ەكولوگيا, گەولوگيا جانە تابيعي رەسۋرستار مينيسترلىگىنىڭ شىعىس قازاقستان وبلىسى بويىنشا ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى حانبالىق وسىرەتىن شارۋاشىلىقتارىنىڭ جۇمىسىن قاتاڭ باقىلاۋدا.
2006 جىلدان باستاپ بالىق رەسۋرستارىن پايدالانۋدى رەتتەۋ ۇزاق مەرزىمدى (5 جىلدان 49 جىلعا دەيىن) كەلىسىمشارتى بويىنشا پايدالانۋشىلارعا بالىق شارۋاشىلىعى سۋ ايدىندارىن (ۋچاسكەلەرىن) ۇزاق مەرزىمگە بەكىتىپ بەرۋ ارقىلى وڭىردەگى بالىق ءوسىرۋشى شارۋا قوجالىقتارى ءوز كاسىبىن دوڭگەلەتىپ, مينيسترلىك الدىنداعى مىندەتتەمەلەرىن تولىعىمەن ورىنداپ وتىر. ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ ماماندارى سۋ ايدىندارىن پايدالانۋعا العان شارۋالاردىڭ ميللەرياتسيالىق جۇمىستاردى جۇرگىزۋىن, جاعاجايلاردى تازا ۇستاۋىن, بيزنەس سۋبەكتىلەرىنە بەرىلگەن اۋماق قورىقشىلارىمەن قورعالۋىن, قىسقى ۋاقىتتا مۇز استىنداعى بالىقتارعا اۋا وتكىزۋ تۇتىكشەلەرىن ورناتۋىن, رۇقسات ەتىلگەن مولشەردەن ارتىق بالىق اۋلاماۋىن جانە ەڭ باستىسى اۋلانعان بالىق كولەمىنە بايلانىستى جىل سايىن جاڭا شاباقتاردى سۋعا جىبەرۋلەرىن قاداعالاپ وتىرادى.
2020 جىلعى 25 شىلدەدەگى جاعداي بويىنشا شىعىس قازاقستان وبلىسىنىڭ بالىق شارۋاشىلىعى سۋ ايدىندارىندا حالىقارالىق جانە رەسپۋبليكالىق ماڭىزى بار 60 ۋچاسكە بار. ونىڭ 24-ءى بەكىتىلىپ بەرىلگەن جانە سونىمەن قاتار جەرگىلىكتى ماڭىزى بار 96 سۋ ايدىنى بار, ونىڭ 27-ءسى 22 پايدالانۋشىعا بەكىتىلىپ بەرىلگەن.
قازىر وسكەمەن قالاسىنىڭ ىرگەسىندە حانبالىقتى (فورەل) شارباقتا وسىرەتىن قوجالىقتاردىڭ دا جۇمىسى قارقىن الىپ كەلەدى. وڭىردەگى ەكى كاسىپورىن قازاقستان حالقىن حانبالىقپەن قامتاماسىز ەتىپ وتىر. سونداي-اق شارۋا قوجالىقتارى ادامداردىڭ ەكومادەنيەتىن قالىپتاستىرۋ ءۇشىن سپورتتىق بالىق اۋلاۋ ورىندارىن اشقان. بۇل ءبىرىنشى كەزەكتە ادامدار جاپپاي تىيىم سالىنعان اۋمەن بالىق اۋلاۋدى توقتاتۋ ءۇشىن جاسالسا, ەكىنشى جاعىنان دەمالىستى ءتيىمدى ءارى قىزىقتى وتكىزۋ ءۇشىن قولعا الىنىپ وتىر.
حانبالىقتى شارباقتا وسىرۋمەن اينالىساتىن ءبىرىنشى قوجالىق 2020 جىلدىڭ ءساۋىر ايىندا 300 مىڭ دانا كوكشۇبار (ريپۋس) شاباعى, سالماعى 0,003 گرامم بولاتىن 300 مىڭ دانا پايدابالىق (پەلياد) شاباعىن بالىقتاندىرۋ جۇمىستارىن جۇرگىزدى. 2030 جىلعا دەيىن بالىق ونىمدەرى كولەمىن جىلىنا 1200 تونناعا جەتكىزۋ جوسپارلانىپ وتىر. بۇل – 2,16 ملرد تەڭگە. 2019 جىلى البىرت بالىق تۇرلەرى ءوندىرىسىنىڭ كولەمى 54,2 توننانى قۇراعان. 2020 جىلعى 15 اقپاننان باستاپ 2020 جىلعى 1 شىلدە ارالىعىندا كاسىپشىلىك بالىق اۋلاۋ ءليميتى 1,833 توننانى قۇرايدى, ونىڭ ىشىندە «گراندفيش» جشس-پەن ءبىرىنشى جارتىجىلدىقتا يگەرىلۋى 1, 833 توننانى قۇرايدى.
ال حانبالىقتى شارباقتا وسىرۋمەن اينالىساتىن ەكىنشى قوجالىقتا بيىلعى ءبىرىنشى جارتىجىلدىقتا دامۋ جوسپارى بويىنشا ورىندالۋ 76994,2 مىڭ تەڭگەنى قۇرادى. II توقساندا شارباقتار ساتىپ الۋ جوسپارلانعان. جاعالاۋ ينفراقۇرىلىمىن قۇرۋ جانە سپورتتىق بالىق اۋلاۋدى ۇيىمداستىرۋ ءۇشىن 1 ملن 500 مىڭ تەڭگە سوماعا كۇركە قۇراستىرىلىپ, پايدالانۋعا بەرىلدى. ءوزىنىڭ جەكە ينكۋباتسيالىق تسەحى بار. وندا ءوز كۇشتەرىمەن ينكۋباتسيالىق كەزەڭنەن وتكىزەدى جانە وسىرەدى. اعىمداعى جىلدىڭ 1-توقسانىندا حانبالىقتىڭ 300 مىڭ دانا ۋىلدىرىعى ساتىپ الىندى جانە ينكۋباتسيالىق كەزەڭنەن ويداعىداي وتكىزىلدى. ۋىلدىرىق ساتىپ الۋعا جۇمسالعان سوما 2 ملن 310 مىڭ تەڭگە. بالىققا ارنالعان ازىق ساتىپ الۋعا جۇمسالعان سوما – 11 ملن 795,3 مىڭ تەڭگە.
ەرتىس سۋ باسسەينى ەلىمىزدەگى بالىق شارۋاشىلىعى باسسەيندەرىنىڭ ىشىندە كولەمى بويىنشا ءۇشىنشى ورىنعا يە. بالىق شارۋاشىلىعىن دامىتۋعا بالىق شارۋاشىلىعى سۋ ايدىندارىنىڭ قوماقتى قورى جانە ونداعى بالىق قورى نەگىز بولادى. بۇل بالىق شارۋاشىلىعى سۋ ايدىندارىنىڭ قاتارىنا جايسان (زايسان) كولى, بۇقتىرما سۋ قويماسى, ءشۇلبى سۋ قويماسى, وسكەمەن سۋ قويماسى, وبلىس شەگىندە ەرتىس وزەنى, وبلىس بويىنشا جەرگىلىكتى ماڭىزى بار سۋ ايدىندارى, وبلىس شەگىندەگى الاكول كولدەرى.