وبلىستا كەيىنگى ەكى اپتا ىشىندە جاڭادان ىندەت جۇقتىرعاندار سانى 5 ەسەگە ازايدى. دەنساۋلىق ساقتاۋ باسقارماسى ستاتسيونارلارلىق گوسپيتالدارداعى ناۋقاستاردىڭ 78%-عا قىسقارعانى تۋرالى مالىمەت بەرىپ وتىر. ەپيدەميالىق احۋال تۇراقتانا باستاعان سوڭ, وبلىس ورتالىعىنداعى «دوستىق پروفيلاكتوريالىق مەكەمەسى مەن پسيحونەۆرولوگيالىق ديسپانسەر, سونداي-اق تەمىر جول اۋرۋحاناسى جانىنان اشىلعان پروۆيزورلىق ستاتسيونارلار دا جۇمىسىن توقتاتقان.
سوعان قاراماستان قوستانايدا مامانداندىرىلعان جاڭا ەمدەۋ مەكەمەسىنىڭ قۇرىلىسى باستالدى. بۇل تۋرالى وڭىرلىك جەدەل شتاب وتىرىسىندا وبلىس اكىمى ارحيمەد مۇحامبەتوۆ ايتتى.
– بيىل قازان ايىنىڭ 1-ىنە دەيىن قوستاناي قالاسىندا 200 ورىندىق ينفەكتسيالىق اۋرۋحانا پايدالانۋعا بەرىلەدى. قازىر ورال كوشەسىنىڭ بويىندا قۇرىلىس ءجۇرىپ جاتىر. الداعى ەكى ايدىڭ ىشىندە تولىق سالىنىپ بىتەدى, – دەدى ايماق باسشىسى.
جاڭا اۋرۋحانانى دارىگەر ماماندارمەن قامتۋ ماسەلەسى دە رەتتەلىپ قويعان. بيىل وبلىسقا وزگە وڭىرلەردەن 240 دارىگەر كەلەدى. ايماققا جاس مامانداردى كوپتەپ تارتۋ ماقساتىندا ولارعا بەرىلەتىن كوتەرمە اقى كولەمى دە وسكەن. بۇعان دەيىن 1,5 ملن تەڭگە كولەمىندەگى كوتەرمە اقى تەك اۋىلعا باراتىن دارىگەرلەرگە عانا بەرىلىپ كەلسە, بيىلدان باستاپ قالالىق مەكەندەردەگى مەديتسينالىق مەكەمەلەرگە جۇمىس ىستەۋگە كەلگەن ماماندارعا دا 1 ملن تەڭگەدەن قولداۋ كورسەتىلەتىن بولادى.
قوستاناي وبلىسى