كەشە ۇكىمەت ۇيىندە قازاقستان پرەمەر-ءمينيسترى كارىم ءماسىموۆ گرۋزيا پرەمەر-ءمينيسترى نيكولوز گيلاۋريمەن كەزدەستى. ەكى ەل دەلەگاتسياسى اراسىندا جۇرگىزىلگەن كەلىسسوزدەر قورىتىندىسى بويىنشا قازاقستاننىڭ قارجى رىنوگى مەن قارجى ۇيىمدارىن رەتتەۋ جانە قاداعالاۋ اگەنتتىگى مەن گرۋزيانىڭ ۇلتتىق بانكى اراسىندا ءوزارا تۇسىنىستىك تۋرالى مەموراندۋمعا قول قويىلدى. وعان قازاقستان تاراپىنان اگەنتتىك ءتورايىمى ەلەنا باحمۋتوۆا, ال گرۋزيا تاراپىنان ۇلتتىق بانك توراعاسى گەورگي كاداگيدزە قول قويدى.
قازاقستان مەن گرۋزيا اراسىنداعى ديپلوماتيالىق قارىم-قاتىناس 1992 جىلدان باستاۋ الادى. وسىعان دەيىن ەكى ەل اراسىندا ءتۇرلى باعىتتاردا 50-دەن استام ەكىجاقتى قۇجاتتارعا قول قويىلعان. دەگەنمەن, ەكىجاقتى رەسمي ديپلوماتيالىق ىنتىماقتاستىقتى رەتتەيتىن قۇجات نەگىزى 1993 جىلى سول كەزدەگى گرۋزيا باسشىسى ە.شەۆاردنادزەنىڭ ەلىمىزگە رەسمي ساپارى بارىسىندا قول قويىلعان قازاقستان جانە گرۋزيا رەسپۋبليكالارى اراسىنداعى ءوزارا قارىم-قاتىناس تۋرالى كەلىسىم بولىپ تابىلادى.
2008 جىلى گرۋزيا مەن قازاقستان اراسىنداعى تاۋار اينالىمى 67,2 ملن. دوللاردى قۇراعان كورىنەدى. ونىڭ ىشىندە ەل ەكسپورتىنىڭ كولەمى 49,7 ملن.دوللاردى كورسەتسە, گرۋزيا ەلىنەن كەلەتىن ەكسپورت كولەمى 17,3 ملن.دوللاردى قۇراپتى. ءبىزدىڭ ەلىمىزدەن نەگىزىنەن بيداي ەكسپورتتالاتىن بولسا, گرۋزيادان كەلەتىن ونىمدەر ءتىزىمى جيھاز, مەتاللۋرگيالىق, ماشينە جاساۋ, حيميالىق جانە ازىق-ت ۇلىك ونىمدەرىنەن, ءتۇرلى فەرروقورىتپالاردان تۇرادى.
قول قويۋ راسىمىنەن سوڭ ەلىمىز پرەمەر-ءمينيسترى كارىم ءماسىموۆ كەلىسسوز بارىسىندا ەكىجاقتى قارىم-قاتىناس ماسەلەلەرىمەن قاتار, قازاقستان بيدايى ءۇشىن گرۋزيا جەرىندە ارنايى تەرمينال سالۋ ماسەلەسىنىڭ دە تالقىلانعانىن جەتكىزدى. گرۋزيا ۇكىمەت باسشىسىنىڭ ايتۋىنشا, بۇل قازاقستانعا وسى تاۋار ءتۇرىن ءارتاراپتاندىرۋعا مۇمكىندىك بەرمەك.
ۇستىمىزدەگى جىلدىڭ جازىندا, اتاپ ايتساق, تامىز-قىركۇيەك ايلارىندا قازاقستان ۇكىمەتىنىڭ دەلەگاتسياسى وسى ماسەلەلەردى پىسىقتاۋ ءۇشىن باراتىن بولادى.
ۆەنەرا تۇگەلباي.