جۋىردا ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قىزمەتكەرلەردىڭ ءىىى ونلاين-فورۋمىن وتكىزىپ, ونىڭ بارىسىندا جاڭا جاعدايداعى الەۋمەتتىك جۇمىس ادىستەرى جانە مۇقتاج ازاماتتارعا الەۋمەتتىك كومەك كورسەتۋ تەتىكتەرىن ودان ءارى جەتىلدىرۋ ماسەلەلەرى تالقىلاندى.
فورۋمعا 500-گە جۋىق ادام, ونىڭ ىشىندە قازاقستاننىڭ الەۋمەتتىك قىزمەتكەرلەرى, حالىقارالىق ۇيىمداردىڭ, ۇكىمەتتىك ەمەس سەكتوردىڭ جانە مەملەكەتتىك ورگانداردىڭ وكىلدەرى قاتىستى. سونداي-اق رەسەي, اقش, يزرايل, بولگاريا, گرۋزيا جانە قىرعىزستاننان كەلگەن ساراپشىلار بايانداما جاسادى.
فورۋم جۇمىسىن اشقان ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ قازاقستاندا رەسپۋبليكالىق دەڭگەيدە 33, ال جەرگىلىكتى دەڭگەيدە 10-نان استام الەۋمەتتىك كومەك ءتۇرى كورسەتىلەتىنىن حابارلادى. تابىسى از ازاماتتاردى الەۋمەتتىك قولداۋ تولەمدەر, جاردەماقى, ازىق-ت ۇلىك جانە تۇرمىستىق جيىنتىقتار, جۇمىسپەن قامتۋ جانە باسقا دا كومەك تۇرىندە جۇزەگە اسىرىلادى.
سوڭعى 3 جىلدا وسى ماقساتقا ارنالعان بيۋدجەت شامامەن 1,8 ەسەگە, 551-دەن 964 ملرد تەڭگەگە دەيىن ءوستى. مىسالى, اتاۋلى الەۋمەتتىك كومەكتى قارجىلاندىرۋ 2018 جىلعى دەڭگەيمەن سالىستىرعاندا 3,5 ەسەگە – 33,2-دەن 118 ملرد تەڭگەگە دەيىن, ون جىلدا 42 ەسەگە ءوستى (2010 جىلى – 2,8 ملرد تەڭگە).
فورۋم بارىسىندا COVID-19 پاندەمياسى كەزىندە الەۋمەتتىك جۇمىستاردى جۇزەگە اسىرۋعا ەرەكشە نازار اۋدارىلدى. ەڭبەك مينيسترلىگىنىڭ وكىلدەرى شەتەلدىك ارىپتەستەرىمەن قازاقستاندا توتەنشە جاعداي كەزەڭىندە ازاماتتارعا الەۋمەتتىك قولداۋ كورسەتۋ تاجىريبەسىمەن ءبولىستى. ماسەلەن, بيىل II توقساندا 560 مىڭ جانە III توقسانعا 626 مىڭ ادامعا ااك تاعايىنداۋ اۆتوماتتى تۇردە ۇزارتىلدى. وسىلايشا جۇمىسپەن قامتۋ ورتالىقتارىنا ازاماتتاردىڭ جاپپاي جينالۋىن بولدىرماۋعا جانە ولاردىڭ اۋرۋ جۇقتىرۋ قاۋپىن ازايتۋعا مۇمكىندىك جاسالدى. سونىمەن قاتار 5 ساناتتاعى 1 ملن-نان استام مۇقتاج ازاماتقا ازىق-ت ۇلىك جانە تۇرمىستىق جيىنتىقتار بەرىلدى. ازاماتتاردىڭ تىكەلەي بايلانىسىن ازايتۋ جانە COVID-19 تارالۋىن بولدىرماۋ ءۇشىن بۇل كومەك جالپى سوماسى 19 ملرد تەڭگەگە اقشالاي تولەم تۇرىندە جىبەرىلدى.
سونىمەن قاتار ازاماتتاردىڭ ىندەتتى جۇقتىرۋ قاۋپىن ازايتۋ ماقساتىندا 40 مىڭعا جۋىق قازاقستاندىق ءۇشىن مۇگەدەكتىك مەرزىمى بۇرىن بەلگىلەنگەن مۇگەدەكتىك توبى بويىنشا مەملەكەتتىك جاردەماقى تولەۋدى جالعاستىرا وتىرىپ, اۆتوماتتى تۇردە ۇزارتىلدى. فورۋم بارىسىندا حالىققا الەۋمەتتىك كومەك كورسەتۋ ساپاسىن ارتتىرۋ ماسەلەلەرى دە قارالدى.
