فۋتبولدان چەمپيوندار ليگاسىنىڭ شيرەك فينالدىق ويىندارى ءوتىپ, باس جۇلدە ءۇشىن تارتىستى جالعاستىرىپ جاتقان ۇزدىك ءتورت كوماندا انىقتالدى.
فرانتسيانىڭ پسج كومانداسى چەمپيوندار ليگاسىنىڭ جارتىلاي فينالىنا العاشقى بولىپ شىقتى. شيرەك فينالدا پاريجدىكتەر يتاليانىڭ «اتالانتا» كلۋبىنان 2:1 ەسەبىمەن باسىم ءتۇستى.
جانكۇيەرلەرسىز وتكەن ماتچتا «اتالانتادان» پاشاليچ (27 مين) قانجىعاسى مايلانىپ, 90-مينۋتقا دەيىن ەسەپ وزگەرمەگەن ەدى. الايدا پسج اينالاسى ءۇش مينۋتتا «كامبەك» جاسادى. ماركينوس (90 مين.) پەن شۋپو-موتين (90+3 مين.) گول سوعىپ, كومانداسىن جەڭىسكە جەتەلەدى.
«رب لەيپتسيگ» سەنساتسيا جاساپ, «اتلەتيكونى» 2:1 ەسەبىمەن جەڭدى.
ويىن باستالماس بۇرىن Egemen.kz سايتىنا «لەيپتسيگتىڭ» قانداي جاعدايدا عانا جارتىلاي فينالعا شىعۋى مۇمكىن ەكەنىن ايتقان ەدىك. «سوڭعى بەس ويىندا تەك ەكى رەت قانا جەڭىسكە جەتكەن «بۇقالارعا» لا ليگادا ءوز قاقپالارىنا ەڭ از گول جىبەرەتىن كوماندالاردىڭ ءبىرى «اتلەتيكوعا» قارسى تۇرۋ قيىنعا سوعادى. ايتكەنمەن يۋليان ناگەلسماننىڭ شاكىرتتەرى ءبىرىنشى بولىپ گول سوقسا, يسپان كومانداسىن ابىگەرگە تۇسىرەتىنى ءسوزسىز. ويتكەنى «اتلەتيكونىڭ» قارسىلاس كومانداعا كوپ گول سوعا بەرمەيتىنى دە بار».
ايتسا ايتقانداي, شيرەك فينالدا «لەيپتسيگ» ءبىرىنشى بولىپ ەسەپتى اشتى. ويىننىڭ 51 مينۋتىندا ولمو ەسەپ اشىپ, كومانداسىن العا شىعاردى. اراعا 20 مينۋت سالىپ «اتلەتيكو» ساپىنان پورتۋگاليانىڭ تالانتتى جاس فۋتبولشىسى جواۋ فەليكس 11-مەترلىك ايىپ دوبىن ءساتتى ورىنداپ ەسەپتى تەڭەستىردى. ال ويىننىڭ 88-مينۋتىندا ادامس بۇل كەزدەسۋگە نۇكتە قويدى. سول قاپتالدان ادەمى پاس العان ول ەش ويلانباستان قاقپاعا سوققى جاسادى. «اتلەتيكو» قاقپاشىسى وبلاك سوققىنى قايتارار ما ەدى, ەگەر دە دوپ قورعاۋشىلاردىڭ بىرىنە تيمەگەندە. ەسەپ – 2:1, «رب لەيپتسيگ» جارتىلاي فينالدا.
«بارسەلونا» – «باۆاريا» ماتچى ليونەل مەسسي مەن روبەرت لەۆاندوۆسكيدىڭ «التىن دوپقا» كىمنىڭ لايىق ەكەنىن كورسەتىپ بەرگەندەي. ارينە فۋتبول تاريحىندا ارگەنتينالىق فۋتبولشىنىڭ ەسىمى, اتاق-داڭقى تانىمال. بىراق ليسسابوندا لەۆاندوۆسكي جانە ونىڭ كومانداسى قاي كەزدە دە مىقتى ەكەنىن دالەلدەي الدى.
بۇعان دەيىن قارسىلاسىنان ءار تايمدا 4 گول جىبەرىپ الاتىن «بارسەلونانى» بۇرىن سوڭدى كورمەپپىز. ءسوز جوق مەسسي – فەنومەن! وسىنداي مىقتى ويىنشىسى بار كوماندانى جولدان تايدىرعان جانە 8:2 ەسەبىمەن ويسىراتا جەڭگەن «باۆاريادا» «ۇيات», «اياۋشىلىق» جوق دەۋشىلەر دە تابىلار. الايدا بۇل – فۋتبول. فۋتبولدا اياۋشىلىق دەگەن بولمايدى.
گول سوققاندار – الابا 7 ء(وز قاقپاسىنا), سۋارەس 57 («بارسەلونا») – ميۋللەر 4, 31, پەريشيچ 21, گنابري 27, كيمميح 63, لەۆاندوۆسكي 82, كوۋتينو 85, 89 («باۆاريا»).
فرانتسيانىڭ «ليون» كومانداسى انگليانىڭ «مانچەستەر سيتي» كومانداسىن 3:1 ەسەبىمەن باسىم ءتۇسىپ, جارتىلاي فينالعا جولداما العان سوڭعى كوماندا.
ويىن باستالماس بۇرىن بىرقاتار فۋتبول ماماندارى گۆارديولا باپتايتىن مس ۇجىمىن ۇزدىك ءتورت كوماندانىڭ قاتارىنا قوسىپ قويعان ەدى. الايدا ولاردىڭ بۇل جولعى بولجامىن كوبىنەسە قارىمتا شابۋىلدارمەن گول سوققان «ليون» كۇل-پارشاسىن شىعاردى.
«ليون» ءبىرىنشى بولىپ ەسەپ اشتى. ويىننىڭ 24 مينۋتىندا كورنە ايىپ الاڭىنىڭ سىرتىندا سول اياقپەن شىرەنە تەۋىپ, كومانداسىن العا شىعاردى. 69 مينۋتتا مس ساپىنان بەلگيا قۇراماسىنىڭ تاجىريبەلى فۋتبولشىسى كەۆين دە بريۋينە ايىپ الاڭىنىڭ ىشىندە قاقپانىڭ وڭ جاق بۇرىشىن ءدال كوزدەپ, ەسەپتى تەڭەستىردى. ال ويىننىڭ 79 جانە 87 مينۋتتارىندا فرانتسۋز شابۋىلشىسى دەمبەلە دۋبل اۆتورى اتانىپ, بۇل كەزدەسۋگە نۇكتە قويدى. ەسەپ – 3:1, «ليوننىڭ» پايداسىنا شەشىلدى.
18 تامىزدا جارتىلاي فينالدىق ماتچتا «لەيپتسيگ» – پسج ءوزارا مىقتىنى انىقتاسا, 19 تامىزدا «ليون» ازۋلى «باۆاريامەن» كەزدەسەدى.