تاياۋدا الەۋمەتتىك جەلىدە الماتى قالاسىنداعى پارحاچ كولىنىڭ لاستانۋى قىزۋ تالقىلاندى.
شاھار تۇرعىندارى جاعالاۋدا شاشىلعان قوقىستار مەن قىرىلىپ قالعان بالىقتار ماسەلەسىنە شاعىمدانىپ, بۇرىن بۇل سۋ ايدىنىندا بالىقتارعا قاۋىپ بولماعانىن جەتكىزگەن. ال تۇركسىب اۋدانىنىڭ اكىمدىگى بۇل كولدىڭ 2017 جىلى اۋىل شارۋاشىلىعى مينيسترلىگى «اق وتاۋ گرۋپ» جشس «قازاق وندىرىستىك-بەيىمدەۋ ستانساسى» رمكك-عا بەرىلگەنىن اتاپ ءوتتى.
«تەڭگەرىمدە ۇستاۋشى مەكەمەنىڭ مالىمەتىنە سايكەس, كولدى اباتتاندىرۋ جوسپارلانعان. اۋدان اكىمى اپپاراتىنىڭ تاراپىنان تەڭگەرىمدە ۇستايتىن مەكەمە تەرريتوريانى دۇرىس ساقتاماعانى ءۇشىن بىرنەشە رەت اكىمشىلىك جاۋاپقا تارتىلدى», دەيدى اۋدان اكىمدىگى.
جۋىردا اتالعان كولگە ەكولوگيا, گەولوگيا جانە تابيعي رەسۋرستار مينيسترلىگى الماتى قالالىق ەكولوگيا دەپارتامەنتى, «قازگيدرومەت» جانە الماتى قالالىق ورمان شارۋاشىلىعى جانە جانۋارلار دۇنيەسى ينسپەكتسياسى قىزمەتكەرلەرى باردى. ولار سۋ سىنامالارىن الىپ, بالىقتاردىڭ جاپپاي قىرىلۋىنىڭ سەبەبىن انىقتايدى.
ەكولوگيا مينيسترلىگى كەزەكتى رەت ازاماتتاردى دەمالىس ايماقتارىندا تازالىق جانە ءتارتىپ ساقتاۋعا, قوقىستى جيناپ جۇرۋگە شاقىرادى. زاڭبۇزۋشىلىقتار بولعان جاعدايدا كىنالىلەر جازالانادى. جاقىن ارادا ازاماتتاردىڭ قورشاعان ورتاعا كەلتىرگەن زيانى ءۇشىن جاۋاپكەرشىلىك كۇشەيتىلەدى.