«حالال» دەگەن جازۋى بار شۇجىقتار حارام بولىپ شىقتى. مۇنداي جاعداي رەسپۋبليكامىزدىڭ بىرقاتار وڭىرلەرىنەن انىقتالدى. ماسەلەن, قاراعاندى قالاسىنداعى ءىرى ساۋدا ورتالىقتارىندا ساتىلىپ كەلگەن شۇجىقتار قۇرامىندا ىشەك اۋرۋلارىن تۋدىراتىن قاۋىپتى باكتەريا بار ەكەنى ءمالىم بولدى. بۇل تۋرالى «31» تەلەارنا حابارلادى.
جەرگىلىكتى جەردەگى تسەحتا ەتتىڭ ساپاسىن دالەلدەيتىن انىقتاما قاعازى جوق بولىپ شىقتى. سوعان قاراماستان, بۇل جەردە «مۇسىلمان شۇجىعى» ازىرلەنىپ كەلگەن. وسى بىلىققا بايلانىستى تسەح باستىعى قۇقىق قورعاۋ قىزمەتكەرلەرىنە جاۋاپ بەرۋدە. «شۇجىق ءونىمىن شىعاراتىن تسەحتا سانيتارلىق تالاپتار ساقتالماعان. بارلىق جەرى شاڭ-توزاڭ, لاس. ءتىپتى ورمەكشىگە دەيىن قاپتاپ ءجۇر. ەت ءونىمىن جەرگە قويا سالعان. ەندى ءبىز تسەح باستىعىنا قاتىستى قۇجاتتاردى سوتقا جونەلتەمىز»,- دەيدى وكتيابر اۋداندىق پروكۋراتۋراسىنىڭ ءبولىم جەتەكشىسى ءاليا انساروۆا.
الماتى قالاسىنىڭ تۇرعىنى سالتانات قاناتبەك تە دۇكەننەن ساتىپ العان «حالال» شۇجىعى ىشىنەن قۇستىڭ قاۋىرسىندارى مەن پوليەتيلەن قاپشىعىنىڭ قالدىعى شىققانىن ايتادى. ەڭ سوراقىسى, دۇكەن سورەسىندە ساتىلىپ كەلگەن بۇل شۇجىقتىڭ سىرتقى قاپتاماسىندا ءوندىرۋشى كاسىپورىننىڭ اتى جازىلماعان. ساتۋشى بولجامى بويىنشا شيكىلىگى انىقتالعان شۇجىق تاراز قالاسىنداعى «دوستار» كاسىپورنىنا تيەسىلى كورىنەدى. وسى ماسەلەگە بايلانىستى تۇسىنىكتەمە بەرگەن «دوستار» جشس باس ديرەكتورى سايد پەرسانۋكوۆ بۇل بىلىقتى قاسكويلەردىڭ ارەكەتىنە جاتقىزىپ, ءبىزدىڭ سەرىكتەستىكتىڭ اتىن جامىلۋشىلار بار دەگەندى ايتتى. قالاي دەگەنمەن دە, حالىقتى الداپ جۇرگەندەردىڭ تىرلىگى اقتاپ الۋعا جاتپايتىن كەلەڭسىز كورىنىس.
باقىتبەك كەنەش ۇلى.