الەۋمەتتىك جۇمىس جونىندەگى ۇلتتىق رەسۋرستىق ورتالىقتىڭ ديرەكتورى ليرا رايسوۆا ارنايى الەۋمەتتىك قىزمەتتەر مەن ااك كورسەتۋ ساپاسىن جاقسارتۋ ماقساتىندا الەۋمەتتىك قىزمەتكەرلەردى تەستىلەۋ جۇيەسىمەن تانىستىردى. ونىڭ ايتۋىنشا, شەكتى ۇپاي جيناي الماعان الەۋمەتتىك قىزمەتكەر قوسىمشا وقۋدان وتەدى, ال تومەن ۇپاي جۇمىستان شىعارۋعا نەگىز بولمايدى. تەستىلەۋ قازاقستان رەسپۋبليكاسىنىڭ زاڭناماسى مەن الەۋمەتتىك جۇمىس ادەبى تۋرالى سۇراقتاردان, سونىمەن قاتار تاجىريبەلىك تاپسىرمالاردان تۇرادى. قىزمەتكەردىڭ تولىق بەينەسىن قالىپتاستىرۋ ءۇشىن تەستىلەۋگە انكەتا مەن جەكە سيپاتتامالارىن, كوممۋنيكاتيۆتى قۇزىرەتتىلىگىن جانە ەموتسيونالدى كۇيزەلىس دەڭگەيىن انىقتاۋعا باعىتتالعان پسيحولوگيالىق تەست كىرەدى. قىزمەتكەرلەردى وقىتۋ Zoom, Youtube, Citiesoflearning.eu بازالارىندا ونلاين-رەجىمدە وتەدى.
يۋنيسەف-تىڭ قازاقستانداعى بالالارعا ءبىلىم بەرۋ جانە قۇقىعىن قورعاۋ بويىنشا ۇيلەستىرۋشىسى تاتيانا ادەريحينا وتباسىن قولداۋ, مۇگەدەكتىكتى ەرتە انىقتاۋ جانە ماسەلەگە ەرتە ارالاسۋدىڭ ماڭىزىن اتاپ ءوتتى. يۋنيۋسەف-تىڭ مالىمەتىنە سۇيەنسەك, الەمدە 90 ملن-نان استام مۇگەدەك بالا بار. 65,5 مىڭ مۇگەدەك بالا شىعىس ەۋروپا مەن تمد اۋماعىنداعى ينتەرناتتىق مەكەمەلەردە تۇرادى.
«بالالاردى قۇتقارۋ. گرۋزيا» ۇيىمىنىڭ ديرەكتورى تاماري گولۋبياني گرۋزيانىڭ مۇگەدەك وتباسىلارعا پروفيلاكتيكالىق قىزمەت كورسەتۋ تاجىريبەسىمەن ءبولىستى. بۇل ەلدە كۇندىزگى كۇتىم ورتالىقتارى, ەرتە ارالاسۋ باعدارلامالارى جانە الدىن الۋ/داعدارىس قورلارى بار.
مۇگەدەكتىگى بار ادامداردى قولداۋ ماسەلەلەرىن تالقىلاۋ بارىسىندا ەڭبەك مينيسترلىگىنىڭ وكىلدەرى ارىپتەستەرىنە قازاقستانداعى جاعداي تۋرالى اڭگىمەلەدى. بۇگىنگى تاڭدا رەسپۋبليكادا وسى ساناتتاعى 705 مىڭ ازامات تۇرادى. جىل سايىن قارجىلاندىرۋ كولەمىن ۇلعايتا وتىرىپ, مۇگەدەكتەردىڭ قۇقىعىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندە 2025 جىلعا دەيىنگى ۇلتتىق جوسپار جۇزەگە اسىرىلۋدا. سونداي-اق بيىل مۇگەدەكتەرگە وڭالتۋ قۇرالدارىنا ءوز بەتىمەن تاپسىرىس بەرۋگە مۇمكىندىك بەرەتىن الەۋمەتتىك قىزمەتتەر پورتالى ىسكە قوسىلدى. شيپاجايدا ەمدەلۋدىڭ مەرزىمى رەتتەلدى, جەكە كومەكشىلەرگە ەڭبەكاقى تولەۋدىڭ بىرىڭعاي ءتارتىبى بەلگىلەندى. ايتۆ (ۆيچ) اۋرۋى بار بالالارعا بىرىڭعاي جاردەماقى ەنگىزىلدى, كوحلەارلىق يمپلانتتاردى قايتارۋ بويىنشا مىندەتتەمەلەر الىنىپ تاستالدى.
ەڭبەك مينيسترلىگى الەۋمەتتىك قىزمەتتەر ساياساتىن دامىتۋ دەپارتامەنتىنىڭ ديرەكتورى دامەجان سادۋاقاسوۆا مۇقتاج ازاماتتارعا الەۋمەتتىك كومەك كورسەتۋ تەتىكتەرىن جەتىلدىرۋ ماقساتىندا بىرقاتار قۇجاتتار ازىرلەنەتىنىن ايتتى. بۇل – قازاقستان رەسپۋبليكاسىنداعى الەۋمەتتىك قىزمەت جۇيەسىن ودان ءارى جاڭعىرتۋدىڭ 2025 جىلعا دەيىنگى جول كارتاسى, الەۋمەتتىك قىزمەتكەرلەرگە ۇزدىكسىز ءبىلىم بەرۋدىڭ تۇجىرىمدامالىق تاسىلدەرى, وتباسى جاعدايىن انىقتاۋ ادىستەمەسى جانە «قازاقستان رەسپۋبليكاسىنداعى الەۋمەتتىك قىزمەتكەردىڭ الەۋمەتتىك مارتەبەسى تۋرالى» جاڭا زاڭ جوباسى.
فورۋم قورىتىندىسى 2025 جىلعا دەيىنگى الەۋمەتتىك قىزمەتتەردى دامىتۋدىڭ تۇجىرىمدامالىق تاسىلدەرىنىڭ نەگىزىنە ەنەتىن بولادى.