كامەلەتتىك جاسقا جەتپەي قىلمىس جاساعان بالالاردى ۇستاۋعا ارنالعان الماتى قالاسىندا ورنالاسقان ەلىمىزدەگى جالعىز تۇزەۋ مەكەمەسىندە بۇگىنگى كۇنى 41 بالا جازاسىن وتەپ جاتىر.
اتالعان قىلمىستىق-اتقارۋ جۇيەسى مەكەمەسىندە بالالار ءتۇرلى جۇمىسپەن اينالىسىپ, مادەني-سپورتتىق شارالارعا قاتىساتىن. كارانتين باستالعالى وسى گۇلباق بالالاردىڭ ەرمەگىنە اينالدى. جاسوسپىرىمدەردى پايدالى ەڭبەككە باۋلۋ جۇمىستارى كارانتين كەزىندە دە ءبىر تولاستاعان جوق.
كارانتين تالاپتارىنا بايلانىستى قازىر كولونياعا كەلىپ ونەر كورسەتەتىن نەمەسە سپورتتىق جارىستار وتكىزەتىن ونەرپازدار مەن سپورتشىلار قاتارى سيرەسە دە, بالالاردىڭ ءار كۇنى كوڭىلدى وتۋدە. ولاردىڭ ەڭ ءسۇيىپ ىستەيتىن جۇمىستارى كولونيا اۋماعىن كورىكتەندىرۋ. قىستا قاردان جاسالعان نەبىر مۇسىندەر مەن مۇز قالاشىقتار كورىك بەرسە, جازدا جايقالعان گۇلدەر كوزدىڭ جاۋىن الادى. مۇنداي اسەمدىكتى جاسوسپىرىمدەر ءوز قولدارىمەن جاسايدى.
جۋىردا لا-155/6 مەكەمەسىنە وسى مەكەمەنىڭ قامقورشىلىق كەڭەسىنىڭ مۇشەسى ت.توماسوۆ گۇل تۇقىمدارى مەن كوشەتتەرىن سىيعا تارتقان بولاتىن. بۇل سىيلىقتى قۋانا قابىلداعان جاسوسپىرىمدەر مەكەمە اۋلاسىن ودان ءارى كوركەيتە ءتۇستى.
– مەكەمەدەگى بالالار بۇرىن دا اۋلاعا راۋشان گۇلدەرىن وتىرعىزىپ, ونى وزدەرى كۇتىپ-باپتاپ جۇرەتىن. تىپتەن كولونياعا كەلگەن قوناقتارعا جانە كەزدەسۋگە كەلگەن اتا-انالارىنا وزدەرى وسىرگەن القىزىل گۇلدەرىن سىيعا تارتاتىن. گۇل كوشەتتەرىن وتىرعىزۋعا, تۇقىمىنان گۇل وسىرۋگە ماشىقتانعان بالالار بۇل جۇمىستى بۇرىن ىستەپ كورمەگەن بالالارمەن ءوز تاجىريبەلەرىن ءبولىستى. تۇزەۋ مەكەمەسىنىڭ اۋلاسىنداعى تەمىر قورشاۋدا اسىر سالعان قويانداردى كۇتۋ دە بالالاردىڭ سۇيىكتى ءىسى. سوتتى بولعان بالالاردى ەڭبەككە باۋلۋ ولاردىڭ ەڭبەكقور بولىپ وسۋىنە ىقپال ەتەدى. ەرىنبەي ەڭبەك ەتكەن ادام ەشقاشان كوشتىڭ ارتىندا قالمايدى, – دەيدى الماتى قالاسى بويىنشا قىلمىستىق اتقارۋ جۇيەسى دەپارتامەنتىنىڭ باستىعى دارحان قاناتبەكوۆ.