتىلادى. تەحنيكالىق شارتتار بەرۋ جۇمىستارى باستالدى. ونى الۋ ءۇشىن جۇمىس كۇندەرى كوكتال-1, بولاشاق كوشەسى, 4/2 مەكەن-جايى بويىنشا بايلانىسا الاسىز», – دەپ ءتۇسىندىردى اۋدان اكىمى.
تىكەلەي ەفير بارىسىندا ەرعالي ەگەمبەردى ۇيلەردى ءسۇرۋ جوسپارلارى تۋرالى ايتتى.
ء«تورت ءۇيدى بۇزۋ جوسپارلانعان – التىنسارين كوشەسى 5/2, 5/3, 5/4 جانە بەسشاتىر كوشەسى, 8 – 240 ادام تۇراتىن 50 پاتەر», – دەدى اكىم.
ەفير بارىسىندا جارىقتاندىرۋ, كوگالداندىرۋ, الەۋمەتتىك سالا, جاڭا سەيفۋللين جولىنىڭ اشىلۋى تۋرالى ماسەلەلەر دە قوزعالدى.