نيەت پەن قۇلشىنىس تىزە قوسسا, تالاپتى جاستىڭ قولىنان كەلمەيتىن دۇنيە جوق. مۇنى كوكشە تەڭىز جاعاسىنداعى بالقاش قالاسىندا تۇراتىن ماقسات تاقاباەۆ ەسىمدى ەڭبەكقور جىگىت ىسپەن تاقا دالەلدەپ ءجۇر. قازىر ول Made in Balkhash تاۋارلىق بەلگىسىمەن سپورتتىق جەڭسىز جەيدە تىگىپ, شارۋاسىن دوڭگەلەتە باستادى.
بۇگىندە ىسمەر ازامات جۇزدەن استام تاپسىرىستى تياناقتى ەتىپ ورىنداپ شىققان. تۇتىنۋشىلار تاراپىنان وكپە-رەنىش, ەسكەرتپە بولماپتى. قايتا, العىستارىن جاۋدىرىپ, تالاپتى جاستىڭ قۇلشىنىسى مەن ىنتاسىن ارتتىرىپ قويعان.
ماقسات بۇل ءىستى بالقاش قالاسى اكىمىنىڭ بيزنەستى دامىتۋعا ارنالعان گرانتىن جەڭىپ العاننان كەيىن باستاپتى. ەندى ول ىلگەرىلەۋدىڭ جايىن ويلاپ, ءوز ءىسىنىڭ اۋقىمىن كەڭەيتۋدى جوسپارلاپ جۇرگەن كورىنەدى. جاس كاسىپكەر جۇمىسىنىڭ ىرعاعى سىرتتان قاراعاندا بىلايشا تۇزىلەدى: كەستە ماشيناسىنىڭ باعدارلاماسىنا تاپسىرىس بەرۋشى تاڭداعان ەسكيز جۇكتەلەدى. قىسقا عانا جازبا نەمەسە سۋرەت سالۋ جارتى مينۋت ۋاقىتتى الادى, ال تۇتاس سۋرەتتەر ءبىر ساعاتقا دەيىن كەستەلەنەدى ەكەن.
– ءبىز ونىمگە Made in Balkhash دەگەن جاپسىرمالاردى مىندەتتى تۇردە تىگەمىز. بۇل زاتتىڭ قايدا جاسالعانىن كورسەتەدى. سونداي-اق تاپسىرىس بەرۋشىنىڭ ءوتىنىشى بويىنشا ءارتۇرلى سوزدەر مەن سۋرەتتەر سالامىز, – دەيدى امبەباپ مامان.
بۇگىندە ماقسات بۇل ءىستى وتباسىلىق بيزنەسكە اينالدىرعان. شاعىن شەبەرحاناسىنىڭ جۇمىس ىستەپ تۇرعانىنا جارتى جىلداي بولىپ قالىپتى. ەڭ باستى جانە سەنىمدى كومەكشىسى – اناسى گۇلنار سىزدىقوۆا. ول كىسى مينۋتىنا ءتورت مىڭ اينالىم جاساي الاتىن وندىرىستىك تىك بۇرىشتى ستانوكتىڭ قۇلاعىندا وينايدى. بۇل ماشينا ءۇش ساعات ىشىندە ماتانىڭ كەسىندىسىن ديزاينەرلىك جەيدەگە اينالدىرا الادى ەكەن.
– ەگەر الاڭسىز جۇمىس ىستەيتىن بولساق, كۇنىنە ءۇش-ءتورت فۋتبولكا تىگۋگە بولادى. ءبىز, ارينە, ەڭ الدىمەن ساپاعا ءمان بەرەمىز. سوندىقتان تەك تۇرىك ماتالارىن پايدالانامىز, – دەيدى گۇلنار سىزدىقوۆا.
قازىرگى ۋاقىتتا ماقساتتىڭ فۋتبولكالارى الەۋمەتتىك جەلىلەر ارقىلى ساتىلادى. ءوتىمى جامان ەمەس: بۇگىنگە دەيىن جۇزدەن استام فۋتبولكا مەن قالپاق تۇتىنۋشىسىن تاپقان.
جاقىندا جاس كاسىپكەر بالقاش قالاسى اكىمىنىڭ بيزنەستى دامىتۋعا ارنالعان 2 ملن تەڭگە گرانتىن جەڭىپ الدى. بۇل قارجى, ارينە, ءورىس كەڭەيتىپ, جاڭا دەڭگەيگە شىعۋعا مۇمكىندىك بەرەدى. مىسالى, بۇعان دەيىن فۋتبولكاعا عانا كەستە تىگىپ كەلگەن ماقسات ەندى قالپاقشا, كۇرتە, ءتىپتى اياقكيىمگە دەيىن كەستەمەن ءتۇرلى تاڭبا ءتۇسىرىپ, جازۋ بەدەرلەي الاتىن بولادى. بۇل ءۇشىن جاس كاسىپكەر ونەركاسىپتىك كەستە تىگۋ ءوندىرىسىن جولعا قويماق.
نەسى بار, تالاپتى جاستىڭ Made in Balkhash زاتبەلگىسى ەلىمىزدەگى تانىمال برەندتەردىڭ بىرىنە اينالىپ جاتسا, تاڭدانۋعا بولماس. سەبەبى تالپىنعان ماقساتىنا جەتپەي تىنبايدى!
قاراعاندى وبلىسى,
بالقاش قالاسى