بانكتەردىڭ اكتيۆى ۇلعايدى

ماۋسىم ايىندا ەلىمىزدەگى ەكىنشى دەڭگەيلى بانكتەردىڭ جالپى اكتيۆتەرىنىڭ كولەمى 28,59 ترلن تەڭگەگە جەتىپ, ماۋسىم ايىمەن سالىستىرعاندا 1,5 پايىزعا ۇلعايدى. ال بىلتىرعى شىلدە ايىمەن سالىستىرعاندا كورسەتكىش 12,8 پايىزعا كوبەيدى. ەڭ ءىرى ون بانكتىڭ اكتيۆى ءبىر جىلدا 13,4 پايىزعا ارتىپ وتىر.

Ranking.kz حابارلاعانداي, جىلدىق ءوسىم كورسەتكىشى بو­يىنشا سبەربانك توپ باستاپ تۇر. ونىڭ اكتيۆى ءبىر جىلدا 33,7 پايىزعا ۇلعايىپ, 2,65 ترلن تەڭگەگە جەتتى. سوڭعى ايداعى ءوسىم بويىنشا دا اتالعان قار­جى ينستيتۋتى كوش باستاپ تۇر­عانىن ايتا كەتۋ كەرەك. جالپى, رەسپۋبليكاداعى ەكىن­شى دەڭ­گەيلى بانكتەردىڭ اكتيۆ كو­لەمى بو­يىنشا سبەربانك حالىق بانكتەن كەيىنگى ەكىنشى ورىندا تۇر.

جىلدىق ءوسىم كورسەتكىشى بويىنشا ەكىنشى ورىن Kaspi Bank-كە تيەسىلى: +29,9 پايىز. اكتيۆ كولەمى 2,48 ترلن تەڭ­گە. ودان كەيىنگى ورىندارعا «تۇر­عىن­ۇيقۇرىلىسجيناقبانكى» (+28,5 پايىز), سيتيبانك (+16,9 پايىز) جانە Jysan Bank (+16,5 پايىز) جايعاستى.

ايلىق وسىمگە كەلەر بولساق, اكتيۆى 44,9 ملرد تەڭگەگە ۇلعاي­عان تسەنتركرەديت الدىڭعى ورىن­دا تۇر. اتالعان بانكتىڭ اكتي­ۆى ءبىر جىلدا 1,2 ترلن تەڭگە­نى قۇرا­عانىن اتاپ وتكەن ءجون.  جالپى, رەسپۋب­ليكا بويىنشا ەكىنشى دەڭگەيلى بانك­تەردىڭ اراسىندا تسەنتركرەديتتىڭ اكتيۆ پورتفەلىنىڭ ۇلەسى 8 پايىزعا جۋىق­تايدى.

نەسيە پورتفەلى بويىنشا دا ەكىنشى دەڭگەيلى بانكتەردىڭ جىلدىق ديناميكاسىندا ءبىرشا­ما ءوسىم بار. بۇل كورسەتكىش 9,9 پايىزعا ۇلعايىپ, 14,99 ترلن تەڭ­گەنى قۇرادى. الايدا شىلدە ايىنىڭ كور­سەتكىشى بويىنشا نەسيە پورتفەلى 0,5 پايىزعا تومەندەگەنى بايقالادى.

ءبىر جىل ىشىندە اكتيۆتەرى ەڭ كوپ 5 بانك­تىڭ ىشىندە نەسيەلەۋ كولەمى بويىنشا سي­تيبانكتەن باسقالارىنىڭ ءبارى وسىمگە قول جەتكىزدى. دەگەنمەن, كوروناۆي­رۋس داعدارىسىنا بايلانىستى ماۋ­­سىم, شىلدە ايلارىندا ەڭ ءىرى بەس بانك­تىڭ ۇشەۋى عانا نەسيە پورت­فەلىن ۇلعاي­تىپتى. سبەر­بانك­تىڭ نەسيە پورتفەلى 1,5 پايىز­­عا, Kaspi Bank-ءتىڭ كور­سەتكى­شى 0,4 پايىز­عا, «تۇرعىنۇي قۇ­رى­لىسجيناقبانكىنىڭ» بەرگەن نە­سيەلەرى 3,5 پايىزعا جوعارى­لادى.

جالپى, ەكىنشى دەڭگەيلى قارجى ينستيتۋتتارى ءۇشىن نەسيە بەرۋدەگى ەڭ ءتيىم­دى سەگمەنت – تۇتىنۋشىلىق نەسيەلەر. بانكتەردىڭ نەسيە پورتفەلى تو­مەن­­دە­گەنىنە قاراماستان, تۇتىنۋ­شىلىق نەسيە كولەمى ءبىر ايدا 1,1 پايىزعا, ال جىل­دىق كورسەتكىش 13,7 پايىزعا وسكەنى بايقا­لادى.

Ranking.kz-ءتىڭ شولۋىنا سۇ­يەنسەك, تۇتى­نۋشىلىق كرەديتتى ەڭ ۇزاق ۋاقىتقا بەرەتىندەردىڭ ءتىزىمىن دە سبەربانك باستاپ تۇر – 60 اي. ودان كەيىنگى ورىندارداعى Kaspi Bank – 48 ايعا, Jysan Bank – 36 ايعا بەرەتىنى ايتىلعان. ەكىن­شى دەڭگەيلى قارجى ينستيتۋتتارى ۇسىنعان ەڭ جوعارعى نەسيەنىڭ ورتاشا كورسەتكىشى 5 ملن تەڭگە ەكەنىن ايتا كەتۋ كەرەك.

تولەم مەرزىمى 90 كۇننەن اسىپ كەتكەن «ناشار» نەسيە­لەر­دىڭ ۇلەسى شىلدە ايىندا 72 ملرد تەڭگەگە ازايىپ, 1,3 ملرد تەڭگە بولدى. بۇل جالپى سەكتورداعى اكتيۆ­تەردىڭ 9 پايىزىنا تەڭ قاراجات. «ناشار» نەسيەلەردىڭ كولەمى بويىنشا دا سبەر­بانك, «تۇر­عىنۇيقۇرىلىسجيناق­بان­كى» جانە تسەنتركرەديت ءتىزىمنىڭ باسىندا تۇر.

ءبىر جىل ىشىندە ەكىنشى دەڭ­گەي­لى قار­جى ينستيتۋتتارىنىڭ يپوتەكالىق نەسيە­لەرىنىڭ ۇلەسى 27,8 پايىزعا, ياعني 413 ملرد تەڭ­گەگە ۇلعايدى. وسىلايشا يپو­­تە­كالىق نەسيەنىڭ جالپى نەسيە­دەگى ۇلەسى 14 پايىزعا جۋىق­تا­عانىن اتاپ وتكەن ءجون.