2020 جىلى نۇر-سۇلتاندا "نۇرلى جەر-2025" باعدارلاماسى ارقىلى 19 كوپقاباتتى ءۇيدى جوندەۋ جوسپارلانعان. بۇل تۋرالى اكىمدىكتىڭ رەسمي سايتىنا سىلتەمە جاساي وتىرىپ Egemen.kz حابارلايدى.
نۇر-سۇلتان قالاسى اكىمدىگىنىڭ "استانا – ادالدىق الاڭى" جوبالىق كەڭسەسى قر سىبايلاس جەمقورلىققا قارسى ءىس-قيمىل اگەنتتىگى مەن تۇرعىن ءۇي جانە تۇرعىن ءۇي ينسپەكتسياسى باسقارماسىمەن بىرلەسىپ, "نۇرلى جەر-2025" – الماتى جانە بايقوڭىر اۋداندارىندا تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسىن ىسكە اسىرۋ بويىنشا ساتپاەۆ كوشەسى, 8; قاجىمۇقان, 14/1; اباي, 80/1 جانە اباي, 80/2 مەكەن-جايى بويىنشا تۇرعىن ۇيلەرگە مونيتورينگ جۇرگىزدى.
نۇر-سۇلتان قالاسى اكىمدىگى "نۇرلى جەر-2025" باعدارلاماسىن جۇزەگە اسىرۋعا اتسالىسۋدا. باعدارلاما اياسىندا كوپپاتەرلى ۇيلەردى جوندەۋ قايتارۋ مەحانيزمى قاعيداتىمەن جۇزەگە اسىرىلادى.
بۇگىنگى كۇنى كوپپاتەرلى ۇيلەردىڭ كىرەبەرىسى, شاتىرى مەن جەرتولەسىن جوندەۋ جۇرگىزىلۋدە. ايدىڭ سوڭىندا نىساندار پايدالانۋعا بەرىلەدى. مونيتورينگ بارىسىندا تۇرعىنداردىڭ تىلەكتەرى تىڭدالدى. سونداي-اق بۇزۋشىلىقتار انىقتالىپ, مەردىگەرلەرگە ولاردى جويۋ تۋرالى نۇسقاۋ بەرىلدى.
2020 جىلى نۇر-سۇلتاندا باعدارلاما بويىنشا رەسپۋبليكالىق جانە جەرگىلىكتى بيۋدجەتتەن 19 كوپپاتەرلى ءۇيدى جوندەۋ جوسپارلانعان.
"جوسپارلانعان جوندەۋ جۇمىستارى كەزىندە قالانىڭ ءار اۋدانىندا كوپپاتەرلى ۇيلەردىڭ مونيتورينگى جۇرگىزىلەدى", دەدى قالا اكىمدىگىنىڭ "استانا – ادالدىق الاڭى" جوبالىق كەڭسەسىنىڭ ۇيلەستىرۋشىسى ساۋلە بيسەمباەۆا.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.